Nuna tamakkerlugu takornariaqarnermut siunnersuisoqatigiit
Visit Greenlandip Nuummi unnuisarfinnik, neriniartarfinnik
misigisassarsiorfinnillu qanoq amerlatigisunik pilersitsisoqarsinnaanersoq
pillugu nalunaarusiaq juunimi 2024-mi saqqummersippaa.
Akunnittarfiit neriniartarfiillu tatineqangaartut,
septembarilu ukiup ingerlanerani „ulapaarfiunerpaasoq“ kisitsisit novembarip
28-ani mittarfiup ammarneqarnera sioqqullugu katersorneqartut takutippaat.
Nunanit tamalaanit mittarfiup ilungersunartumik ammarneqarnerata kingorna
pisariaqartitsineq annertusingaatsiarpoq, aammali mittarfik nalinginnaasumik
ingerlatillugu akunnittarfiit neriniartarfiillu ukiuni tulliuttuni
tatineqangaassapput.
Nuna tamakkerlugu takornariaqarnermut siunnersuisoqatigiit
Visit Greenlandip Nuummi unnuisarfinnik, neriniartarfinnik
misigisassarsiorfinnillu qanoq amerlatigisunik pilersitsisoqarsinnaanersoq
pillugu nalunaarusiaq juunimi 2024-mi saqqummersippaa.
Akunnittarfiit neriniartarfiillu tatineqangaartut,
septembarilu ukiup ingerlanerani „ulapaarfiunerpaasoq“ kisitsisit novembarip
28-ani mittarfiup ammarneqarnera sioqqullugu katersorneqartut takutippaat.
Nunanit tamalaanit mittarfiup ilungersunartumik ammarneqarnerata kingorna
pisariaqartitsineq annertusingaatsiarpoq, aammali mittarfik nalinginnaasumik
ingerlatillugu akunnittarfiit neriniartarfiillu ukiuni tulliuttuni
tatineqangaassapput.
Nuummi septembari 2027 aallarnerfigalugu maanna 1.039-nik siniffilinnik
578-inik initalimmik sanaartortoqanngippat akunnittarfissat
amigaatigineqassasut Visit Greenlandip misissuinerata takutippaa. (Airbnb-ikkut
attartornerit kangerlummilu illuaqqat naatsorsuummut
ilanngunneqarsimanngillat).
Kommuneqarfik Sermersooq, akunnittarfinnik
neriniartarfinnillu ingerlatsisut illoqarfimmilu innuttaasut Nuummi
akunnittarfiit nutaat sumi inissisimanissaat
isumaqatigiinngissutigisimanngilaat. Oqallinneq innuttaasunillu peqataatitsineq
sivisusimavoq, kommunilli mittarfiup aqqutaani Illerngit 2001-imi
sanaartorfissat tallimat, mittarfimmut attuumassuteqartunut soorlu quersuarnut,
kiffartuussinermut, allaffeqarfinnut, neriniartarfinnut akunnittarfinnullu
immikkoortinneqartut, februaarimi makitsissutigai.
Makinneqartut qinnuteqaataat kommunip maanna
suliarileruttorpai: Hotel Hans Egede, titartaasarfik TNT Nuuk, Hotel Aurora,
Capital Estate Development aamma Air Greenland.
Nunaminertamik qinnuteqaatip suliarineqarneraniit
akunnittarfimmik ammaanissamut ukiut marluk pingasulluunniit ingerlasarput.
Qaninnerit …
Mittarfiup illutaaniit mittarfiup aqqutaa Illerngit 2001 aqqusaarlugu
sanaartorfimmut biilinullu ineqarfissuamut pisuinnaat ikaartarfissaannik
sanaartornissaq kommunip pilersaarutaanut ilanngunneqarpoq. Hotel Hans Egedep
sanaartorfissaq timmisartoqarfimmut qaninnerpaaq pimoorussilluni
pissarsiariniarsaraa.
– Sanaartorfiit allat taxaqqaarluni tikinneqarsinnaapput, taava mittarfinni
akunnittarfiujunnaassaaq, pisortaq Helge Tang Sermitsiamut oqarpoq.
