Pilersuisup niuertarfii imaqanngillat – ”allaanngilaq nunami ikiorneqarnissamik utaqqisuni siuarsagassamiittugut”

Eva Lilian Asmussen siorna septembarimi angutaatinilu Narsarsuarmut nuuppoq angutaatini AFIS-operatøritut atorfinimmat. Taamanikkut nunaqarfimmi niuertarfituaq Pilersuisoq nioqqutissanik pisariaqartunik peqarpoq pilersuinerlu patajaalluni. Ukiumilu affarmi kingullerni nioqqutissanik amigaateqartalerpoq, maannalu pissutsit ilungersunarsisimapput.

– Nioqqutissanik nalinginnaasunik soorlu immummik, iffianik, naatsiianik qallersuutinillu amigaateqarpoq – allaannginnami maanna vitamininik sodavandimillu inuussuteqartunga, nioqqutissanik nalinginnaasunik pisisinnaannginnama, Eva Lilian Asmussen oqarpoq.

 Nioqqutissat ikiliartortut

Pilersuisup niuertarfii nunaqarfimmi inuttussutsimut naleqquttumik annertussuseqartarput, toqqorsiviuppata kioski imaluunniit niuertarfiuppata kiffartuussiviit imaluunniit nunaqarfiup niuertarfii, soorlu KNI-p nittartagaani allassimasoq. Tassani nioqqutissat tunngaviusut assigiinngitsut 67-iupput, nioqqutissat assigiinngitsut 150 missaaniillutik, ilaatigut inuussutissat, iisartakkat pisiarineqarsinnaasut, eqqiaatit kiisalu piniutit. Nioqqutissat ilaat soorlu qajuusat qaqorteqqasullu sumi tamaniipput, nioqqutissat immikkut ittut soorlu qaqqortarissat qaqorteqqasulluunniit qalalaariikkat taamaallaat niuertarfinni anginerumaaniillutik. Narsarsuarmili Pilersuisup niuertarfia ukiup affaata kingulliup ingerlanerani nioqqutissanik amigaateqarpoq, tamannalu sussaanngilaq, Eva Lilian Asmussen oqarpoq.

– Ajorluinnarpoq. Arlalitsigut nioqqutissanik amigaateqartaqaat. Immuk, iffiat, imeq, qallersuutit, qerisut, qimmit nerisassaat – ulluinnarni pisariaqartitavut tamarmik amigaataapput. Sapaatit akunneri pingasut ingerlasinnaasarput nioqqutissanik tikittoqaqqinnissaanut, oqaluttuarpoq.

 Qaammatini marlunni iffiaqarsimanngilaq, allaallu nioqqutissanik tikittoqaraangat ikittuinnaasarput nungupallallutillu.

– Assersuutigalugu pizzat qerisut arfineq pingasut tikisinneqarput nersussuullu neqaa qerisoq poortat sisamat – naammanngilluinnarput, oqarpoq.

 Ulluinnarni inuuneq tatineqartoq

Nioqqutissanik nalinginnaasunik amigaateqarneq isumalunnarsisarpoq peqqiillinarsinnaallunilu.

– Sulinitsinni malugisinnaavarput. Inuit tatineqarsimapput inuussutissanik tunngaviusunik nukissanillu pissarsisinnaannginnatta ulluinnarni inuunitsinni atorfissaqartitatsinnik. Allaannginnami nunami siuarsagassamiilluni – ikiuutissanik utaqqiinnarluni. Pilersuisoq Narsarsuarmi niuertarfituaavoq, allanillu periarfissaqanngilagut, Eva Lilian Asmussen oqarpoq.

Oqaluttuarpoq nammineq iffiortalersimalluni nunaqarfimmi tuniniakkaminik – maannali aamma qapueruppoq qajuusaarullunilu. Qaammaterpassuarni immussuaqarsimanngilaq.

– Qaammammi kingullermi tamatigungajak niuertarfimmi susaartarpugut, oqarpoq.

 Angallammik timmilluniluunniit Qaqortumut niuerniarneq

Nioqqutissanik amigaateqarneq ilaqutariit ilaannut ima kinguneqartarpoq allanik akisunernik pisiariaqarnermik imaluunniit ungasissumut pisiniarluni. Eva Lilian Asmussen ilaqutaalu Qaqortumut nerisassarsiniarniarlutik qulimiguulimmut billitsisisariaqarsimapput – angalaneq 4.000-it koruunit tungaannut akeqarsinnaalluni.

– Timmisartumik niuerniartariaqarneq ajorluinnarpoq, oqarpoq, Narsarsuarmilu najugaqartut ilaat Qaqortumut Narsamulluunniit niuerniartariaqartartut ilanngullugu oqaatigalugu.

– Ilaqutariinnguarnut meerartalinnut akisoqaaq 3.000 koruunit tungaannut akilimmik illoqarfimmut qaninnerpaamut Targamut ilaalluni niuerniartariaqarneq.

Narsarsuarmi Pilersuisup niuertarfia assersuutigalugu immummik amigaateqarsimavoq, maannalu taamaallaat naalungissanut immuliassaqarluni.

