Kujataani 2011-miilli siorna
aasakkut aatsaat taama sikorsuaqartigaaq, tamannalu umiarsuit angallannerannut
ajornartorsiortitsivoq.
Ilaatigut umiarsuarnut takornariartaatinut, Kitaata
sineriaani umiarsualivinni tikinnissarpassuarnut ilaasut ajuusaarutigisaannik
taamaatitsiinnartariaqarsimasunut.
Kujataani 2011-miilli siorna
aasakkut aatsaat taama sikorsuaqartigaaq, tamannalu umiarsuit angallannerannut
ajornartorsiortitsivoq.
Ilaatigut umiarsuarnut takornariartaatinut, Kitaata
sineriaani umiarsualivinni tikinnissarpassuarnut ilaasut ajuusaarutigisaannik
taamaatitsiinnartariaqarsimasunut.
Angalatitsiviit arlallit soorlu
Krydstogteksperten, Øster Lindet, MSC Cruises aamma Best Travel Islandimut
Kalaallit Nunaannullu umiarsuarmik takornariartaammik »MSC Poesia«-mik, 2024-mi
juunip 29-anniit juulip 20-annut angalanissamik neqerooruteqarsimapput.
Atuagassiaaqqat qalipaatigissaartut naapertorlugit Kalaallit Nunaannut
angalanermi Prins Christians Sund aqqusaarlugu Qaqortumut, Nuummut
Ilulissanullu tikittoqartussaasimavoq.
Taavali sikorsuaqalerpoq, angalanissamullu pilersaarut ullormiit ullormut allanngortinneqartalerpoq.
Prins Christians Sundikkut
Qaqortumut Ilulissanullu angalanissaq taamaatiinnarneqarpoq, taarsiullugulu
Paamiunulluunniit tikissinnaaneq sikorsuit pissutigalugit ajornarsimavoq.
Kalaallit Nunaannut angalanermi ulluni aqqanilinni imaatigut angalasoqarpoq, Nuummiinnerlu
akunnernit qulinit 34-nut sivitsorneqarluni.
Nuuk Nuujuvoq, naammanngilarli.
Ilaasorpassuit angerlaramik Danmarkimi Pakkerejse-Ankenævnimut,
aaqqissuuteriikkanik angalanernut maalaarutinik suliarinnittartunut, maalaaruteqarsimapput.
Aalajangiiffimmi
saqqummiunneqaqqammersumi maalaaruteqartut isumaqatigineqarlutik
aalajangiiffigineqarput: Islandimut Kalaallillu Nunaannut umiarsuarmik
takornariartaammik taama isorartutigisumut angalasut ullormiit ullormut
allanngortoqarsinnaanera piareersimaffigisariaqarpaat, Prins Christians Sundili
ikaarneqarsinnaasimanngimmat kiisalu Qaqortumut Ilulissanullu tikinnissanik
taamaatitsiinnartoqarmat, angalasut allanngortoqarnissaanut
piareersimaffigisariaqagaat sipporneqarput.
KALAALLIT NUNAANNIT MAALAARUTIT
Aaqqissuuteriikkanik angalanernut
maalaarutinik suliarinnittartut atuisut aaqqissuuteriikkanik angalasartut
maalaarutaat suliarisarpaa. Maalaaruteqartarfiup naammagittaalliuutit qanoq
amerlatiginersut kisitsisitigut nalunaarsugaatiginngilaat, ilaannikkulli
Kalaallit Nunaannit maalaarutit suliarisarlugit ilisimatitsissutigaa.
Aliikkutaralugu aalisartoq ukiualuit matuma siorna
Kujataani sivisuumik panernersuaqarnera pissutigalugu tatsit panersimammata
maalaaruteqarami taperserneqarpoq.
Tammajuitsussarsiniarluni piniartup Kangerlussuarmi panneq angisooq
kusanartorlu pisarisimagamiuk maalaarutaa taperserneqarpoq. Kisiannili
Stubbekøbingimi angerlarsimaffimmini angalatitsisartumiit poortukkamik
nassitsikkami umimmaaqqap niaqua nassiussarsiarisimavaa. Niaqoq pissaa
nassaarineqanngilaq, angalatitsisartorlu kingorna akiliisinnaajunnaarpoq.
Aappariit angalatitsiviup neriorsuisimaneratut innarluutilinnut
naleqqussakkanik angalasoqassasoq neriorsorneqarsimagaluarlutik angalatitsiviup
Uunartumi puilasunut umiaaqqamik pullattakkamik ammasumik angalaneranni
nuliaasiup pitsorlunnera eqqarsaatigineqarsimanngimmat akikillisaavigineqarput.
Maalaaruteqartarfik namminersortuuvoq, atuisunut siunnersuisoqatigiinnit
Tænk-imit aamma niuernermik inuussutissarsiuteqartut peqatigiiffiannit
Rejs-imit pilersinneqartoq, taakkulu ilaasortassanik marlunnik toqqaasarput,
eqqartuussisoq Mikael Kragher siulittaasuusoq.
Aaqqissuuteriikkamik angalaneq tassaavoq angalanermut
aaqqissuussaq angalanermi ataatsimi angalanermut tunngasunik minnerpaamik
marlunnik assigiinngitsunik neqerooruteqartartoq, assersuutigalugu umiarsuarmut
takornariartaammut ilaaneq ilaaffimmilu unnuineq ilanngullugit.
kurt@sermitsiaq.gl
Inersimasut arfinillit meeqqallu tallimat umiarsuarmut takornariartaammut MSC
Poesiamut 286.354 koruuninik akiliipput, maalaaruteqartarfiullu taakkua 98.290
koruuninik akikillisaavigineqarnissaat akueraa. Maalaaruteqartut allat aamma
assingusumik akikillisaavigineqarput.
