Manuminap toquneraniit ukiut pingajusut qaangiunneranni nipaatsumik akerliussutsimik takutitsineq
Niviarsiaqqamut arfinilinnik ukiulimmut, ukiut pingasut matuma siorna toqusumut, ataataasoq akisussaaffimmik tigusisoqarsimanngitsoq misigaaq. Taamaammat akerliussutsimik ullumi takutitsisoqarpoq.
Manuminap angajoqqaavi ullumi Inatsisartunut takutitsinermi.
Assi: Oscar Scott Carl
Manumina arfinilinnik ukiulik Dronning Ingridip Napparsimmavissuani neqaajartereernermi qingaaniittullu tinupasut peerlugit suliaritereernermi kingorna toquneranit ullumi ukiut pingasut qaangiupput.
Naak piffissami sivitsortumi maalaaruteqartoqartaraluartoq, politiinut tunniussisoqaraluartoq peqqinnissaqarfimmilu ileqqorissaarnermut ataatsimiititaliamit misissuisoqareeraluartoq, Manuminap angutaa Frederik Olsen oqartussat akisussaaffimmik tigusisimanerattut misiginngilaq.
Taamaattumik Inatsisartut ataatsimiittarfiata silataani nipaatsumik akerliussutsimik ullumi takutitsivoq.
- Inatsisartuniit alianaqisumik eqqorneqarnerput qisuariartoqarneq ajormat innuttaasutullu taakkunaniit illersorneqannginnerput aamma politiiniit pisuussuteqartunut pineqaatissiisoqanngimmat akerleralugu inatsisartut saavanut ersarissumik allagartaqarlunga nipangersimaannarlunga peerneqarnissama tungaanut nikorfaniarpunga, Frederik Olsen tusagassiuutinut allappoq.
Toqusoqarneranit ukiut pingasut qaangiunneranni akerliussutsimik takutitsinermi allagartat.
Assi: Oscar Scott Carl
Isornartorsiorneqartoq kinguneqartitsisoqaranili
Manuminap toqunera aammik annaasaqarnerminiit uummatiminik tunittoorsimaneranik pissuteqartoq allassimavoq. Manumina Olsenip 2023-mi juunip pingajuani toqunissaata tungaanut napparsimmavimmi sullinneqarneraniit allagaatit amigaateqarput, naak ilaqutariit Manumina aattalimmik meriartarnera pillugu ajoqusersimasunut nakorsiartarfimmut attaveqartarnikuugaluartut.
Tamatuma kingorna katsorsaanerup, peqqinnissaqarfimmi sulisut angajoqqaallu attaveqaqatigiinnerat aamma napparsimmavimmi journalimut allattuineq misissorneqarsimapput, peqqinnissaqarfiullu ileqqorissaarnermut ataatsimiititaliaanit aalajangiiffigineqarlutik.
Aalajangiinermi Dronning Ingridip Napparsimmavissuani sulisut marluk journalimut allattuinerisa amigaateqarnerat isornartorsiorneqarput, Manumina Olsenillu suliarineqanerata kingorna amigartumik isumagineqarnikuunerani. Taamaakkaluartoq Frederik Olsen oqarneratut kinguneqartitsisoqarnikuunngilaq.
Ilaqutariit pisoq politiinut aamma nalunaarutigaat. Kalaallit Nunaanni Politiit napparsimmavimmi sulisut isornartorsiorneqareernerisa suliaq unitsippaat.
Akerliussutsimik takutitsinermut inuppassuit Frederik Olsenip Manuminap toqunerata kingorna iliuuseqartoqannginneranut akerliussutsimik takutitsineranut tapersersuiartorlutik takkupput.
