KL

DK

Trump: USA Iranimik isumaqatigiissuteqarnissaq pinnagu peqquserlunnerup akiornissaa ukkatarissavaa

USA-mi illoqarfiit naalagaaffiillu demokratinit aqunneqartut peqquserlunnermik eqqugaaqqasut USA-p præsidentia isumaqarpoq.

Donald Trump aamma J.D. Vance Virginiami Veterans Day (Sakkutuujusimasut nalliuttorsiutigineqarnerat. aaqq.) pillugu nalliuttorsiornermut pingasunngornermi peqataapput. USA-mi "naalagaaffinni demokratinit aqunneqartuni tungujortuni" peqquserlunnermik akiuiniarneq tamakkiisumik ukkatarissagaa Trumpip præsidentip tullia Vance qinnuigaa. (Assi toqqorsivimmit)
Ritzau Ritzau
Saqqummersinneqarpoq

USA-p Irani isumaqatigiissuteqarfigisariaqanngilaa.

Præsidentip Donald Trumpip tamanna nittartakkakkut attaveqatigiittarfimmi Truth Socialimi allappaa. USA februaarip naaneraniilli Iranimut sorsuppoq.

– Iranip isumaqatigiissuteqarfiginissaa pisariaqartinngilarput. Piffissaq tamanna qaangiutereerpoq. Aningaasaataat dollarit  milliardit untritilikkaat pigaagut, kangerluallu pigaarput!

Trumpip Hormuzip kangerliumarnga Iranip Arabiallu Qeqertaasa akornanniittoq Perserit Kangerliumarnaniit nunarsuarmi imartanut allanut aqqutaasoq eqqartorpaa.

USA-p præsidentia pisortaqarfini Iranimik isumaqatigiissuteqarnissamik ukkatarinninnani maanna peqquserlunnermik akiuiniarnermut aallussinerusariaqartoq isumaqarpoq.

USA-mi illoqarfinni naalagaaffinnilu Demokratinit aqunneqartuni peqquserlunneq eqqartorpaa.

Trumpip Præsidentip tullia J.D. Vance tamassuminnga isumaginninnissaanik qinnuigaa.

– USA tamakkerlugu illoqarfinni naalagaaffinnilu Demokratinit aqunneqartuni peqquserlunnerup annertusiartuinnartup pinerluuteqarnerullu akiorneqarnera tamakkiisumik ukkatarissagai Præsidentip tullia Vance qinnuigaara.

- Naalagaaffiit tungujortut, soorlu Minnesota, California, Illinois allarpassuillu, tamarmik ajorluinnartumik aqunneqarlutillu peqquserlunnermik eqqugaapput, Trump allappoq.

Tungujortoq tassaavoq Demokratit partiiata ilisarnaataata qalipaataa. Trumpi Republikaneriuvoq.

Senatimut Aallartitaqarfimmullu sapaatip-akunnerani kingullermi qinersinermi Republikanerit annertuumik ajorsarmata tamanna immikkut maluginiarneqarpoq.

Republikanerit qinersinerni marlunni amerlanerussuteqarnertik annaavaat,  Demokratillu  naalagaaffinni oqaluttuarisaanikkut Republikanerinit amerlanerussuteqarfigineqartarsimasuni arlalinni malunnaatilimmik ajugaapput.

Kingorna Trumpip Truth Socialimi allatamini qinersineq peqquserlunnikkut sunnerneqarsimanerarpaa.

– Ilumut "qinersineq" eqqortumik ingerlasoq arlaannaalluunniit isumaqarpa? Qinersinerup inernerinut missingersuutit qanoq taama eqqunngitsigisinnaappat?, Trump allappoq.

Taassuma oqarnera naapertorlugu siumut taasinerit taama amerlatigisimapput allaat ajugaanissaq "ajornarluinnarluni".

RITZAU

donald trump demokratit inuiaqatigiit usa iran j.d. vance

Atorfiit tamaasa takukkit

PODCASTI

Powered by Labrador CMS