KNQK-mi siulittaasoq atuffimminit tunuarpoq

KNQK-p siulersuisuisa Facebookikkut nalunaarutigaat siulittaasup Mikkel Jeremiassenip tunuarnera.

AAMMA ATUARUK

KNQK aningaasaliissutit 500.000 koruunit sinneqartut siunertarinngisaanut atorsimallugit nassuertoq

Taama nalunaaruteqarpoq KNQK piffissami kingullermi politikkikkut oqallisaangaatsiareersorlu, tassa peqatigiiffiup Namminersorlutik Oqartussanit tapiissutit siunertanut akuerineqarsimanngitsunut atorsimammagit. Peqatigiiffiit arlallit suliamut tunngatillugu KNQK immikkut ittumik ataatsimeersuartariaqarnera piumasarisimavaat.

Suliaq Nivi Olsenip Demokraatineersup Naalakkersuisunit marlunngornermi tunuassutigaa, partiinit arlalinnit suliamik ingerlatsinera naammagineqanngimmat.

Nivi Olsenip ilisimatitsissutigaa KNQK-p aningaasat utertissagai.

Mikkel Jeremiassenip nammineq aalajangernini Facebookimi ima oqaatigaa:

– Maanna siulersuisuunernut mailikkut KNQK-mi siulittaasutut tunuarnera nalunaarutingaara. Piffissatsialaasoraara nukiit nutaat aquummik tingusinissaannut periarfississallugit, Mikkel Jeremissen oqarpoq. 2006-imi Avannaata Qimussersua immikkut eqqaavaa, tassani peqatigiiffik Sisimiuni qimussimik sukkaniunnissamut isumaqatigiinniarluni angusaqarmat.

- Attorteqqavunga Soorunalimi, aammali oqiliartulernissaa qilanaaraara, Mikkel Jeremiassen naggasiivoq.

AAMMA ATUARUK

Mikkel Jeremiassen amerikamiut tapiinerannut oqallisaaqisumut: Peqqissimissutissaqanngilanga

2025-p aallartinnerani Mikkel Jeremiassen KNQK-lu politikkimut tunngasumi allami, tassa USA-p, Kalaallit Nunaata Danmarkillu akornanni, qitiusumik inissisimaffeqarput.

Avannaata Qimussersua taamaatiinnarumanagu peqatigiiffik Amerikamiut konsulateqarfiannit aningaasaliiffigineqarpoq, taamanilu pilersaarutaalerpoq USA-mi vicepræsidentip JD Vancep nuliata Usha Vancep qimussimik sukkaniunneq isiginnaarnissaa. Tikeraarnissarli pinngitsoorpoq.