Silaqqinnissaa
qulakkeerneqarsinnaanngitsoq
Takornariaqarnermi kattuffik Visit Greenland, Namminersorlutik Oqartussanit
pigineqartoq, silap pissusiata allanngungaatsiarnerata
takornariaqarnerulerneratalu kinguneri eqqumaffigai.
– Kalaallit Nunaat qanorluunniit silaqqittussatut nittarsaatinngilarput; illuatungianilli
pinngortitaq imaannaanngitsuusoq suliagullu tamarmik pinngortitamit
aqunneqarlutik, ilusilersorneqarlutillu isumassarsiaasut naqissusertarparput,
Visit Greenlandimi nunat tamalaat pillugit sulisoq Tanny Por Sermitsiamut
oqarpoq.
– Kalaallit Nunaat silap pissusiata allanngoriartorneranut
sunneqqaarneqartussatut isigineqartarpoq. Taamaammat uagut takornariallu ukiup
allanngoriartorneranut naleqqussartariaqarpugut – ilaannikkut
tupaallattaraluarluta, assersuutigalugu ilimagisamit siku siusinaarluni
aakkiartoraangat. Pinngortitap allanngorartuarnera Kalaallit Nunaanni
misigisassanut ilaasoq paasitinniartarparput.
– Visit Greenlandip takornariaqarnerup ineriartortillugulu annertusarnissaa
eqqarsaatigalguu takornarianik eqqortunik pilerisaarinissaq taakkualu Kalaallit
Nunaanni misigisassatut naatsorsuutaasa isumaginissaat ukkatarisaasa ilagaat. „Tikeraat eqqortut“
tassaapput misigisassarsioriartorlutik tikeraartut, tassami taakku
piujuartitsisumik periaaseqarlutik najukkami aningaasaqarnermut toqqaannartumik
tapeeqataaginnarnatik, aammali naleqqussarsinnaassuseqarnerupput, tamannalu
Kalaallit Nunaannut takornariarfissatut pingaaruteqarpoq, Tanny Por oqarpoq.
Avannaani aputaaruttoq
Kujataani sikorsuaqarpallaartoq avannaani aputikippallaarpoq.
Angalatitsivik Topas A/S
Qeqertarsuup Tunuani upernaakkut angalatitsisarpoq, tassanilu takornariat
Qeqertarsuarmut tikinnerminni marlunnut avinneqartarput: Eqimattat aappaat
qamuteralannik Lyngmarksbjergimukartarput, tassanilu illuaqqami unnuisarlutik.
Eqimattat aappaat qimussimik Uunartuarsuup Qaqqaata Sermianukarlutik
Kuussuarmukartarput, illoqarfimmilu akunnittarfimmi unnuisarlutik. Eqimattat
marluk tamarmik assigiimmik misigisaqarniassagamik aqaguani paarlaallutik
angalasarput.
Sila 2024-mi apriilip naalernerani issangiarmat Qeqertarsuarmiinnerat tamaat
siallerpoq. Eqimattat tamarmik Uunartuarsuup Qaqqaani unnuiffissaat aamma Kuup
Iluanut Kuussuarmullu qimussimik angalanissaat taamaatiinnarneqarput,
taarsiullugu illoqarfimmi pisuttuarneq katersugaasivimmullu takuniaaneq
pilersaarutigineqarput.
Pisisartup ataatsip
Qeqertarsuarmut angalanissani 27.115 koruunilerpaa, angerlaramili
Qeqertarsuarmi aaqqissuussat taamaatiinnarneqarnerat naammagittaalliutigaa.
- Qimusserniarlunga, qaqqap qaani
unnuiniarlunga qamuteralannillu angalaniarlunga billetsisivunga, taakkuali
pingasut tamarmik taamaatiinnarneqarput.
Aaqqissuuteriikkanik angalanernut maalaarutinik
suliarinnittartunut takornariaq isumaqatigaa, takornariarllu taamaalilluni
akiliutiminut 7.700 koruuninik akikillisaaffigineqartussangortinneqarpoq.
Ajunngilaq
Kalaallit Nunaanni takornariat silap pissusiata allanngoriartorneranik
naammagittaalliuutiginnittarnerat pillugu kisitsisit aalajangersimasut
ilisimaneqanngillat.
- Sila allanngortissinnaanngilarput, kisiannili
takornariat pitsaanerusumik kiffartuussinissaannut paasiuminartumillu
paasissutissiiffiginissaannut periarfissaqartuaannarpoq, Tanny Por oqarpoq.
– „Silatusaartumik“ attaveqatigiinnerulerutta – soorlu qanoq inneranik
assersuutigalugu qanittukkut Air Greenlandip avammut attaveqarnermigut
ilisimatitsineratut ilisimatitsiinnaraluaruttaluunniit – takornarianut
angalatitsinermillu aaqqissuussisunut iluaqutaanerulertarpoq. Taamatut
ammasumik atttaveqariaaseqarneq angalasunut nalorninartorsiortunut; immaqa
ulluinnarni sungiusimanninngitsunut, iluaqutaasarpoq.
Kalaallit Nunaanni angalasartut, suminngaanneeraluarunilluunniit, oqaaseq »immaqa«
ukiorpassuarni tusartarpaat. Visit Greenlandip nunani allani suleqatiminut
Kalaallit Nunaat pillugu oqaluttuassaq oqaluttuarigaangamiuk oqariartaaseq
„ajunngilaq“ atortarpaa.
