Immap, sikup oqaluttuarisaanerullu akornanni

Imarsuaq taassumunnga tassaaginnanngilaq suliffik. Tassaavoq angerlarsimaffia.

Inuuneq silamit, pinngortitamit piniarnermillu aqunneqartoq toqqarpaa. Inuuneq inuusuttuullunili inuunererusullugu nalunngereersimasani.

Meeqqat atuarfianni atuarunnaajaarpoq. Imaanngilaq aallutassaminik amigaateqarami, kisiannili inuunererusutani nassaarigamiuk; aalisartuuneq piniartuunerlu.

Jonas Kristensen 45-nik ukiulik Innaarsunni, Upernavimmit avannamut 40 kilometerit missaanni ungasitsigisumiittumi, inunngorpoq. Eqqaamasai siulliit tassanngaanneerput.

Nunaqarfimmi piniartutut inuunermit aalisartutut inuunermut allanngoriartorfiusumi peroriartorpoq. Ilaatigut ataatani aalisartuullunilu piniartuusimasoq takugamiuk allanngorneq nammineq misigaa.

- Ataataga qisummik pujortuleeraqarpoq. Nunaqarfik uummaarillunilu inuit amerlanersaat aalisartuullutillu piniartuupput, Jonas Kristensen, qatanngutigiinni tallimaasuni peroriartortoq, oqaluttuarpoq. Angutaa aalisartuunermik inuuniuteqartoq arnaa angerlarsimalluni ilaqutariinnik isumaginnittuuvoq.

Taamaammat piniartutut inuuneq taassumunnga takornartaanngilaq. Taamaakkaluartoq Kullorsuarmut nuunnini kulturimut nammineq inuuffigisaminut isiginnittaatsiminik allannguissutigingaarpaa.

- 20-nik ukioqarlunga Kullorsuarmut nuuppunga, tassanilu piniarnermi ileqqutoqqat ulluinnarni suli atorneqartarnerat paasivara, taanna oqaluttuarpoq.

Ukiukkuinnaq qaleralinniartoqartarpoq. Qajartorluni qilalugarniartoqartarpoq, ukiukkullu qamuteralaat pinnagit qimussertoqartarpoq.

- Tassani piniartut ilisimasaqarluarnerat, aammali ilisimasat qanoq tammariataarsinnaatiginerat paasivara.

Assiliivik sakkoralugu

Jonas Kristensen piniariartilluni assiliisarlunilu videoliortalerpoq. Assiliisartuunissani pinnagu, inooriaatsinili kulturilu ilisarisimanerulerniakkani oqaluttuariniarlugit.

- Pinngortitaq avatangiiserisara, umiatsiarlunga angalaffigisakka pisakkalu assilisarpakka, taanna oqarpoq.

Jonas Kristensenip aamma nannunik pisaminik naapitsinini, qajartornini qimusserninilu assilisarpai. Uumasunik assigiinngitsunik soorlu qilalukkanik, aavernik nannunillu pisaqarnini assilisarpai.

Ulluinnarni pisartut kingusinnerusukkut allanut oqaluttuarisinnaajumallugit toqqorusutani.

- Aallaqqaammut maani inuuneq piniartarnerlu qanoq ingerlanersut ataatannut takutikkusukkakku assiliisarpunga, taanna oqaluttuarpoq.

Kullorsuarmi piniarnermut tunngasut, ileqqutoqqat periaatsillu nammineq ilinnialersimasani takutippai.

Ilaquttanut takussutissiinertut aallartittoq annertunerusumik ineriartorpoq. Ilisimasat pigisani kinguaariinnit ingerlatitseqqiisunit annaaneqannginnissaat qulakkeerusuppaa.

Qujamasuutigineqartoq

Assiliivik ullumikkut eqqaamasassanut atuinnarunnaarpaa. Ingerlatitseqqiinermut aamma atulerpaa.

Piniartutut inuuneq, periusitoqqat ukiullu ingerlanerini ilisimalersimasani oqaluttuariartorlugit illoqarfiit nunaqarfiillu tikeraartarpai. Siornatigut qanoq piniartoqartarsimaneranik oqaluttuarnissaq pineqaannanngilaq, aammali ilisimasat taakku sooq ullumikkut suli pingaaruteqarnersut takutinneqartarpoq.

