Naleraq aningaasanut inatsisissamut isumaqatiginninniarnermi piumasaqaateqartoq
– Danskit naalakkersuisooqatigiinnissamut isumaqatigiissut malinnissaanut suleqatiginnikkusunngippata, aningaasanut inatsimmut akerliulluta taasinissamut piareersimavugut. Neriuppugut piumasaraarpullu naalakkersuisooqatigiinnermut atsiornikkut neriorsuutit oqaasiinnaagatik aningaasalerneqarlutik malitseqassasut, Qarsoq Høegh-Dam taama oqarpoq. Taanna ullut marluk matuma siorna, Aningaasaqarnermut Naalakkersuisumik isumaqatiginninniariartorpoq.
Naleqqap Folketingimut ilaasortaatitaa, Qarsoq Høegh-Dam (saamerleq) Danmarkimi aningaasarsiornermut ministermiti Peter Hummelgaardimit (talerperleq) aningaasatigut inatsisissamut isumaqatiginninniarnissamut pisoq sioqqullugu ataatsimiigiaqquneqarpoq.
Assi: Naleraq
Danmarkip aningaasanut inatsisissaa pillugu isumaqatiginninniarnerit suli ingerlapput, ilaatigut Folketingimi ilaasortat Atlantikup Avannaaniit peqataaffigaat.
Naleraq aningaasaqarnermut ministerimit Peter Hummelgaardimit isumaqatigiinniarnissamut ullualuit matuma siorna aggersarneqarpoq, kingorna naalakkersuisooqatigiinnissamut tunngavissami neriorsuutigineqartut aningaasaliiffigineqarnissaat qulakkeerneqarnissaanik Qarsoq Høegh-Dam aningaasanut inatsisissamut isumaqatigiinniarnermi allanngortinneqarsinnaanngitsunik piumasaqaateqartoq partii tusagassiuutinut nalunaarummi allappoq.
- Danskit naalakkersuisooqatigiinnissamut isumaqatigiissut malinnissaanut suleqatiginnikkusunngippata, aningaasanut inatsimmut akerliulluta taasinissamut piareersimavugut, Qarsoq Høegh-Dam taama oqarpoq.
Naalakkersuisooqatigiinnissamut tunngavissami neriorsuut
Qarsoq Høegh-Dam ukioq manna juunimi naalakkersuisooqatigiinnissamut tunngavissami neriorsuutigineqartunut tulliuttunut toqqaannartumik innersuussivoq, tassani allassimavoq:
Naalakkersuisut sulissutigissavaat, Kalaallit Nunaanni suliassaqarfiit suli kalaallinut oqartussasunut angerlaanneqarsimanngitsut ullutsinnut naleqqussarneqarnissaat piffissamut matumunnga naleqqussarneqassasoq, piffissami naalakkersuisuusut atuunneranni – kalaallit oqaasii kulturiallu ataqqillugit
Qarsoq Høegh-Dam naapertorlugu Kalaallit Nunaannut tunngasunut isumaqatigiissutit aningaasalersorneqarnissaasa qulakkeerneqarnissaa pingaaruteqarluinnarpoq.
- Kalaallit Nunaannut aningaasaliissutinik pisariaqartitsiffiusut toqqaannartumik tikkuarsinnaaniassagatsigit aningaasalersuinermut tunngasut kisitsisillu aningaasaqarnermut ministereqarfimmeersut pingaaruteqarluinnarput. Suliassaqarfiit danskit akisussaaffigisaat pitsanngorsarneqarlutillu aningaasalersorneqartariaqarput. Taamaammat paasissutissat taakku aamma erseqqissumik akissutit pisariaqartippagut.