QAQISA ilinniarfinnik inuussutissarsiortunillu attaveqatigiilersitsivoq

Kommunit, inuussutissarsiortut, kattuffiit ilinniarfiillu akornanni siunnerfeqarluartumik suleqatigiinnerup inuusuttut ilinniagassamik toqqaanerat siunissamullu periarfissaat nukittorsartarai inuussutissarsiornermik ilinniartitaanermillu nittarsaassinermi Siunissaqaassami, suliffeqarfinnut pulaarnermi ikinngutitaartortitsinermilu misilittakkat takutippaat.

CSR Greenland meeqqat atuarfianni angajulliit ilinniaqqilernissaannik imaluunniit soraarummeereerunik suliffittaarnissaminnik kajumissaarneqarnissaat pillugu suliniummik QAQISA-mik 2015-imiilli ingerlatsivoq.

Suliniut suli ineriartortinneqartarlunilu ullumikkut immikkoortunik arlalinnik imaqarpoq, taakkualu tamarmik ilinniartut illoqarfimmilu inuussutissarsiortut attaveqatigiilluarnerulernissaannik siunertaqarput.

Suliffeqarfiit 37-t inuusuttullu 700-t

Inuussutissarsiornermut ilinniagaqarnermullu tunngasunik saqqummersitsineq Siunissaqaasa, 9. aamma 10. klassinut sammisaqarfiusoq, QAQISA-mi suliniutit pingaarnerit ilagaat.

Nittarsaassineq kingullermik ukioq manna januaarip 28-ani Nuummi Inussivimmi ingerlanneqarpoq, tassani inuusuttut ilinniagaq sorleq toqqarsinnaanerlugu suliffiillu assigiinngitsut sunik neqeroorutissaqarnersut paasisaqarfiginerusinnaavaat.

Suliffeqarfiit 37-t inuusuttullu 700-t missaanniittut, ilaatigut 9. aamma 10. klassimi atuartut, GUX-imi Majoriamilu ilinniartut soqutiginnittullu allat, nittarsaassinermi peqataapput.

Ullaap tungaa atuartunut nittarsaassiffigineqarlunilu atuartitsinermut ilaatinneqarpoq. Atuartut suliffiit isumaginniffiillu nittarsaassiffii takuniaaffigisarpaat, apeqquteqartarlutik taamatuttaarlu suliat suliaqarfiillu assigiinngitsut misileraaffigisinnaavaat.

Nittarsaassineq ulloq taanna kingusinnerusukkut tamanut ammavoq, taamaalillutillu GUX-imi Majoriamilu ilinniartut soqutiginnittullu allat aamma peqataasinnaapput.

Inuusuttut akornanni attaveqatigiinneq

Sulisitsisut naapertorlugit suliffeqarfiit isumaginniffiillu pimoorussillutik, isumassarsiullaqqissuullutik sammisassanillu atoriaannaasunik saqqummiussillutik peqataapput, taamaalillutillu nittarsaassineq inuusuttunut uummaarissumik attuumassuteqartumillu pilersippaat. Amerlasuut aamma oqariartuutiminnik ingerlatitseqqiinerminni ilinniartuutitik saqqummiisippaat, taamaalillunilu ilinniarfinni suliffinnilu assigiinngitsuni ulluinnarni inuuneq piviusorpalaarnerusoq nalinginnaanerusorlu atuartunut saqqummiunneqarpoq. Suliffeqarfiit arlallit atuarnerup nalaani suliffimmik misiliinissamut periarfissat pillugit iluatsillugu aamma oqaluttuarput.

Aaqqissuussaq Kommuneqarfik Sermersooq, CSR Greenland aamma Nuummi Sulisitsisut suleqatigiinnerisigut ingerlanneqarpoq.

Nittarsaassineq atuarnerullu nalaani suliffimmik misiliineq

CSR Greenlandip ukiumoortumik nalunaarusiaa naapertorlugu iluatsilluartumik ingerlatsinissamut pissutsit aalajangersimasut aalajangiisuusut nittarsaassinermi misilittakkat takutippaat.

Nittarsaassinerup atuartut atuartinneqarnerannut aalajangersimasumik ilaassasoq atuartullu piareersarluarsimallutik nittarsaassisunut apeqquteqartarnissaat pingaaruteqarpoq. Ilinniartut peqataagaangata oqaloqatigiilluartoqarnerusarlunilu pissarsiaqarnarnerusarpoq.

Suliffimmik misiliineq suliniummi aamma pingaarutilittut sammineqartarpoq. Atuartut suliffeqarfiillu suliffimmik misiliinissamut periarfissat pillugit oqaloqatigiinnissamut kajumissaarneqartarput – pitsaanerpaagaangallu isumaqatigiissuteqartarlutik. Nittarsaassineq taamaalilluni paasissutissiineruinnarnani aamma iliuuseqarnissamut periarfissiivoq.

Siunissaqaasap siuarsarnissaanut nalilersuineq pingaarutilittut aamma inissisimavoq. Atuartut saqqummersitsisullu misilittagaat amerlanertigut pitsaasarput. Atuartut ilinniagaqarnissamut suliffissarsiornissamullu periarfissaminnik ilisimaarinninnerulersarput, taamatuttaarlu suliffeqarfiit ilinniarfiillu suliaqarfitsik soqutiginarnerulersittarpaat.

Suliffeqarfinnut pulaarneq

Suliniut ILIK Buddy, maanna Tasiilami Nuummilu misilinneqartoq, QAQISA-mi suliniutit ilagaat. Tassani atuartut ataasiakkaat siunissami ilinniarfigerusutaat aallaavigineqartarpoq.

Tamanna tunngavigalugu suliffeqarfinnut pulaartoqarsinnaavoq, tassani atuartoq suliffimmik qanimut misigisaqarsinnaallunilu suliamut tunngasunik toqqaannartumik apeqquteqarsinnaavoq. Siunissami suliffigisinnaasat assigiinngitsut pillugit nammineerluni paasisaqarnissaq siunertaavoq.

Suleqatigiinnikkut – ilaatigut Kommuneqarfik Sermersuumik suleqateqarnikkut – suliniutit taakku misilinneqarsinnaallutillu ineriartortinneqarsinnaapput. „asiilami Nuummilu atuartut angerlarsimaffiinik suleqateqarneq suliassamut tamatumunnga aamma pingaaruteqarsimavoq, CSR Greenland allappoq.

Naliliineq — iliuuseqarneq pingaaruteqarpoq

Iliuuseqarnerup kinguneqarluartarnera misissuinerit takutippaat: Atuartut siunissartik pillugu paasisaqarnerupput, inuussutissarsiortullu kinguaariit tulliuttut peqataatinnissaannut isumassarsisinnissaannullu periarfissaqalerput.

Taamaammat CSR Greenland ilinniartitaanerup suliffissanullu attaveqarnerup nukittorsarneqarnissaa pingaartillugu, inuusuttut alapernaannerulernissaat siunissamullu tunngatillugu aalajangiinissamut tunngavissaqarluarnissaat siunertaralugu QAQISA-p ineriartortinneqartuarnissaanik kissaateqarpoq.

Allaaserisaq aviisimiit ilinniarneq pillugu sammisameersuuvoq, akeqanngitsumik una toorlugu atuarneqarsinnaavoq.