Mingutsitsinngitsumik innaallagissiorfiit Nuummi 2024-mi amerlasuut ikkussuunneqartut
Nukissiorfiit Nuummi 2024-mi kissarsuutit uuliatortut taarsersorlugit kissarsuutinik innaallagiatortunik katillugit 16-inik ikkussuipput. Taakkunanit 15-it atulereerput. Ungasianiit kiassarnermut atuilernermi uuliamik ukiumut 552.904 literimik sipaaruteqartoqartassaaq.
Nukissiorfiit.
Arkivfoto: Leiff Josefsen
Nuummi illunik kiassaanermi minguitsumut nuukkiartorneq 2024-mi sammineqarpoq, kissarsuutinillu uuliatortut taarserlugit kissarsuutit innaallagiatortut katillugit 16-it Nukissiorfiit ivertiterpai.
Nukissiorfiit Facebookimi quppernermini allappoq.
Kissarsuutit innaallagiatortut erngup nukinganik nukissiorfimmiit Utoqqarmiut Kangerluarsunnguaniittumit pilersorneqarput, taamaalillunilu kissarsuutit uuliortortut atorunnaarlugit ungasianiit kiassarneqalernissaq qulakkeerneqarluni.
- Tamanna piffissamut ungasissumut isigalugu CO2-mik 1462,6 tonsinik ukiumoortumik annikillisaanermik nassataqassaaq. Tamatuma assigaa ukiumut uuliamik 552.904 literimik sipaaruteqarneq, Nukissiorfiit allappoq.
Alliliinissamut piareersarneq
Kissarsuutinik innaallagiatortunik atuilerneq engup nukinganik nukissiorfiup Utoqqarmiut Kangerluarsuannguaniittumut alliliinissamik Nukissiorfiup piareersarneranut ilaavoq. Allineqarnera piareerpat erngup nukinganik nukissiorfimmit sarfaq sinneqartussaassaaq, taannalu Nuup naatsorsuutigisatut alliartornissaani pilersuinermut atorneqarsinnaavoq, taamaalillunilu nukissamik minguitsumik nukissamik ilalersuisoqassaaq.
- Taamaalillutik kissarsuutinik innaallagiatortunik taakkuninnga 16-inik ivertiterinerit siunissami suli minguinnerusumik pilersuinissamut aqqutissiueqataapput. Tamanna ilaatigut Hotel Sømami, Iserit’mi, aamma INI-p inissiaataani aamma oqaluffinni kissarsuutinik innaallagiatortunik ivertiterinernut tunngavoq, allasismavoq.
- Minguitsumut nuukkiartornermut innaallagissamut aqqusersuiffiusinnaasut aalajangiisuni ilaapput. Taamaattumik inuussutissarsiorfimmi atuisartut arlallit kissarsuutimik uuliatortunik kissarsuummik innaallagiatortunik taarsersuinissartik pillugu Nukissiorfinnik suleqateqarsimanerat nuannaarutigaara.
Ilulissat tullinnguuttoq
- Suliffittut pilersuisarfittut minguitsumut nuukkiartornermi pingaarutilimmik inissisimaffeqarpugut, taamaattumillu Nuuk piinnarnagu illoqarfinni allani innaallagissamut aqqusersuiffigisassatut suliniutinik 2025-mi aamma sammisaqassaagut, nukissiornermut pisortaq Johan Danielsen oqarpoq.
Kissarsuutini innaallagiatortuni 16-init ikkussuunneqartuni 15-it atulereerput, taakkulu saniatigut Nuummi tallimanik suli ivertitsisoqassaaq. Ilulissani innaallagissamut aqqusersuiffiusinnaasunik qulaajaanissaq pillugu suliniut aallartisarneqarpoq, tamannalu 2025-mi Nukissiorfiit sammisassaani ilaavoq.
