Umiatsiaaqqat Pocat aquttoqanngitsut nunatsinni nunaqarfinni eqqakkanik ajornartorsiummut immaqa aaqqiissutissaapput. Inuusuttut sisamat aallarnisaasut Odensemi suliffeqarfimmik Aaveq Robotics-imik pilersitsisut taama isumaqarput.
Taakku umiatsiaq Poca 600 GR MK1, qaammataasat nalunaarsuinerat atorlugit aquttoqarani ingerlanneqarsinnaasoq, ulluni makkunani inaarutaasumik suliarileruttorpaat. Umiatsiaq atortulersorlugu naammassippat Kalaallit Nunaannut nassiunneqassaaq, tassanilu Aaveq Roboticsip eqqagassalerinermik ingerlatsivik Esani suleqatigalugu qaammatini pingasuni misileraanissaa pilersaarutaavoq.
Umiatsiaaqqat Pocat aquttoqanngitsut nunatsinni nunaqarfinni eqqakkanik ajornartorsiummut immaqa aaqqiissutissaapput. Inuusuttut sisamat aallarnisaasut Odensemi suliffeqarfimmik Aaveq Robotics-imik pilersitsisut taama isumaqarput.
Taakku umiatsiaq Poca 600 GR MK1, qaammataasat nalunaarsuinerat atorlugit aquttoqarani ingerlanneqarsinnaasoq, ulluni makkunani inaarutaasumik suliarileruttorpaat. Umiatsiaq atortulersorlugu naammassippat Kalaallit Nunaannut nassiunneqassaaq, tassanilu Aaveq Roboticsip eqqagassalerinermik ingerlatsivik Esani suleqatigalugu qaammatini pingasuni misileraanissaa pilersaarutaavoq.
- Umiatsiat aquttoqanngitsut atorlugit nunaqarfinni avinngarusimasuni eqqakkat katersussavagut. Ajornartorsiut tamanna immakkut angallannikkut nalinginnaasumik aaqqinneqarsinnaasimanngilaq, maannali misilerparput, Aaveq Roboticsimi pisortaq Nicoline Louise Thomsen oqarpoq.
Poca 600 aquttoqanngitsoq Kalaallit Nunaanni nunaqarfinnut eqqakkanik aallertartoq Aaveq Roboticsimiit imatut takorluugaavoq.
Assi: Nammineq pigisaq.
Avataarsualiartaatiniit teknologii
Teknologii taanna avataarsualiartarnermiit ilisimaneqarluarpoq, tassa ungasianit aqulluni avataarsualiartarnermi atorneqartarput. Teknologii taanna Kalaallit Nunaanni atorneqarsinnaanersoq maanna apeqqutaalerpoq.
- Taamaattumik qaammataasatigut attaveqaatit atorsinnaanerlugit paasiniassavarput – sunalu pitsaanerpaanersoq. Paasissutissanik amerlasuunik peqarpugut – assiliivimmit, radarimit, angallatip motoorianit allarpassuillu – taakku umiatsiap aqunnissaanut attaveqaataassallutik. Taamaattumik ilaatigut 4G-mut attaveqaatit nalinginnaasut atortussanut soorlu Starlinkimut Onewebimullu sanilliutissallugit umiatsiamik attaveqarnermut naammattumik atuinissamut aaqqiissut pitsaanerpaaq nassaariniassallugu, Nicoline Louise Thomsen nassuiaavoq.
Umiarsuit angisuut nunaqarfinnut tikinnissaat utaqqineqaqqaanngikkaluarlutik, Aaveq Roboticsip assartuinermut periutsit allanngortilluinnarsinnaavai.
- Umiatsiaativut Kalaallit Nunaanni illoqarfinni anginerusuniitsissavagut. Silagitsillugu umiatsiat namminneq qaammataasatigut attaviit atorlugit nunaqarfinnukassapput. Tassani umiatsiat eqqakkanik immerneqariarlutik eqqagassalerisoqarfimmut iluamik suliarineqarsinnaanngorlugit utertinneqassapput, imaluunniit sumiiffimmiit ingerlaqqittussanngorlugit umiarsuarniit assartugassanngortinneqassallutik, Nicoline Louise Thomsen nassuiaavoq.
Nunaqarfinni eqqakkanik katersuineq ajornartorsiutaasartoq ilisimaneqarluarpoq. Eqqakkat umiarsuarmiit aaneqarnissaat utaqqitillugit amerlisarput – tamatumalu nalaani pinngortitamut mingutsitsisunngorlutik siammarsinnaasarlutik. Aamma eqqaavissuit ikuallassinnaasarput – Qaqortumi eqqaavissuaq 2023-mi ikuallammat suliniut aallartippoq.
Kalaallit Nunaanni nunaqarfinni eqqakkanik katersinermut umiatsiat aquttoqanngitsut atorneqartarsinnaannerannut isumassarsiaq, Qaqortumi eqqaavissuup 2023-mi ikuallannerani pinngorpoq.
Assi: Rick Wilhoit
Eqqarsalersitsisoq
- Qaqortumut paasisassarsiorluta angalanitsinni ikuallalerpoq, Nicoline Louise Thomsen oqaluttuarpoq.
- Tamanna eqqarsalersitsisorujussuuvoq. Ikuallannera annertulluni pujuliorujussuarpoq - eqqagassalerinermi unammilligassat sumiiffinni ataasiakkaani kisimi atuutinngitsut paasivarput, Kalaallilli Nunaat tamakkerlugu piusoq pinngortitamut mingutsitsinissamik aarlerinaatilik.
Nunaqarfinni eqqakkanik katersineq ukiumut ataasiaannarluni pisartarpoq – silagitsillugulu umiarsuarnik angisuunik aatsaat tikinneqarsinnaagaangata taamaaliortoqarsinnaasarluni. Sumiiffinni qulimiguulimmik umiatsiamilluunniit aatsaat tikinneqarsinnaasunut eqqakkat pinngortitamut siammarterneqaannartutullusooq pisarput. Tamanna akuerineqarsinnaanngilaq – tamaammallu iliuuseqarfiginiarparput.
Aallarnisaasut sisamat taakku Syddansk Universitetimi ilinniarsimapput, tassanilu avataarsuanut teknologi immikkut ilinniarfigalugu ilisimasaqarfigilernikuullugu. Kalaallit Nunaannik soqutiginnilerneq Magne Vethal Kanneworffiimiit aallartippoq, taanna meeraalluni Kalaallit Nunaanni najugaqarnikuuvoq.
Umiatsiaaqqamik Pocamik aquttoqanngitsumik misileraanik Industriens Fondimit, Innovationsfondenimit aamma UArcticimit aningaasaliiffigineqarpoq.
