Najannguaq Berthelsen, 26-nik ukiulik Sisimiuneersoq, sisamanngornermiit Tyrkiami Antalyamiippoq, tassani FN-ip silap pissusia pillugu ataatsimeersuarnera COP31 ukioq manna peqataaffigaa.
Sermitsiap Istanbulip mittarfianiit angerlamut ingerlatillugu sianerfigaa.
Najannguaq Berthelsen, 26-nik ukiulik Sisimiuneersoq, sisamanngornermiit Tyrkiami Antalyamiippoq, tassani FN-ip silap pissusia pillugu ataatsimeersuarnera COP31 ukioq manna peqataaffigaa.
Sermitsiap Istanbulip mittarfianiit angerlamut ingerlatillugu sianerfigaa.
- Ullut ulapaarfiupput. Inuit amerlaneri iiaamminaraluarpoq. Taamaakkaluartoq isumassarsinarluarpoq, taanna oqaluttuarpoq.
Najannguaq Berthelsen silap pissusia pillugu ataatsimeersuarneranut pernaammik peqataavoq. Norgemi silami sammisaqartitsinermik ilinniartuuvoq, maannakkulli ukiumik ataatsimik atuanngiffeqarluni. Inuusuttut suliniaqatigiiffianni ’Overseas Countries and Territories (OCT) Youth Network’-imi peqataasarluni piffissaq taanna ilaatigut atortarpaa. taanna EU-p ingerlatsiviisa assigiinngitsut aamma nunanit nunallu immikkoortuinit arlalinnit inuusuttut attaveqatigiinnerisa nukittorsarneqarnissaat siunertaralugu EU-p aningaasaliiffigisaani suliniutaavoq 2022-mi aallartinneqartoq.
Uanga nammineq aalisartunit kingoqqisuuvunga, Kalaallit Nunaannilu silap pissusiata allanngoriartornerata kinguneri siunissami malugilerpavut. Aamma uagut inuusuttuusugut ukiut arlallit qaangiuppata kinguneri atussavagut, aamma silap pissusiata allanngoriartornerata unammillerneqarnerani iliuuseqartariaqarpugut
Najannguaq Berthelsen, 26-nik ukiulik, Kalaallit Nunaanniit COP31-mut inuusuttunut sinniisoq
Tamakkua ilagaat Sint Maarten, Ny Kaledonien – aamma Kalaallit Nunaat.
- Inuusuttut arlallit oqaloqatigaakka, ilaatigut Sint Maartenimeersut arlaleriarlutik peqataasimasut oqaluttuarput, Najannguaq Berthelsen peqataanermini sulerisimanersoq Sermitsiap aperimmani oqarpoq.
Silaannaap pissusianut periusissiat ataavartumillu attaveqatigiinneq
Attaveqatigiinnermut peqataanermi saniatigut OCT Youth Networkimeersut inuusuttut peqatigalugit novembarip 16-iani oqallinnermut peqataavoq. Inuusuttut nunaminni silap pissusiata allanngoriartorneranut tunngatillugu ajornartorsiutit unammillernartullu eqqartorpaat.
- Uanga nammineq aalisartunit kingoqqisuuvunga, Kalaallit Nunaannilu silap pissusiata allanngoriartornerata kinguneri siunissami malugilerpagut. Aamma kinguneri uagut inuusuttuusugut ukiut arlallit qaangiuppata atussavagut, aamma silap pissusiata allanngoriartornerata unammillerneqarnerani iliuuseqartariaqarpugut, Najannguaq Berthelsen oqarpoq.
Silap pissusia pillugu ataatsimeersuarnerit silaannaap kiannerulernissaanut pinaveersaartitsinermut nunanillu silap pissusiata allanngoriartorneranit eqqugaanerpaasunik ikiuiniarnermut tunngatillugu angusaqarpiarsimannginneralugit isornartorsiorneqakulasarput. Antalyamiilli suna paasisaqarfigaajuk?
- Inuusuttut allat siornatigut peqataasarnerminni qanoq angusaqartoqarsimaneranik takunnissimanersut aperaakka. Amerlasuut COP-imi peqataasareerlutik inuiaqatigiinnut, nunanut peqatigiiffinnullu allanut pingaarutilinnik attaveqalersimallutik siunissamilu suleqatigiilersinnaallutik misigigajuttarlutik oqarfigisarpaannga, taanna oqaluttuarpoq.
Nunatsinni silap pissusianut naleqqussarnermut periusissiamik ineriartortitsineq aammattaaq erseqqissarpaa. Periusissiaq taanna Kalaallit Nunaata Parisimi isumaqatigiissummut ilanngunneraniilli 2024-mi suliarineqarpoq, piffissallu ingerlanerani aappaagu piareertussaalluni.
Najannguaq Berthelsen (talerperlermiit aappaat) kattuffiup ‘Overseas Countries and Territories’-ip inuusuttunut attaveqatigiittarfianit aallartitat allat ilagalugit.
Assi: Emma Bryckaert
- Periusissiaq tamanna nunaqavissut ulluinnarni inuunerannut qanoq sunniuteqassanersoq iluaqutaajumaarnerlu aamma aalisartunut, piniartunut inoqarfinnilu minnerusunut qanoq sunniuteqarsinnaanersoq pissangatigaara, Najannguaq Berthelsen oqarpoq.
Silap pissusia pillugu sapaatip akunnerata aappaa avillugu ataatsimeersuartoqareersoq COP31 pisortatigoortumik tallimanngornermi novembarip 20-ani naammassineqassaaq. Arlallit sapaatip akunnerata naanerani angerlamut timmisartumik aallareersut Najannguaq Berthelsen oqaluttuarpoq. Taanna Ilulissat mittarfia aqqusaarlugu Kalaallit Nunaannut utissalluni Istanbulimiittoq Sermitsiap oqaloqatigaa.
Qanoq misigivit?
- Soorlu oqaatigereeriga, angalaneq imaannaanngilaq. Tamanna sukkasuumik ingerlavoq, taanna akivoq.
- Siunissamulli isumalluarpunga, aamma inuusuttut Kalaallit Nunaanneersut siunissami ataatsimiinnerni taamaattuni peqataanissamut periarfissaqarnerulissasut isumaqarpunga.
Inuit 92.000-nit amerlanerusut COP31-mut ukioq manna peqataaniarlutik nalunaarput.
Assi: Najannguaq Berthelsen
Najannguaq Berthelsen ulluni taakkunani isumasioqatigiisitsisuni, oqallitsitsisuni attaveqatigiinnermilu aaqqissuussani assigiinngitsuni peqataavoq.
Assi: Najannguaq Berthelsen