Aalisariutaatileqatigiit nutaat pilersinneqaqqammersut
aqqaneq-marluk aalisartullu
Namminersorlutik Oqartussanut Kitaata avataani
qaleralittassiissutinik, saarullittassissutinik nataarnartassiissutinillu
naleqarluartunik qinnuteqarsimasut suli erinitsannaveersaartariaqarput.
Aalisariutaatileqatigiit nutaat pilersinneqaqqammersut
aqqaneq-marluk aalisartullu
Namminersorlutik Oqartussanut Kitaata avataani
qaleralittassiissutinik, saarullittassissutinik nataarnartassiissutinillu
naleqarluartunik qinnuteqarsimasut suli erinitsannaveersaartariaqarput.
Tassami ingerlatseqatigiiffiit sorliit
pisassiissutinik tunineqassanersut, Naalakkersuisut suli
aalajangersimanngilaat.
“Suliassaq suli suliarineqarpoq, maannakkullu qaqugu
inaarutaasumik aalajangiisoqarnissaa naatsorsuutigineqarsinnaanersoq
oqaatigineqarsinnaanngilaq, Aalisarnermut, Piniarnermut, Nunalerinermut aamma
Imminut Pilersornermut Naalakkersuisoqarfimmi siunnersorti Iben Funch Døj
Sermitsiamut mailikkut taama nalunaaruteqarpoq.
Ingerlatseqatigiiffinnut
nutaanut periarfisseerusuttut
Naalakkersuisuusimasut
siorna decembarimi aalajangerput, aalisarnermik inuussutissarsiuteqartut nutaat
aalisarnermik inuussutissarsiuteqalernissaannut periarfissinneqassasut.
Tamatuma kingorna Naalakkersuisoqarfiup avataani
pisassissutit tassaasut qalerallit 4.600 tonsit, saarulliit 1.950 tonsit aamma
nataarnat 166,6 tonsit ukioq manna februaarip arfineq-aappaanni tamanut
saqqummiuppai. Qinnuteqarnissamut killiliunneqartoq tassaalluni aprillip
30-at.
Naalakkersuisoqarfimmit pisassiissutinik
saqqummiussinermut atatillugu allapput, avataasiorluni aalisarnermi, ilaatigut
qaleralinniarnermi ingerlatseqatigiiffiit nutaat marlussuit
aalisalersinnaanissaat naatsorsuutigineqartoq.
- Qinnuteqartuni ataaseq imaluunniit marlussuit
qaleralinnik, saarullinnik nataarnanillu pisassinneqassanersut,
Naalakkersuisunit aalajangiiffigineqassasut, Naalakkersuisoqarfimmi
immikkoortortami pisortaq Katrine Kærgård Sermitsiamut juunip 17-ianni oqarpoq.
- Pisassiissutit qanoq agguaanneqassanersut suli aalajangerneqanngilaq. Naak suliap ingerlanneqarnera sivisugaluartoq, utaqqineq pilersaarutitsinnik ineriartortitseqqinnermut atorparput, Siku Trawlimi siulersuisut siulittaasuat Tsatso Efraimsen oqarpoq.
Assi: Privat
Naalakkersuisut kikkut pisassinneqarnissaannik juunip
naannginnerani aalajangiinissaat taassuma naatsorsuutigaa, aalajangiinissarli
suli pinngilaq.
- Pisassiissutit qanoq agguaanneqassanersut suli
aalajangerneqanngilaq. Naak suliap ingerlanneqarnera sivisugaluartoq, utaqqineq
pilersaarutitsinnik ineriartortitseqqinnermut atorparput.
Piginneqatigiinnit qinnuteqartunit Siku Trawlimit
siulersuisut siulittaasuat Tsatso Efraimsen Sermitsiamut taama oqarpoq.
Piginneqatigiit Sisimiuni angerlarsimaffeqarput.
Tsatso Efraimsen aalisartuuvoq kilisaatini
avataasiortuni inuttatut ukiorpassuarnik misilittagaqartoq aamma aalisarnermi
teknolog-itut, tassa diplomingeniøritut ilinniagaqarsimasoq.
Avammut tuniniaanissaq siunniunneqartoq
Tsatso Efraimsenip oqaatigaa, Siku Trawlimit Narsami
Sisimiunilu aalisartut inuussutissarsiortullu, najukkami aningaasarsiornerup
ataatsimoorluni qanoq nukittorsarneqarsinnaaneranik
oqaloqatiginnilluarsimallutik.
- Aalisakkanik avammut niuerneq ingerlatatsinni
pingaarnerpaassaaq, aammali suliniutitta inuiaqatigiinnut toqqaannartumik
iluaqutaanissaat qulakkeerniartarparput, assersuutigalugu suliffinnik
pilersitsinikkut tunisassiallu ineriartortinneqarnerisigut naleqarnerulersitsinikkut,
oqarpoq.
Siku Trawlimit qaleralittassat 4.600 tonsit, nataarnat
166 tonsit aamma saarullittassat 1.950 tonsit qinnuteqaatigineqarput. Tamakku
Sermitsiap Aalisarnermut, Piniarnermut, Nunalerinermut Imminullu Pilersornermut
Naalakkersuisoqarfimmit allagaatinik takunnissinnatitaaneq atorlugu paasivai.
- Piffissap aalisarfiusussap aallartinnissaanut maanna
piffissakilliartormat, soorunami piaartumik aalajangiisoqarnissaa
neriuutigaarput. Pisassiissutit tamakkersinnaassallugit maannakkut
naatsorsuutigaarput, aamma aalisariummik pisinissaq suli pilersaarutaavoq,
Tsatso Efraimsen oqarpoq.
Aalisariutinik piginnittuunissaq aalisartitsinissarlu
piginneqatigiit siunertaraat.
KNI-p pisortaanera Jeppe Jensen piginneqatigiit
akornanni ilisimaneqarnerpaavoq. Piginneqataasut sinneri pingasut
aalisartuupput, Tsatso Efraimsen taakkununnga ilaalluni.
Sermitsiaq.AG-p siusinnerusukkut allaaserisaatut,
suliffeqarfik ingerlalluartoq Halibut Greenland aamma ingerlatseqatigiiffik
pilersinneqaqqammersoq Avalleq, avataasiortunut aalisagartassiissutit pillugit
neqeroorummut qinnuteqartunit aqqaneq-marluusunit marluullutik ilaapput.
Avalleq soraarnerussutisiaqalernissamut
aningaasaateqarfimmit SISA-mit Naalakkersuisunullu ilaasortaasimasumit
Karl-Kristian Krusemit pigineqarpoq.
