Ussassaarut

Pinngitsaaliissummik angerlarsimaffiup avataanut inissitat tapersersorniarlugit attortinnartumik aaqqissuussisoqartoq

Jaaku & Trio Danmarkimi pinngitsaaliissummik angerlarsimaffiup avataanut inissiisoqartarnera pillugu erinarsuusiorsimapput.

Jaaku & Trio tallimanngornermi tapersersuiniarlutik erinarsuusiartik Aalborgimi Kalaallit Illuanni tusarnaarterngaarpaat. Talerperlermiit Jaaku, Steffie Kristensen aamma Gitte-Anna Biilmand.

Assi: Jesper Hansen

Jesper Hansen Jesper Hansen Nammineq suliaqarluni Tusagassiortoq

Saqqummersinneqarpoq 14. Novembari 2026 - 13:20

Ualeq tusarnaariartunut aaqqissuisunullu qulliliffiullunilu attortisimaffiuvoq, Aalborgimi Kalaallit Illuat kalaallinut anaanaasunut Danmarkimi najugaqartunut qitornaminnillu pinngitsaaliissummik arsaagaasimasunut tapersersuiniarluni aaqqissuussinermik ingerlatsiffiummat.

Qullilisut ikigisassanngillat, anaanaasut pingasut qitornaminnik pinngitsaaliissummik arsaagaasimanertik pillugu eqqugaasimanertik qanoq artornartiginersoq pillugu saqqummiussimmata. Anaanaasut taakku ilagaat Keira Kronvold, taanna oqaluttuassartani pillugu Sermitsiami atuartartunik avitseqateqarnikuuvoq allaaserisani arlalissuarni, aviisip ukiuni kingullerni marlunni taanna pillugu allaaserinnitarneratigut.

Ussassaarut

Aaqqissuussaq annertooq taanna ammarneqarpoq taamatut aaqqissuussisoqarnissaanik isumassarsisuusut ilaat Gitte-Anna Biilmann aamma Jacob Johansen (Jaaku) aallarniisoralugit, taakkulu aallartinnerminni tusarnaariartunut kaammattuuteqarput ilaqutariit eqqugaasimasut ataqqiniarlugit minutsimik nipaallisimaqatigiittoqassasoq.

Keira Kronvold aliasuuteqarnini Aalborgimi Kalaallit Illuanni tusarnaarianut avitseqatigivaa.

Tapersersuilluni erinarsuusiaq

Gitte-Anna Biilmand, Jaaku aamma Steffie Kristensen (Lalou) tassaapput erinarsorlutillu nipilersoqatigiit Jaaku & Trio, taakkulu erinarsuusiaq tapersersuinerminnut tunngatitaminnik Ajugaassavoq-mik suliaqarsimasut.

- Erinarsuummi ukkatarineqarpoq kalaallit meerartaat, pinngitsaaliissummik angerlarsimaffiup avataanut inissinneqartarnerat, aammalu ilaqutaat, avissaartitaanermik misigisimasut. Erinaq asanninnermik, aliasunnermik, neriunnermik tusaaneqarnissamillu ilungersuutiginninnermik imaqarpoq, Gitte-Anna Biilmann nassuiaavoq.

Ussassaarut

- Kulturikkut assigiinngissuteqarneq, ilaqutariit pisinnaatitaaffii aammalu kalaallit ilaqutariit Danmarkimi aaqqissuussaanermik naapitsisarnerannut tunngasut inuiaqatigiinni oqallisissaapput pingaaruteqartut.

- Nipilersuummi qitiutinneqarpoq Kalaallit Nunaannut asanninneq. Taamaattorli nipilersugaq eriarsugarlu aqqutigalugu kalaallit danskillu kulturiisa akornanni ikaartarfileerusuppugut.

Ualeq taanna Aalborgimi aaqqissuussaq tusarnaartitsinermik annikinnerusumik naggaserneqarpoq, tassanilu Ajugaassavoq siullermeertumik tusarnaartinneqarpoq. Tusarnaariallu erinarsugaq naammassimmat nikuillutik ersaartaapput.

Anaanaasunut ilaqutaasunullu pinngitsaaliissutaasumik arsaarinnittoqarnerani eqqugaasimasunut tapersersuilluni erinarsuusiortoqarnissaanik Jaaku (Johansen) isumassarsisuuvoq.

Ataatsimoorluni erinarsugaq

Tusarnaartitsineq naammassineqarpoq Jørgen Fleischer-ip erinniorlugulu taalliaa Takuat Paninnguaq ataatsimoorluni erinarsorneqarneratigut aammalumi pissusissamisoormat Ajugaassavoq ataasiarluni tusarnaartitsissutigineqaqqippoq.

Aaqqissuussami inuit 70-it missaannik amerlassusillit najuukkiartorsimapput, aaqqissuussinermilu kaffisugassaqarlunilu kalaallit kaageeraannik palaannguanillu sassaallertoqarpoq. Aaqqissuussarlu tamarmi akeqanngilaq.

- Nammineerluta kaasarfitsinniit suna tamaat akilernikuuarput – aningaasaliiumasimasorli ataasinnguaq 1.500 koruuninik tapersiissuteqarpoq, taassumalu saniatigut ilaquttat ikinngutillu ikiuuttut imaaginnavinnikuupput. Taamaaliorpugut isumaqaratta, angerlarsimaffiup avataanut pinngitsaaliissummik inissiisoqartarnera pillugu eqqumaffiginninnissaq pingaaruteqarmat, Gitte-Anna Biilmann nassuiaavoq.

Ajugaassavoq aamma YouTube-mi Spotify-imilu tusarnaarneqarsinnaavoq.

Pisartagaqarneq

Allaaserisaq tamaat atuarniarukku atuisunngortariaqarputit! Iserit!

Sermitsiaq.gl – Nittartagaq

Sermitsiaq.gl-imi allaaserisat tamakkiisumik atuarsinnaalissavatit
Qaammammut kr. 59.00
Ukiumut kr. 650.00

ATUISUNNGORIT

Asasarput atuartartoq, Sermitsiaq.gl-imut – Kalaallit Nunaanni nutaarsiassanik isornartorsiuisumillu tusagassiornermik saqqummiussiffimmut – tikilluarit. Kiffaanngissuseqarluni tusagassiornerup siuarsarneqarneranik suliniuteqartuarsinnaajumalluta, itisiliillutalu isornartorsiuilluta tusagassiortuarsinnaajumalluta, allaaserisat aalajangersimasut akeqalersippavut. Tamanna iluaqutigalugu allaaserisat pitsaassusaat qulakkeersinnaavarput, tusagassiortuttalu pikkorissut oqaluttuanik pingaarnerpaanik saqqummiussinissaannut tapersersorsinnaavavut. Allaaserisat akillit qaammammut taamaallaat 59 koruuninit akeqarput. Pisineq ajornanngitsuararsuuvoq – ataaniittoq toorlugu saqqummiussavut tamakkiisumik iserfigisalersinnaavatit. Paasinninnerit tapersersuinerillu qujamasuutigaavut. Pituttorsimanngitsumik isornartorsiuisumillu Kalaallit Nunaannut tusagassiortarnissamik suliniuteqartuarnissamut akiliutivit ikiorpaatigut.