– Ilaqutariit meerartallit naalungissanut immuliassamik pisisariaqarsimapput meeqqat immussaqarnissaat qulakkeerniarlugu, oqarpoq.

 Ukiornissaanut ernumasoq

Eva Lilian Asmussen oqaluttuarpoq Narsarsuarmi najugaqartut ernummatigigaat kangerluk sikuppat pissutsit ajornerulernissaat. Siorna qaammatit pingasut ingerlareersut umiarsuaqarpoq, maannakkullu iliuuseqartoqartariaqarpoq qulakkeerniarlugu ukiornissaanut Pilersuisup niuertarfiata naammattunik nioqqutissaateqarnissaa.

 – Niuertarfik peqqumaasersortariaqarpoq ukiornissaanut pissaqarniarluta. Ukiukkut maani najugaqartugut 80-iinnaavugut, aasakkulli amerlanerujussuusarpugut - taakkulu aamma pisiassaqartariaqarput, oqarpoq.

 KNI: Nioqqutissat kaaviiaartitsinermut naleqqussagaasut

KNI A/S-imi Sulisoqarnermut, attaveqatigiinnermut piujuartitsinermullu pisortap Juliane Henningsenip Sermitsiamut uppernarsarpaa nunatsinni tamarmi nioqqutissat naleqqussarneqarsimasut ilaatigut Narsarsuarmi.

– Nioqqutissat kaaviiaarsinnaarpianngitsut ikilivagut, aningaasartuutit annikillisinniarlugit. Niuertarfik sutut inissisimanersoq apeqqutaavoq sulisoqarneq, kaaviiaartitsineq naammassisinnaasallu qanoq ittuunersut, oqarpoq. 

Nassuerutigaa KNI najugaqartunut maalaarfigineqartartoq, inniminneeriaatsinilu kukkunerit nunaqarfinnik arlalinnik eqquisimasut.

Naalakkersuinikkut isorinninneq

Inatsisartunut ilaasortaq Mariane Paviasen Jensen, (IA) KNI A/S-imik sakkortuumik isornartorsiuivoq, tikkuarpaalu kiffartuussinissanik isumaqatigiissut nunatta karsianit aningaasalersorneqartoq peqqutigalugu nunatsinni tamarmi nioqqutissanik pilersuineq tamarmi patajaatsuusariaqarmat. Nammineq Narsami najugaqarpoq tassanilu aamma Pilersuisup niuertarfiini amigaateqartoqarnera misigisarlugu.

 – Ajornakusoorpoq, ilaannikkullu ima misinnartarpoq nunaqarfiit illoqarfiillu mikisut pitsaanngitsunik atugaqareersut suli ajornerulersinneqartartut nioqqutissanik amikkisaarnikkut akillu qaffasinnerisigut. Najugaqarfinni mikinerusuni pissutsit ajornakusoornerujartorput, Mariane Paviasen Jensen oqarpoq, nassuiaallunilu Qassiarsuk Igalikulu Pilersuisup niuertarfiini amigaateqarnermik ajornartorsiuteqakkajuttartut, soorlu Narsarsuarmisut.

 Paviasenip tikkuarpaa kiffartuussinissamik isumaqatigiissummi aningaasaliissutit ikiliartunngitsut. 2025-mut aningaasanut inatsisissamut siunnersuummi allassimavoq, KNI A/S 2024-mi 22,6 million koruuninik taperneqartoq nunaqarfinni isorliunerusunilu nioqqutissanik aningaaseriveqarnermillu pilersuinissaminut. Mariane Paviasen Jensen isumaqarpoq, taamaakkaluartoq innuttaasut nioqqutissat ikiliartortut misillerfigisaraat, naak KNI A/S-imut tapiissutit amerligaluartut.

– Tusartarparput niuertut nioqqutissanik inniminniisut Sisimiunili qullersaqarfik amerlassusaannik killilersuisartoq. Nunatta karsiata kiffartuussinissamut isumaqatigiissut akilertarpagit pilersuineq qulakkeerneqartariaqarpoq – innuttaasut tamarmik akileraarutitigut akileeqataasarput, oqarpoq.

Isumaqarpoq Naalakkersuisoq akisussaasoq piaarnerpaamik iliuuseqartariaqartoq.

Nioqqutissanik pilersuinermut atsiornernik katersineq

Narsarsuarmi Eva Lilian Asmussen ikinngutini suleqatinilu Cecilie Silassen peqatigalugu atsiornernik katersilersimavoq, najugaqavissullu tamangajammik iluarsiisoqarnissaa neriuutigalugu atsiorsimapput. Qaqortumi mittarfik nutaaq pilersaarutit malillugit apriilip 16-ani 2026-mi ammassaaq, kingornalu Narsarsuarmi najugaqartut illoqarfimmut nuunneqassapput, tamatumali tungaanut nunaqarfik suli pilersorneqartariaqarpoq, isumaqarpoq.

 – Inoqartillugu nunaqarfik pilersorneqassaaq. Taamaanngippat inuit pinngitsaalillugit nuutinneqassapput, Eva Lilian Asmussen oqarpoq.