New Yorkimut timmisartuussinissaq suli akuerineqanngitsoq
Amerikamiut timmisartunut nakkutilliisoqarfianni TSA-mi atorfillit apriilip naanerani Nuummut tikeraassapput. New Yporkimut timmisartuussisarneq ammarneqartinnagu mittarfimmi isumannaallisaaneq akuereqqaartussaavaat.
United Airlinesip Nuummiit New Yorkimimi mittarfimmut Newarkimiittumut timmisartuussinermini Boeing 737-mik timmisartuussisarumaarluni naatsorsuutigaa.
Assi: United Airlines
Angallannermut Aqutsisoqarfiup timmisartortitseqatigiiffinnut nutaanut mittarfimmi timmisartuussinissamut inerteqquteqarnertik marsip aallaqqaataani atorunnaarsimmagu Nuup mittarfianut Greenland Airportsimullu alloriarneruvoq annertooq. SAS-ip United Airlinesillu juunimi timmisartuussisalernissaannut aqutsisoqarfiup maleruagassai taamaalillutik akornutaajunnaarput.
Mittarfilli United Airlinesip New Yorkimut timmisartuussisarneranut tunngatillugu suli naammassinngilaq. Matumani Transportation Security Administration, USA-mi angallannermi isumannaallisaanermut oqartussat, Nuummukangajalersut, takuniaanissaat amigaataavoq.
– Qaammatip matuma naanerani TSA-mit tikittoqarnissaa ilumoorpoq, taakkualu Amerikamiut inatsisaat malillugit isumannaallisaanermik suliaqarnerput akueriniarlugu suliaq aallartissavaat, Mikkel Bjarnø Lund, Greenland Airportsimi attaveqatigiinnermut pisortaq, uppernarsaavoq.
Timmisartut Amerikamut aallartinnagit nunarsuarmi mittarfiit tamarmik akuersissuteqartariaqartut USA-mit piumasaqaatigineqarpoq. TSA-p tamanna aalajangigassarigaluaraa Amerikamiut tikippata angallannermut aqutsisoqarfik peqataassaaq.
– Angallannermut Aqutsisoqarfiup Kalaallit Nunaanni silaannakkut angallannermi isumannaallisaanermut inatsisit pillugit apeqqutinik akisinnaanera ilaatigut pissutaavoq, aamma silaannakkut angallannermut oqartussaasut nunanit allaneersut Kalaallit Nunaanni Danmarkimiluunniit mittarfinni ilagineqartigatik misissuisinnaannginnerat pissutaavoq, Angallannermut Aqutsisoqarfik ilisimatitsivoq.
Nuup mittarfiani siusinnerusukkut isumannaallisaanikkut ajornartorsiuteqartoqartarsimavoq, tamannali maanna aaqqinneqarsimavoq. Taamaammat United Airlinesip aasaru timmisartuussisarnissaasa akuerineqarnissaat Greenland Airportsip naatsorsuutigaa.
- Pilersaarutit naammassineqassasut timmisartuussisarnerlu pilersaarutit malillugit aallartissasoq, siullerlu Nuummi juunip 14-ianni missasoq naatsorsuutigaarput, attaveqatigiinnermut pisortaq oqarpoq.
