METTE FREDERIKSENIP DANSKIT NAALAKKERSUISORTAAVI SAQQUMMIUPPAI
Lars Løkke nunanut allanut tunngasunut minitseriuinnassaaq
Danmarkimi ministerinngortut allattorsimaffiat tamanut saqqummiunneqarpoq, tassanilu ilaatigut Lars Løkke Rasmussen nunanut allanut tunngasunut ministeritut ingerlaqqittoq takuneqarsinnaavoq.
Danmarkimi naalakkersuisut nutaat saqqummiunneqarnialermata, nunanut allanut tunngasunut ministeri Lars Løkke Rasmussen pingasunngornermi ministeriuneqarfimmut apissippoq.
Assi: Ida Marie Odgaard/Ritzau Scanpix
Mette Frederiksenip naalakkersuisuisa pingajussaani ministerit 21-upput, taakkunannga arnat aqqaniliupput angutitaallu quliullutik. Ministeriuneqarfimmit ministerit allattorsimaffiat pingasunngornermi saqqummiunneqarpoq.
Ministerinngortut ilaat qinigaaffiup siuliani Kalaallit Nunaannut sunniuteqarluarsimasuuvoq, tassaavorlu Moderatineersoq nunanut allanut tunngasunut ministeri Lars Løkke Rasmussen. Ministeritut ingerlaqqittoq, ministeriuneqarfiup allattorsimaffianni takuneqarsinnaavoq.
Ilaatigut taamanikkut naalakkersuisuusoq Vivian Motzfeldt peqatigalugu Washingtonimi ukioq manna januaarimi, USA-p præsidentiata Donald Trumpip Kalaallit Nunaannut tatisinerata sukaruttorfiani, USA-p nunanut allanut tunngasunut ministeria Marco Rubio præsidentillu tullia JD Vance ataatsimeeqatigaat.
Illersornissamut ministeri taarserneqartoq
Ministereqarfik alla Kalaallit Nunaannut immikkut pingaaruteqartoq tassaavoq illersornissaqarfik.
Danmarkip ukiuni makkunani illersornissaqarfia nukittorsarniarlugu aningaasarpassuarnik aningaasaliisoqarpoq, aamma Kalaallit Nunaannut. Illersornissamut ministeri aningaasaliissutit taakku pillugit Naalakkersuisut isumaqatiginninniarfigineranni immikkut inissisimaffeqartarpoq.
Illersornissamut ministeriusimasoq Venstremilu siulittaasoq Troels Lund Poulsen naalakkersuisooqatigiilersuni peqataanngimmat Danskit naalakkersuisui nutaamik illersornissamut ministeritaartussanngorput.
Ministeriuneqarfimmiit allattorsimaffik naapertorlugit socialdemokraatigisoq Jeppe Bruus illersornissamut ministerinngussaaq. Jeppe Bruus partiini pingasuni naalakkersuisoqatigiinnikuni aningaasaqarnermut akileraartarnermullu ministeriunikuuvoq.
Peqqissutsimut ministerinngortup taarsiissutissat pillugit inatsisissaq pingaarutilik saqqummiutissavaa
Peqqinnissaqarfik aamma pingaaruteqarpoq, tassanilu Ida Auken (Socialdemokraterne) ministerinngortinneqarpoq.
Spiralilersuinermi eqqugaasut taarsiiffigineqarnissaata naammassineqarnissaat taassuma isumagissavaa.
Danmarkip Kalaallit Nunaat assigalugu eqqugaasut taarsiiffigineqarnissaat neriorsuutigaa, Folketingimulli qinersisoqarnissaa pissutigalugu suliaq unitsikkallarneqarnikuulluni.
"Kalaallit arnat Kalaallit Nunaanni 1960-imiit 1991-imut naartunaveersaatinik ikkussiffigineqarsimasut taarsiiffigineqartarnissaannik aaqqissuussineq pillugu “danskit naalakkersuisortaavisa tunngavianni, danskit naalakkersuisui piaarnerpaamik inatsisissatut siunnersuuteqassasut", allassimavoq.
Isumaginninnikkut suliassarpassuaqarpoq
Isumaginninnermut tunngasut eqqarsaatigalugit ministerinngortoq Monika Rubin (Moderaterne) suliassarpassuaqarpoq.
Danmarkip kalaallit meerartai Danmarkimi arsaarinnissutaasarnerat pillugu Naalagaaffiit Peqatigiinnit isornartorsiorneqarpoq.
Siullertut, nunap inoqqaavisa pisinnaatitaaffii qulakkeerneqassasut aamma nunat tamalaat akornanni nunap inoqqaavisa pisinnaatitaaffiinut najoqqutassiat qanoq annertutigisinnaatiginerat misissorneqassasoq danskit naalakkersuisortaavisa tunngavianni allassimavoq.
Aappaattut, kalaallit meerartaat Danmarkimiittut atugarissaarnissaat aamma kalaallit ilaqutariit pisinnaatitaaffii qulakkeerneqassapput, inatsisitigut assigiimmik illersorneqarsinnaanerat siunertaralugu, meeqqat inissiisarfinniittut pillugit suliat tamarmik misissorneqassapput.
Aningaasaqarnermut ministeri nutaaq
Aammattaaq Danmark nutaamik aningaasaqarnermut ministeritaarpoq, tassa Peter Hummelgaardip Nicolai Wammen taarserpaa.
Nicolai Wammen inatsisinik atuutsitinermut ministerinngorpoq.
PAASISAT: Danmarkimi ministerit 21-it allattorsimaffiat
Mette Frederiksenip naalakkersuisuisuisa pingajuisa ministerii 21-t:
Ministeriuneq Mette Frederiksen (S)
Aningaasaqarnermut nunamullu namminermut ministeri Pia Olsen Dyhr (SF)
Nunanut allanut tunngasunut ministeri Lars Løkke Rasmussen (M)
Inuussutissarsiornermut unammilleqatigiinnermullu ministeri Martin Lidegaard (R)
Aningaasaqarnermut ministeri Peter Hummelgaard (S)
Inatsisinik atuutsitinermut ministeri Nicolai Wammen (S)
Ilisimatusarnermut, ilinniartitaanermut digitalinullu ministeri Christina Egelund (M)
Silap pissusaa pillugu, nukissiornermut pilersuinermullu ministeri Samira Nawa (R)
Illoqarfinnut, nunamut angallannermullu ministeri Signe Munk (SF)
Nunanit allaneersut akulerutsitsiniarnermullu ministeri Morten Bødskov (S)
Ilinniartitaanermut ministeri Magnus Heunicke (S)
Suliffeqarnermut naligiissitaanermullu ministeri Ane Halsboe-Jørgensen (S)Forsvarsminister Jeppe Bruus (S)
Illersornissamut ministeri Jeppe Bruus (S)
Peqqissutsimut oqaluffiullu iluani sulianut ministeri Ida Auken (S)
Pinngortitamut uumasullu atugarissaarnissaannut ministeri Christian Rabjerg Madsen (S)
Kulturimut ministeri Zenia Stampe (R)
Innuttaaqatigiinni isumannaallisaanermut upalungaarsimanermullu ministeri Lisbeth Bech-Nielsen (SF)
Meeqqanut, utoqqarnut ineqarnermullu ministeri Jacob Mark (SF)
Isumaginninnermut nunanilu avannarlerni suleqatigiinnermut ministeri Monika Rubin (M)
Avatangiisinut ministeri Maria Reumert Gjerding (SF)
Najoqqutaq: Ministeriuneqarfiup tusagassiuutinut nalunaarutaa