Hotel Hans Egedep nunaminertamik innimiginninnera kommunip nunaminertamik
tunissuteqarfigaa. Akunnittarfik 120-nik initalik eqqartorneqarpoq,
ingerlatseqatigiiffilli suli nalunaaruteqanngilaq.
Namminersorlutik Oqartussat akunnittarfiliunngitsut
Nuummi
(2024) Ilulissanilu (2026) mittarfiit ammarnissaannut atatillugu nuna
tamakkerlugu takornariaqarnermut siunnersuisoqatigiit Visit Greenlandip ukiut
tulliuttut tallimat ingerlaneranni unnuisarfinnik, neriniartarfinnik
misigisassanillu pisariaqartitsisoqarsinnaanera misissorsimavaat. Misissuinerit
taakku marluk mianersoqqussutaapput: Illoqarfiit mittarfissuallit ingammik
akunnittarfinnik neriniartarfinnillu ilaasut amerliartornerat ilutigalugu
amigaateqalissapput.
Tamanna tunngavigalugu Naalakkersuisut namminersortut suleqatigalugit
unnuisarfinnik ineriartortitsinissamik pilersaaruteqarnersut Atassutip
siulittaasua Aqqalu C. Jerimiassen apeqquteqarpoq.
– Angallannermi kinguaattoornerit nalinginnaanngitsumik amerlatigisut 2025-mi
misigisimavagut, tamannalu Nuummiinnaanngitsoq aammali nuna tamakkerlugu
sunniuteqarpoq. Ilaasorpassuit unnuiffissaqaratik ingerlaqqissinnaajunnaarput,
taamaammallu unnuiffissaqarnerulernissamik periusissiortoqartariaqarpoq.
Periusissiaq pisortat aaqqiissutaanniinnaq tunngaveqartussaanngilaq,
namminersortulli najukkami inuiaqatigiillu suleqatigalugit pissaaq, Aqqalu C.
Jerimiassen tunngavilersuivoq.
Namminersortut Nuummi Ilulissanilu akunnittarfiliornissamik pilersaaruteqartut
Inuussutissarsiornermut, Aatsitassanut, Nukissiuuteqarnermut, Inatsisinik
atortitsinermut Naligiissitaanermullu Naalakkersuisoqarfiup ilisimalluarpaa.
Tamanna tunngavigalugu naalakkersuisoqarfik illoqarfinni taakkunani marlunni
akunnittarfiliornissamut nutaanik suliniuteqarnissaminut pissutissaqanngitsoq
isumaqarpoq.
kurt@sermitsiaq.gl
– Nunaminertaq pissariaralugulu titartakkat pigaagut. Sioqqutsilluarpugut,
kisianni naammassillugu saqqummiutinnginnerani
tunngavissaqarluareertariaqarpugut, Helge Tang oqarpoq.
Mittarfiup eqqaani
akunnittarfiliornissaq suliffeqarfiit sisamat sanaartorfissamut
neqerooruteqarsimasut pilersaarutaannut arlaatigut ilaavoq. Pilersaarutit
ataatsimut isigalugit akunnittarfinnik katillugit 400-nik initalimmik
sanaartornermik kinguneqarsinnaapput, soqutiginninnerulli annertuup aamma
pilersaarutit nalilersorneqaqqilernissaat, immaqalu taamaatinneqarnissaat
kingunerisinnaavaa.
….Ungasinnerusut
Illussanik titartaasarfik TNT Nuuk A/S akunnittarfiliornermi ukiorpassuarni
misilittagaqarpoq, kingullermik Nuummi HHE Express, Hotel Aurora Apartments
aamma Hotel Ilulissat sanaartorsimavai. Maanna illussanik titartaasartut suli
alloriaqqinniarput. Illussanik titartaasarfiup sanaartorfissaq kissaatigisani,
timmisartoqarfimmiit ungasinnerpaaq aamma sisorarfimmut Nuullu timaanut
qaninnerpaaq, pissarsiaraa.
