KL

DK

Jeff Landry Avannaata Qimussersuinut kiisami immaqa isiginnaariassagunartoq 

Amerikamiut nuimasut Avannaata Qimussersuanukarniarlutik ukiuni kingullerni marlunni tikilluaqqusaaneq ajorput. Aappaaguli Avannaata Qimussersui Trumpip nunatsinnut immikkut ittumik aallartitaanit, Jeff Landrymit, isiginnaarneqariannaapput. Qasigiannguani takornariartitsiviup, Experience Qasigiannguit, Kristian Jeremiassenimit pigineqartup KNQK aperaa, Avannaata Qimussersui Jeff Landrymik isiginnaariarneqarsinnaanersut. 

Jeff Landry maajimi Nuummiikkami naapitanut ilaavoq Nuup Kommunerisimasaani borgmesteriusimasoq Nikolaj Heinrich.
Arnaq Nielsen Arnaq Nielsen tusagassiortoq
Saqqummersinneqarpoq

Pingajussaanik iluatsittarpoq. Taama oqariartaaseqartoqarpoq. Oqariartaaserlu taanna Avannaata Qimussersuanut amerikamiunullu atassusissagaanni Avannaata Qimussersui amerikamiumit nuimasumit aappaagu isiginnaarneqarataannaapput.

Qasigiannguani takornariartitsiviup ilaqutariinnit pigineqartup, Experience Qasigiannguit, Jeff Landry Qeqertarsuarmi aappaagu Avannaata Qimussersui isiginnaariarsinnaanerai KNQK aperaa. Experience Qasigiannguit Inatsisartunut ilaasortamit Kristian Jeremiassenimit pigineqarpoq.Sukkaniunneq ukiut pingasukkaarlugit Avannaata Qimussersuinik taaneqartarpoq. Taaguut taanna atorneqartarpoq Tunumeersut Qaanaameersullu peqataagaangata.

- Soqutigivaa. Takornariarnissani soqutigivaa, aamma attaveqarnerput akunnitsinni ingerlaqqilernikuuvoq, USA-mik isumaqatigiissuteqarnitta kingorna, Kristian Jeremiassen taama oqarpoq. 

Taassuma Jeff Landry siullermeernerluni Avannaata Qimussersuanut isiginnaariartinniarlugu suliniuteqalinngilaq. Ukioq mannami isiginnaariarsinnaanersoq KNQK-mut attaveqarnikuugaluarpoq, KNQK-lli isiginnaariarnissaa akuerinngilaa. 

Koorput qimussillu 

Kristian Jeremiassen Jeff Landrylu nunatta USA-llu akornanni silaannaq najummitsisimanarseruttortoq ukioq attaveqatigiilerput. Landryp Jeremiassen Louisianami koorput festivaliannut qaaqqugaluarpaa, aappaatalu Avannaata Qimussersuariartinniarsarigalualugu. 

Sisimiuni Avannaata Qimussersua siorna 2025-mi USA-mi præsidentip tullersortaata JD Vancep nulianit Usha Vancemit isiginnaariarneqartussaagaluarpoq. Isornartorsiuisulli peqqutaallutik aappariit Pituffimmukaannarput.

Jeff Landry ukioq manna Qasigiannguanut Avannaata Qimussersuariarnialersaaraluarpoq, aamma tikilluaqqusaanani.

Nunarput, Danmark USA-lu septembarimi isumaqatigiissuteqareersullu Jeremiassenip Landry attavigeqqilerpaa. Ukioq mannalu qimussersuaqarneranut tikilluaqqusaanngikkaluartoq KNQK-mut aperinissaminut avaarsimanngilaq. 

- Avaassutissaqanngilagut. Inuiaassuserput uagut saqqummiukkusupparput, aamma kalaallisut oqaaseqaratta.  

Nunatta USA-llu akornanni silaannaq qatsortuusinikuummat aamma tunngavilersuutigaa.

- Assortuussutaaruppugut, taamaammat nuna pissaanilik suleqatigisariaqarparput, taanna oqarpoq.

KNQK Kristian Jeremiassenip apeqqutaanut qanoq isummernersoq paasiniarlugu attavigigaluarparput iluatsinnaguli.

KNQK Jeff Landry isiginnaariarsinnaanersoq isummersimaleriarpat attavigeqqissallugu Kristian Jeremiassen Sermitsiamut ilisimatitsivoq.

avannaata qimussersua experience qasigiannguit kristian jeremiassen jeff landry knqk inuiaqatigiit

Atorfiit tamaasa takukkit

PODCASTI

Powered by Labrador CMS