Rosbach: Nunap inoqqaavi klima pillugu politikimut akuutinneqassapput

Avatangiisinut pinngortitamullu naalakkersuisup nunat tamat akornanni oqalliseqatigiinnermi nunap inoqqaavisa pisinnaatitaaffii ilisimasaallu politikikkut klima pillugu aaqqissutinut ilanngullugit eqqarsaatigineqartariaqartut erseqqissaatigaa.

Jørgen Rosbach Københavnimi nunat tamat peqataatitaasa akornanniittoq.

Assi: Naalakkersuisut/pressefoto

Morten Okkels Morten Okkels Tusagassiortoq

Saqqummersinneqarpoq 24. Maaji 2026 - 15:02

Ussassaarut

Sapaatip akunnerani siusinnerusukkut nunarsuarmi klimamut ministerit 40-t missaat Københavnimi Climate Ministerial-imi ataatsimiinnermi katersuupput. Avatangiisinut, pinngortitamut, nukissiuutinut ilisimatusarnermullu naalakkersusioq Jørgen Rosbach (D) Kalaallit Nunaat sinnerlugu peqataavoq.

Nunap inoqqaavisa pisinnaatitaaffii ilisimasaallu klima pillugu politikiliornermi akuutinneqarnissaat, Jørgen Rosbachip ministerinut peqataasunut kaammattuutigaa.

– Nunat ilaasa klimamut pilersaarutaanni nunap inoqqaavi silaannaap pissusaata allangoriartornerani immikkut qajannartutut eqimattatut taaneqarput. Nunap inoqqaavi aamma silaannaap pissusaata allanngoriartorneranut akiuiniarnermi pingaarutilittut akuusutut akuerineqarnissaat Naalakkersuisut pingaartikkaat, Jørgen Rosbach Naalakkersuisut tusagassiorfinnut nalunaarutaanni allappoq.

Copenhagen Climate Ministerial ullut marluk ingerlaneranni pisoqartitsineruvoq 2022-mili upernaat tamaasa danskit naalakkersuisuinit ingerlanneqartartoq.

Naalakkersuisup periarfissaq iluatsillugu Danmarkimi klimamut, nukissiuuteqarnermut pilersuinermullu ministeri Lars Aagaard ataatsimeeqatigaa.