Blokki aserfallassimasoq nutaaliorluni iluarsaanneqassasoq
Iluarsaassineq nutaaliorluni misilerarneqassaaq. Najugaqartut amerlanersaat periuseq nutaaq atorlugu iluarsaassinerup nalaani inissiamut allamut nuunneqartariaqaratik iniminniiginnarsinnaassapput.
Blok 2-p silami iigatoqai peerneqartassapput, aammalu taluinut qalliutit nutaat tamakkiisumik ikkunneqartassallutik.
Assi: Naalakkersuisut
Nuummi Blok 2-mi iluarsaassinermut atatillugu Namminersorlutik Oqartussat periuseq nutaaq misilernialerpaat. Inissiat pisoqaavallaartut iluarsaanneqarneranni inoqutigiit tamangajammik najukkaminniiginnarsinnaanissaat periarfissaassooq.
Blok 2 1968/69-mi sanaajusoq, aammalu ilaqutariinnit 44-nit angerlarsimaffiusoq qanganitserpoq. Qaliata, matuisa, igalaavisa taluisalu ussiinnerat peqqutaallutik illup silataata qalliutai annertuumik iluarsaanneqartariaqalersimasut Naalakkersuisut tusagassiutinut nalunaarummi allapput.
Taamatut suliaqarnermi nalinginnaasumik najugaqartut tamarmik inissianit nuutsinneqartariaqartarnerat maannamut unammilligassat annersarisimavaat. Tamatumalu naammassinissaa ajornakusoortarpoq, inissiat inoqanngitsut, inisseeqqinnermut atorneqarsinnaasut amerlassusaat killeqarmata Naalakkersuisut paasissutissiipput.
Blok 2-p iluarsartuunneqarnerani illup silataata qalliutai tamarmik – talui, matui igalaavilu ilanngullugit – sanaartornermi atortunik piareeriikkanik toqqaannartumik taarsersorneqarnissaat Taasinge Elementer A/S suleqatigalugu sanariaaseq nutaaq misilerarneqassaaq.
- Illup qalliutai tulleriiaarlugit taarsersorneqassapput: Silami iigatoqqat peerneqartassapput, aammalu taluinut qalliutit nutaat tamakkiisumik ikkunneqartassapput. Taamaallaat inoqutigiit arfinillit allamut inissikkallarneqassapput, taakku isaariaat piffissami sivikitsumi sunnerneqartussaammata, Naalakkersuisut nassuiaapput.
