Kujallermi imigassamik aalakoornartulimmik tuniniaaneq ammaqqipallanneqarmat meeqqat sumiginnarneqartut UNICEF-ip Kalaallit Nunaanni immikkoortortaqarfiata oqaatigaa

Imigassamik aalakoornartulimmik inerteqquteqalerneq ulluinnarni toqqissisimanerulernermik kinguneqartoq Kujataani meeqqat inuusuttullu oqarsimapput. Taamaammat kommunalbestyrelsip imigassap aalakoornartullip tuniniarneqaqqilernissaanik aalajangiinerani meeqqat neriorsuutaat pingaartinneqanngitsut UNICEF Kalaallit Nunaanni isornartorsiuivoq.

Kommunimi imigassamik aalakoornartulimmik tuniniaaneq ammaqqinniarlugu Naalakkersuisunut qinnuteqartoqassasoq Kommune Kujallermi kommunalbestyrelsi aalajangerpoq.
Saqqummersinneqarpoq

Meeqqat inuusuttullu imigassamik aalakoornartulimmik tuniniaanerup matuneqarnerata kingorna ulluinnarni inuunertik qanoq toqqissisimanarnerulersimasoq Qaqortumi Meeqqat Inuusuttullu Ataatsimeersuarneranni ulluni marlunni oqaluttuarput.

Maanna kommunalbestyrelsimi amerlanerussuteqartut imigassamik aalakoornartulimmik tuniniaanerup sapinngisamik piaarnerpaamik ammaqqinneqarnissaat Naalakkersuisut qinnuigissallugu aalajangerput.

Aalajangerneq UNICEF Kalaallit Nunaannit isornartorsiorneqarpoq, Naalakkersuisullu taamaatitsiinnarnissaq attatiinnarneqassasoq kajumissaarneqarput.

Tamanna UNICEF Kalaallit Nunaannit tusagassiuutinut nalunaarummi allassimavoq.

Meeqqat imigassamik aalakoornartulimmik tuniniaanerup matuneqarneraniilli toqqissisimanerminnik annaasaqannginnissartik kissaatigalugu, angajoqqaallu nerisassanut atisanullu aningaasaateqarnerulersimasut ataatsimeersuarnermi ilaatigut oqarput.

UNICEF naapertorlugu „siunissami toqqissisimanissarput inersimasut pisariaqartitaanniit pingaarneruvoq“, meeqqat inuusuttullu Qaqortumi ataatsimeersuarneranni Tusaalaartugut Paasilaartugut!-mi taama oqarput.

Meeqqat tatiginninnerat kipitinneqartoq

Juulli sioqqullugu imigassamik aalakoornartulimmik tuniniaaneq ammaqqippat meeqqat inersimasut qanoq imigassartortiginissaat nillialersinnaanerallu nakuusersinnaanerallu annilaangagigamikku angerlarsimaffimminni nakkutiginnittuusariaqarsinnaapput. Meeqqat eqqissineq taannarpiaq pigiinnarniarlugu qinnutigaat, UNICEF allappoq.

- Meeqqat inersimasut imigassartoraangata qanoq toqqissisimajunnaartarlutillu nakuuserfigineqartarlutillu sumiginnagaasarlutik oqaluttuartarnerat alianartorujussuuvoq, taamaakkaluartoq kommunalbestyrelsimi amerlanerussuteqartut imigassamik aalakoornartulimmik tuniniaaneq piaarnerpaamik ammaqqikkusuppaat, UNICEF Kalaallit Nunaanni suliniutinut pisortaq Tina Dam oqarpoq.

Inersimasut imerusuttorujussuunerat pissutigalugu meeqqat tusarliussaminnik sumiginnarneqarmata tatiginninnerat kipitinneqartoq taanna oqarpoq.

- Sooq tusarnaanngikkigullu oqariartuuteqassappat? Meeqqat kommunip qanoq illersorumaaraatik suli paasisariaqarpaat.

Naalakkersuisut iliuuseqartariaqartut

Kommunalbestyrelsi tusarniaanermut akissutinik meeqqallu innersuussutaannik qanoq pingaartitsisimanertik tamanut saqqummiuteqqullugu meeqqallu siunnersuutit suut qaqugukkullu piviusunngortinniarneritsik toqqaannartumik aperineqaqqullugit UNICEF Kalaallit Nunaannit kajumissaarneqarpoq.

Meeqqat pillugit isumaqatigiissut naapertorlugu aalajangiinerni tamani meeqqat pitsaanerpaamik atugaqarnissaat pingaarnertut eqqarsaatigineqartariaqarpoq, aamma meeqqanut sunniuteqartussani meeqqat isumaat eqqarsaatigineqartariaqarput.

Meeqqat illersuiniaqatigiiffiata kommunalbestyrelsip aalajangernera akerlerilluinnarpaa, pilersaarullu ersarissoq suli piviusunngortinnagu meeqqallu qanoq illersorneqarumaarnertik pillugu akissutissarsineqannginnerani ammaqqinnissamik qinnuteqartoqarnera illersorneqarsinnaanngitsoq isumaqarput.

Nuna tamakkerlugu unammillernartuusoq Kommune Kujallermi borgmesterip siuttuuffigigaa, taamatuttaarlu Naalakkersuisut borgmesterillu tamarmik iliuuseqaqqullugit kajumissaarneqartut UNICEF Kalaallit Nunaanni allappoq.

Powered by Labrador CMS