– Illussanik titartaasarfittut nammineerluta akunnittarfiuteqanngilagut,
kisiannili mittarfiup, sisorarfiup, tatsit qaqqallu avataanni ineriartornermut
peqataanissarput anguniagaraarput. Suliniut tuniniarniarlugu suliarinngilarput,
piujuartitsisumilli illussanik titartaasarnerit, pinngortitap sammisassallu
imminnut ataqatigiinnerat anguniarparput, pisortaq Jacob Exner Sermitsiamut
oqarpoq.
TNT Nuup suliniutaani illoqarfimmiunut sammisassaqartitsisoqarpoq,
aamma akunnittarfik kiassioriarlutik takornarianit misigisassarsiorusuttunut
sammisassaqartitsinerussaaq. – Sumiiffimmik inuit ulloq naallugu atuiffigisinnaasaannik pilersitsiniarpugut,
Jacob Exner oqarpoq.
Ukiut
sisamat ingerlaneranni siuariartorneq
Anita aamma Klaus Iversen Hotel Aurora nutaaq 32-nik initalik Nuummi
Paassaassivimmi Entreprenørdalenimiittoq 2021-mi juulip aallaqqaataani
ammarpaat, siornalu Hotel Aurora Apartments illoqarfiup qeqqani, Imanermi,
»Oles Varehusitoqqap« toqqavianiittoq ingerlatilerpaat.
– Ukiuni sisamanngortorsiornitsinni unnuisut amerliartuinnarnerat
nuannaarutigisinnaavarput. Mittarfik ammareermat soqutiginninneq
annertusissasoq naatsorsuutigaarput, Nuummilu ineriartornermut pissanganartunut
peqataajumalluta nunaminertamik sanaartorfissamik qinnuteqarpugut, Klaus
Iversen Sermitsiamut oqarpoq.
Aappariit kommunimit inaarutaasumik nunaminertamik tunineqarnissamik tungaanut
mittarfiup eqqaani akunnittarfiliornissamik pilersaarutitik pillugit
nalunaaruteqarnissartik utaqqisikkallarpaat.
Naagga
aammalu immaqa
Capital Development ApS-ip sanaartornermik ineriartortitsineq illunillu
attartortitsineq pingaarnertut suliaraa. Ingerlatseqatigiiffik sanaartornermik
ingerlatsivimmik EMJ/Atcon-imik piginnittunit pigineqartoq, nunaminertamik
sanaartorfissamik pissarsisimavoq, suliniutilli iluatsinnissaa qularutigilerpaa.
– Illuliorsuarmik, soorlu quersuaqarfimmik, allat mittarfimmut atatillugu
atorsinnaasaannik sanaartorsinnaassalluta neriuutigaarput, siulersuisuni
siulittaasoq Dan Lyngholm Sørensen Budek Sermitsiamut oqarpoq.
Ingerlatseqatigiiffik timmisartukkut assartukkanut quersuarmik
pisariaqartitsisoqarneranik ilisimatinneqarsimavoq, kisiannili suliffeqarfinnit
sumiiffimmi tassani illuliornissamik soqutiginnittunit
saaffigineqarsimanngilaq. Qinngorpumi qanittumiittumi illuutinik
inuussutissarsiorfiusussanik quersuarnillu peqarpoq, taakkulu mittarfeqarnerup
kingunerisaanik pisariaqartitsisoqalernissaata tungaanut atorneqarsinnaapput.
– Immaqa siusinaarluta aallartippugut, qularnanngitsumillu nunaminertaq
kommunimut utertissavarput, Dan Lyngholm Sørensen Budek oqarpoq.
Air Greenlandip, Ilulissani Hotel Arcticimik World of Greenlandimillu
piginnittup, nunaminertaq sanianiittoq sanaartorfissatut pissarsiaraa.
– Air Greenland Nuummi akunnittarfiliornissamik paasiniaanermik ingerlatsivoq,
taamaammat maannakkut suliniut qanoq innersoq oqaaseqarfigisinnaanngilarput,
piujuartitsinermut attaveqatigiinnermullu pisortaq Inga Dora G. Markussen
Sermitsiamut naatsumik akivoq.
