Biilinut nutaanut inersuaq saqqummersitsivik nutaaq

- Sanaartukkami nutaami ininut qullernut isertereerpugut, biililli nutaat inissinnissaannut suli amigaateqalaaratta, Deres Automi tuniniaanermut pisortaq piginneqataasorlu Palle Frederiksen oqarpoq.

Inersuarmi nutaami Deres Autop Industrivejimi ingerlateriigaanut ilaasumi, inersuarmi allermi biilinut 30-t missaanniittunut 400 m2-tut annertutigisumi inissaqarpoq. Tamatuma saniatigut inimi qullermi tuniniaanermut immikkoortortami aamma taartissanut toqqorsivimmut inissaqassalluni.

– Ammaanersiornermik aaqqissuussinissamut qaaqqusinnginnitsinni, atortussat Toyotameersut amigaatigigatsigik. Tamanna oktobarimi pissaaq, Palle Frederiksen oqarpoq, taassumalu aamma biilit nutaat Nunatsinnut nassiussat maannakkorpiaq ingerlaartut utaqqivai.

Nuup biilia

Biilit taakkua ilaat, Mitsubishi Outlander Phev 2025-meersoq, Deres Autop tikisinnissaa qilanaaraa.

– Nuup biilianik taaneqartarneranut patsisaavoq, maani biilertartorpassuit taamaattunik biileqarmata, taamaattumik biilip nutartikkap nutaap qularnanngitsumik oktobarip qiteqqunnerani takunissaa qilanaaraarput, Palle Frederiksen oqarpoq.

SUV-i angisooq nutaamik teknologiilersorneqarpoq nutaaliaanerusunillu atortorissaaruteqarluni, ilaatigut arfineq-marlunnik assigiinngitsunik ingerlaarnissamut inissiinissamut periarfissaqarluni. Akuleriissitsilluni ingerlasinnaanermigut, motoorip innaallagiatortup saniatigut motoorimik benzinatortumik 86 km-inut ingerlasinnaanermigut, katillugit 844 kilometerit ingerlasinnaavai.

Navor assigiinngitsunik qalipaatilik

Deres Autop Kinamiut biililiaat Navor Nunatsinni juunimi saqqummiuppaa, tamannalu iluatsilluaqaluni. Biilit tallimat tikisinneqartut ingerlaannartumik tunineqarput.

Taamaattumik Deres Auto SUV-nik akuleriissitsilluni ingerlatilinnik, arfineq-marlunnik ilaasoqarsinnaasunik 30-nik inniminniivoq. Siulliit 20-t oktobarimi tikisinneqassapput, sinnerilu qulit Nuummut decembarimi tikisinneqassallutik.

– Inniminnikkavut siulliit tallimat tamarmik qernertuugamik, maannali arlaqarnerusunik qalipaatilinnik inniminniivugut. Tikisinneqartussat taamaalillutik qernertuupput, sølvitut aamma qaqortumik qalipaateqarlutik. Ukioq manna kingusinnerusukkut qorsummik aamma tikisitsissallutik, Palle Frederiksenip oqaatigaa.

 Nunani 70-ini nuannarineqartoq

Kinamiut biililiorfiisa marluk Dongfeng Motor Groupip aamma Seres Groupip suleqatigiinnerisigut - DFSK Motorimi - Navor nioqqutaavoq.

DFSK Motor Kinami biililerisuni siullersaalluni EU-mit akuersissutaateqarpoq. Navor E5 nunani 70-init amerlanerusuni ullumikkut tunineqartarpoq, maannamullu 3 millioninit amerlanerusut Navorimik, aamma “Fengon E5”-imik taaneqartartumik biileqarput.

Akuleriissitsilluni ingerlasinnaasoq

Biilimi akuleriissitsilluni ingerlasinnaasumi, innaallagissamoortumik motoorimik pingaarnertut atuisoq pineqarpoq. Tamatumani batterii atorneqartoq 17,5 kWh-iuvoq taamalu 70 kilometerit angullugit innaallagissamik atuilluni ingerlasinnaalluni. Tamatuma saniatigut benzinamik 1,5 literimik atuisussamik motooreqarluni. Biilip akuleriissitsilluni atuilluni ingerlasinnaanerata kinguneranik appasinnerpaamik akitsuuteqartinneqassaaq.

Navor E5 angissutsimigut Skoda Kodiaq-imut imaluunniit VW Touran-imut, tamarmik arfineq-marlunnik ilaasoqarsinnaasunut, assersuunneqarsinnaavoq. Navorili nutaanermini allanit marlunnit taaneqartunit affaasa missaannik akikinneruvoq. Nunatsinni akiata 240.000 koruunit ataatilaarsimavai.

- Biili akisuallaanngilaq, taamatullu akilik amigaatigisimavarput, Palle Frederiksen oqarpoq, taassumalu Navor E5 Deres Autop saavani ussassaarutitut nittarsaappaa.