Inuit 112.450-t kunngikkormiut arpaqatigissagaat

Ukioq manna Royal Run Danmarkimi illoqarfinni tallimani ataasinngorpat ingerlanneqalerpat, aammaarluni rekoortiliisoqassaaq.

Kunngikkormiut nittartakkakkut quppernerat malillugu inuit 112.450-t timigissaatigalugu arpannissamut peqataaniarlutik nalunaarput. Tamannalu siorna 97.786-it peqataallutik rekoortiliinermit amerlanerungaatsiarpoq.

Peqataasut affangajaat – 50.000-t missaat Københavnimit Frederiksbergimillu aallassapput, peqataasullu sinneri illoqarfinnut Ringkøbingimut, Randersimut, Middelfartimut Helsingørimullu agguarsimapput.

”one mile”, 1609 meteri, fem kilumiiteri 10 kilumiiteriluunniit arpaffigaluguluunniit pisuffigineqarsinnaavoq.

Kunngi Frederik Randersimi pisoqartitsinermik ammaassaaq, kingornalu Middelfartimi takkutissalluni, Københavnimilu naggasiilluni.

Kunngissaq Christiaat Ringkøbingimi kunngikkormiunit peqataassaaq, Dronning Marylu Helsingørimi arpaqataassaaq.

Royal Run siullermeerluni 2018-mi taamanikkut kunngissap 50-liinerani nalliuttorsiornermut atatillugu siullermeerluni ingerlanneqarpoq.

Taamanikkut inuit 70.000-ngajaat peqataapput, ataasiaannarlunili pisussatut eqqarsaataaqqaaraluarpoq. Annertuumilli iluatsitsinerup aaqqissuussinerup ukiup tulliani ingerlateqqinneqarnera kinguneraa.

Naak corona 2020-mi arpannermik pinngitsoortitsigaluartoq, taamaattoq 2021-mit ukiut tamaasa ingerlanneqartarpoq, peqataasullu ukiumit ukiumut amerleriartorput.