MOTOORI
Pisuttuartartunut, takornarianut qimussertartunullu atortut
Sisimiut Outdoor Sisimiuni aqqusinersuarmiittoq silami sammisaqarnermut atortunik tuniniaasarpoq. Taanna aamma internetikkut pisiniarfiuteqarpoq, tassani taskit, siniffiit puui, apusiutit nioqqutissallu allarpassuit Kalaallit Nunaata sineriaaneersut pisiniarfigisinnaavaat.
Sisimiut Outdoor Sisimiuni Aqqusinersuarmiippoq, nittartakkatigulli nunap sinneranit pisiniarfigineqarsinnaalluni.
Assi: Sisimiut Outdoor
Ajaaja Bech Jørgensenip silami atortunik niuertarfeeraatini, ataatami
nutsernermi suliffeqarfiutaaniikkaluartoq, Sisimiunut aqqusinersuarmut 2019-imi
nuuppaa. Nunaqavissunut takornarianullu tuniniaanermi saniatigut
nittartakkatigut Kalaallit Nunaata sinnera tuniniaavigisarpai.
Tamatuma
saniatigut Albatros
Travel suleqatigalugu
takornarianut, assersuutigalugu Kangerlussuarmiit Sisimiunut Arctic Circle
Trailimi pisuttuartussanut, nioqquteqartarpoq.
Takornariat
pisuttuartartut aamma umiarsuarnik takornariartaatinik angalasut
Pisiniarfimmi
nioqqutissarpassuit aalisarnermut, qimussernermut, meqqunik atisaliat, umimmaap
qiviuinik nuersagassiat, silami sammisaqarnermut atortut nerisassallu
qeritillugit panertitat pisiassaapput.
Pinngortitami pisuttuartartut amerlasuut Sisimiunut tikittarput pisiniarfimmilu atortussaminnik pisiniartarlutik
Assi: Sisimiut Outdoor
-Takornariat
pisuttuartartut arlallit Sisimiuliartarput, taakkulu atortut aamma nerisassat
qeritillugit panertitat soqutigilluartarpaat, taamaammat taakku
tunisarilluartarpagut. Umimmaalli qiviuinik nuersagassiat amerlaqisut
tunisarpagut taakkulu saniatigut nioqqutissat allat nammineq misullugit
qalipaasersukkagut nuersakkallu aamma tunilluartarpagut.
Tunisassiat qaqutigoortuupput, taakkuali takornariartaatinik angalasunut
pilerisaarutiginerusarpagut, Ajaaja Bech Jørgensen, qimussertartumik Johanne
Bechimit panigineqartoq, oqarpoq. - Taamaammat qimussertartunut aamma atortut arlallit pigaagut.
Aalisariutinik, piniutinik, qimussernermi atortunik, meqqunik atisalianik, umimmaap qiviuinik nuersagassianik, silami sammisaqarnermi atortunik nerisassanillu panertitanik pisiniarfik amerlasuunik nioqquteqarpoq.
Assi: Sisimiut Outdoor
Kangerlussuarmut
nassiussisartoq
Sisimiut Outdoor aamma Kangerlussuarmi Albatros Travel suleqatigaa, takornariat
Arctic Circle Trailimi pisuttuassagunik assersuutigalugu nerisassanik
qerititsivimmi panertitanik imaluunniit ikumasartunik inniminniisinnaapput
Kangerlussuarmullu akunnittarfimmut toqqaannartumik nassiunneqartarlutik. Taama
neqerooruteqarneq takornariarpassuarnit atorluarneqartarpoq, taamaalillutik
suut tamaasa Kalaallit Nunatsinnukarnerminni nassartariaqanngimmata, Ajaaja
Bech Jørgensen oqaluttuarpoq.
– Aamma eqimattat amerlasuut Arctic Circle Trailimi toqqaannartumik pisunneq
ajorput, kisianni nunami assigiinngitsunik sungiusartarlutillu uagutsinnit
nioqqutissanik inniminniisarput. Assersuutigalugu Tuluit Nunaannit eqimattat
aggustimi nerisassanik panertunik qerititsiviusunik puussiat hundredellit
nassiutissavavut.
Internetikkut
pisiniarfik aamma nuannarineqarluarpoq. Nalaatsornerinnakkullu aallartippoq.
Ajaaja Bech Jørgensenip nioqqutissat allattorsimaffianni
immikkoortiterneqarlutillu immikkoortiterneqarmata unammillertiminit
pitsaanerusumik inissippoq.
–
Arlallit internetikkut pisiniarfiuteqanngillat,
nittarsaassivallaanngikkaluarlutali sapaatip akunneranut inniminniisoqartarnera
ajoriinnagassaanngilaq, Ajaaja Bech Jørgensen oqarpoq.
Allaaserisaq Motoorimi
saqqummersinneqarpoq. Motoori uani atuarneqarsinnaavoq
Atortorissaarutit pitsaasut silamilu sammisaqarnermi tunisassiortut meqqit ilisimaneqartut pingaartinneqarput.
Assi: Sisimiut Outdoor
