Suliat kalallinut tunngasut Folketingimi ullormut oqaluuserisassaniittut

“Eqqartuussiveqarnermi inatsisit ullutsinnut tulluartuunissaat pitsaasuunissaallu pingaaruteqarpoq. Tamanna mInnerunngitsumik eqqartuussisarnermik inatsimmut atuuppoq. Eqqartuussisarnermik inatsisip aamma pinerluttulerinermik inatsisip Kalaallit Nunaannut atuuttup suliarineqarnera annertuvoq, nutarterneqarnissaalu uannut pingaaruteqartorujussuuvoq”, inatsisinik atuutitsinermut ministeri Nicolaj Wammen (S), inatsisissatut siunnersuutit tallimat L 23, L 24, L 25, L 26 aamma L 27 Folketingimi sisamanngornermi suliarineqarmata taama oqarpoq.

Inatsisissatut siunnersuutit taakku tallimat Inatsisartunut ilaasortanit suliarineqareerlutik akuerineqareerput. Oqaaseqartartullu arlallit aamma tikkuarpaat kalaallinit taperserneqarsimanissaat inatsisissatut siunnersuutinut akuersinissaminnut pingaaruteqartoq.

Inatsisit ullutsinnut tulluartut

Inatsisissatut siunnersuutini annermik pineqarpoq nutarterinissaq, pisariillisaanissaq aamma pinerluttulerinermi eqqartuussisarnermilu inatsisit allanngortinnissaat, inatsisip ullutsinnut tulluarnerulernissa Kalaallillu Nunaannut pitsaasuunissaa.

Inatsisissatut siunnersuutip 23-p kinguneraa Kalaallit Nunaanniit aamma Kalaallit Nunaannut tunniussinermi aalajangiinissamut pisinnaassuseqarnerup Justitsministeriamiit eqqartuussivimmut nuuneqarnera. Inuit Kalaallit Nunanniit aamma Kalaallit Nunaannut tunniunneqartarnerat siunnersuummi aamma nutaanngorsarneqarpoq, Kalaallillu Nunaannit nunani avannarlernut EU-mulluunniit tunniussinermi periutsit pisariillisarneqarnerannik aamma kinguneqarpoq.

Nunani avannarlerni parnaarusseqqusissutit inunnullu tamanut pinngitsaaliilluni tammartinneqarnissamut illersuiniarluni isumaqatigiissutip Kalaallit Nunaani atuutilernissaanut inatsisit pisariaqartut siunnersuummi atuutilersinniarneqarput.

Pisariillisaanerit erseqqissaanerillu

L 24 eqqartuussisarnermik inatsimmik allannguineruvoq. Pinngitsaaliilluni iliuuseqarniarluni eqqartuussinerit ungasissumut attaveqaatitigut ingerlanneqarsinnaalerneranik periarfissiivoq, telefonimik tusarnaarnissamut telemullu tunngasunik paasissutissanik aallernissamut aalajangiinermik pissarsinissamut periuseq piuminarnerusoq, aamma allanik nutarterineq.

L 25-mi pineqarpoq eqqartuussiviit sulinerannik pitsanngorsaaneq sulianillu ingerlatsinermi sivikinnerusumik suliaqarnissamut iluaqutissiineq. Malittarisassat paasiuminarnerulerneranik ersarinnerulerneranillu imaqarpoq, ivertitsinermi malittarisassanut tunngasut aamma ilaapput, assuarinnissutit unneruluussissutit allanngortinneqarnissaannut piffissaliussat qaammatinit pingasunit sisamanut aamma sivitsorneqarput.

Kanngutsaalliornermik imallit aamma sakkut pillugit inatsit

L 26-mi pineqarput pisortaqarfimmi atorfilinnik ajortisaarinermik aamma inunnik atornerluinermik pinerluuteqarnertut isiginnilersitsineq, kinguaassiutitigut tunngasunik imalinnut iliuuseqarnerunissaq, pineqaatsissiinermi sakkortusaataasinnaasut, toqutsisimasullu immikkoortortami matoqqasumiitinneqartarnerat allallu.

L 27 Kalaallit Nunaanni sakkut pillugit inatsisip allanngortinneqarnissaannut siunnersuummik imaqarpoq. Allannguut Inatsisartuni marsimi 2026-mi suliarineqarpoq akuerineqarlunilu.

Aallaasinik imassaanillu peqalernissamut, piginninnissamut tigumiarnissamullu ukiut killigititaasut ilaatigut 15-inut inissinneqarnissaannik siunnersuut imaqarpoq.

Meeqqat 15-it inorlugit ukiullit piniarnermi aallaaniarnermilu suli tigumiarsinnaallutillu atuisinnaapput, inersimasumik piniarnermut allagaqartamik atuuttumik pigisalimmik ilagineqarlutik. 12-niit 14-inut ukiulinnut sunngiffimmi piniarnermut allagaqartamik atuuttumik peqarnissaq piumasaqarineqarpoq. Sakkut illersorneqarsinnaasumik, susassaqanngitsunillu tikinneqarsinnaanngitsumi inissinneqarsimanissannut piumasaqaat aamma eqqunneqarpoq. Aallartoorluni ajutoornerit aamma kissaammersimanerup nalaani atuisinnaanerup ajornarnerulersinnissaa ilaatigut siunertarineqarpoq.

Siunersuutit tamarmik Folketingimi partiinik taperserneqarput, kingornalu Kalaallit Nunaat pillugu ataatsimiititaliamut ingerlateqqinnerlutik.