Folketingimi partiit illersornissamut isumaqatigiissut tapersersorpaat

Folketingimi partiit USA-p, Kalaallit Nunaata Danmarkillu illersornissamut isumaqatigiissutaat sisamanngornermi novembarip aqqaneq-aappaanni siullermeerneqarmat tapersersorpaat.

Danmarkimit Kalaallit Nunaanniillu atorfilittat aallartitallu illersornissamut isumaqatigiissummik, FN-ip allaffeqarfissuani New Yorkimi septembarip 22-ani atsiorneqartumik, suliaqartut qutsavigalugit, oqaaseqartut arlallit periarfissaq atorpaat.

Isumaqatigiissut Inatsisartuni siullermeerneqareerlunilu aappassaaneerneqareermat novembarip sisamaani akuerineqarpoq.

Oqaloqatigiinnermi tamat oqartussaaqataanerat

Nunanut allanut ministeri Lars Løkke Rasmussen (M) Folketingimi aalajangiiffigisassatut siunnersuut saqqummiuppaa. Suliaq sivisuumik ingerlanneqartoq, siunissamilu qanoq pisoqarumaarnera nalorninarsimasoq, ilaatigut oqaatigaa

– Kalaallit Nunaannut pitsaasumik, Kunngeqarfik Danmarkimut pitsaasumik, USA-mut pitsaasumik, NATO-mut pitsaasumik, EU-mut pitsaasumik nunarsuarmilu aaqqissuussaanermut pitsaasumik ullumikkut isumaqatigiissuteqarpugut. Isumaqatigiissut Issittumi Atlantikullu Avannaani ataatsimoorluta illersornissatsinnik isumannaallisaanermillu nukittorsaasoq, NATO-mi sorlaqarluartoq NATO piujuarnissaanut tunngaveqartoq. Isumaqatigiissut Kunngeqarfiup kisimi oqartussaaneranik nunamilu tamarmi ataqatigiinneranik uppernarsaaqqittoq Kalaallillu Nunaata nammineerluni aalajangiisinnaatitaaneranik akuerinnittoq. Isumaqarpunga tamanna naammagilluinnarsinnaavarput.

Lars Løkke Rasmussenip aamma Inatsisartuni ilaasortat kalaallit qanimut suleqatigisimanerat, kiisalu Danmarkimi Kalaallit Nunaannilu atorfilittat nalissaqanngitsumik sulisimanerat qujamasuutigaa.

– Danmarki pitsaanerpaamik inissisimavoq. Oqaloqatigiinnikkut tamat oqartussaaqataanerat. Suleqatigiissitat. Sakkussiat atorsinnaasavut nukittunersaat. Suleqatigiinneq kinguneqarluartoq uppernarsarlugu nunarsuarmi pissaanilissuarnik sunnerniarneqarnerulersimasumi diplomatii aalajangiisuusinnaasoq.

Aalajangiineq pingaarutilik

Naaja H. Nathanielsenip (IA) oqaaseqarnermini aalajangiiffigisassatut siunnersuut oqaluttuarisaanermut pingaarutilittut taavaa.

– Siusinnerusukkut pisut pissutigalugit aamma isumaqatigiissutip Kalaallit Nunaannut Kunngeqarfiullu sinneranut kingunerinut tunngatillugu, oqaluttuarisaanermi pingaaruteqarpoq, Naaja H. Nathanielsen oqarpoq nangillunilu oqaatigalugu, killigititap qaangerneqannginnissaa aammalu oqartussaaffiit angerlaanneqarnissaannut aalajangiisinnaatitaanermik allannguititsinnginnera Inuit Ataqatigiinniit pingaartinneqartoq.

Naaja H. Nathanielsenip erseqqissarpaa "Nammineersinnaassutsitsinnik aamma kalaallit inuiaqatigiittut nunat tamalaat inatsisaat malillugu USA-p akuerinninnissaa Kalaallit Nunaannut pingaaruteqarluinnartoq. Isumaqatigiissummi avatangiisinut, kulturimut inuiaqatigiinnullu tunngasunik eqqarsaatiginninneq, inuussutissarsiornermik ineriartortitsineq NATO-milu suleqatigiinneq tapersersorneqartoq naammagisimaarpavut."

Inatsisartunut ataqqinninneq

Qarsoq Høegh-Damip oqaatigaa Kalaallit Nunaanni piffissaq eqqissiviilliorfiusoq, ilaatigut allannguiffiusoq, ilaatigut sakkutuut amerlanerusut nunatsinnut aallartinneqarnerat pissutigalugu.

– Tamanna sungiusartariaqarparput. Qujavungali danskit naalakkersuisuisa Folketingimi oqaluuserineqannginnerani illersornissamut isumaqatigiissut Inatsisartunit isummerfigineqartussatut ataqqimmassuk. Isumaqatigiissutip qanoq piviusunngortinneqarnissaa maanna suliassaq tullinnguuppoq.

Aalajangiiffigisassatut siunnersuutit marloriaannarlutik suliarineqartarput, tamannalu 19. november 2026-aappassaaneerneqarluni, aalajangiiffigineqassaaq.