Piniariaasitoqqat pillugit oqaluttuarniarluni kiisalu assilisani videolianilu takutinniarlugit illoqarfiit nunaqarfiillu tikeraaraangagit inuusuttut utoqqaallu soqutiginnittarput, qujamasuutigineqarninilu taamaattussaannartut isiginngilaa.

- Utoqqaat ilaat killitsillutillu qujaniarlutik ornittarpaannga. Piniariaasitoqqat qangali puigorneqarsimasut isumaqarsimagaluarput, Jonas Kristensen oqaluttuarpoq.

Piniartut ilisimasaat sumiginnarneqartut

Jonas Kristensen pissutsinut atuuttutunut akuersaaginnartuunngilaq. Apeqquteqakulasarlunilu inuiaqatigiinni malittarisassat piniartuunermini misigisimasaminut qanoq naapertuunnersut eqqarsaatigikulasarpaa.

Tamanna ilaatigut qimminut qimuttunut isiginnittaasiani erserpoq. Taassumunngami ummaasuinnaanani nunaqarfinni nunatta avannaaniittuni piniartuunermi pingaaruteqarpoq.

- Taamaammat qimmit qimuttut pingaaruteqassusiat eqqarsaatigalugu immikkut inatsisiliortariaqartut isumaqarpunga, Jonas Kristensen oqarpoq.

Eqqarsaatini arlaleriarluni aalajangiisartunut ingerlateqqinniartarpai. Nuummiikkaangami politikerit oqaloqatigiumallugit ilaatigut ornittarsimavai.

Soqutiginninngikkaangatali tunuartarpoq.

Jonasimi uummammiorpassuaqaraluarluni tusarnaarneqanngikkuni oqalunniinnartartuunngilaq.

Imaanngilarli isummani allanngortikkai.

- Piniartut inuunerminni atugaat aalajangiiffigineqaraangata ilisimasaat sumiginnarneqartartut suli malugisarpara, taanna oqarpoq.

Inuit inuunertik tamaat imarsiorsimasut, sikusiorsimasut pinngortitamiissimasullu inatsisini allassimasuni atuarneqarsinnaanngitsunik misilittagaqarput, taanna eqqarsartarpoq.

Taamaammat Jonasip tusarneqarnissani aamma pingaartippaa. Pniartutuinnaanngitsoq, inuttulli ilisimasallitut innuttaaqatigiinnut siunnersiuinngikkunik annaaneqarsinnaasunik ilisimasalittut.

Nangit pisallu umiatsiami ataatsimi

Taassumunnga piniartutut inuuneq ilaqutariittut inuuneq aallartippat unitsikkallarneqartussaanngilaq. Panini mikisuusoq piniariarluni ilagisarpaa. Aamma nangermik taarsiisoqarlunilu immuttortitsisoqartariaqarpoq. Piniartuuneq ilaqutariittullu inuuneq ataqatigiissinneqartariaqarput.

Tamanna aamma Jonasip silarsuarmut isiginnittaasianik ersersitsiinnarunarpoq. Taassumunnga inuuneq, pinngortitaq piorsarsimassuserlu imminnut atalluinnarput. Piniartuunermik oqaluuserinnikkaangami kinguaariit arlallit kingumut eqqarsaatigigajuppai. Nammineq misilittakkani kisiisa tunngaviginagit aammali ilisimasat kinguaariit ingerlaneranni ingerlateqqinneqartarsimasut tunngavigisarpai.

Kalaallit Nunaata pinngortitaa atuakkanit uumassusililerinermillu misissuinernit paasineqarsinnaanngitsoq taanna isumaqarpoq. Inuit inuunertik tamaat pinngortitap atugassarititai malillugit inuusimasut, allanngoriartorneranik malinnaasimasut, taassumalu pissusiinik ilinniarsimasut aamma tusarnaartariaqarput.

Taanna naapertorlugu ilisimasaqarneq tamanna Kalaallit Nunaata paasinissaanut taamatulli pingaaruteqartigaaq.

Taassumunnga kinguaariit siuliisa pilersissimasaannik attassinissamut tunngassuteqarpoq. Piorsarsimassuseq taanna inuillu tamatuminnga ingerlatitseqqiisut peqanngippata ullumikkut inuunavianngikkaluarpugut.

Assitigut videotigullu oqaluttuariinnarneqassanngilaq. Nammineq misigisariaqarpoq.