Canadami anaanaq paninilu saassunneqarlutik toqutaareersut allarsuit toqunneqartut

Arnap paniatalu inersimasup Canadap kippasissortaani novemberip aallartinnerani allarsuarnit saassunneqarlutik toqutaanerisa kingorna allarsuit sisamat tigusarineqarlutillu toqunneqarput.

Nutaarsiassaqartitsivik AFP naapertorlugu nunap ilaani  British Columbiami uumasunik nakkutilliisut tamanna marlunngornermi nalunaarutigaat.

Allarsuaq arnaviaq piarailu pingasut arnanik marlunnik toqutsisuusut sapaatip akunnerata siuliani saassussinerup sumiiffiani DNA-mik misissuisoqareerneratigut paasineqarpoq. Allarsuit taakku sisamat tigusarineqarlutillu toqunneqarput.

Arnat 48-nik aamma 20-nik ukiullit angerlarsimaffimmi ungasinngisaani, Bella Coolap illoqarfianut qanittumi pisuttuartillutik saassunneqarput.

Uumasunik nakkutilliisut naapertorlugit nannut inuit isumannaatsuunissaat anguniarlugu toqunneqarput.

– Saassussinerlu uumasutut qaasuttutut pissusilersornermik ersersitsisoq misissuinitta takutippaa, tamannalu qaqutigoortorujussuuvoq, Jeff Tyre, piniarnermut oqartussani nakkutilliisoq nutaarsiassaqartitsivik AP naapertorlugu oqarpoq.

- Tassa qanoq aallartinnersoq naluarput, kisianni qanoq naggaserneqarsimasoq nalunngilarput.

Arnat timaat Bella Coolap avataani pisuttuartarfiup eqqaanni imminnut 150 meterisut ungasitsigisumi nassaarineqarput.

Canadami allarsuit ukiuunerani apissiminnukannginnerminni orsussamik katersuisaramik ukiakkut qaasunnerusarput.

Nunap immikkoortuani tassaniittuni atuartut angalaqatigiinnerminni allarsuarmit siorna novembarimi saassunneqarput. Saassussinermi inuit aqqanillit, taakkununnga meeqqat arlallit ilanngullugit, saassussinermi ajoquserput – ilaallu ajoquserujussuarlutik.

Allarsuit sisamat toqutat siusinnerusukkut saassussinermut peqataasimanngitsut AFP naapertorlugu uumasunut aqutsisoqarfiup nalunaarutaani oqaatigineqarpoq.

Saassussineq toqussutaasoq najukkami innuttaasunut annertuumik sunniuteqarpoq, AP allappoq. Allarsuit saassussinerisa kingorna najukkami oqartussaasut namminneq piumassutsimik angerlarsimaannarnissamik peqqussuteqarput. Politiillu meeqqat atuarfimmukarnerini ingiaqataasarput.

Allarsuit taakku Canadami USA-llu avannarpasinnerusortaani najugaqarput, nalinginnaasumillu 200 aamma 780 kiilut akornanni oqimaassuseqarlutik.

RITZAU