Sisak akitsorterussinikkut tunineqartoq

Kalaallit Nunaanni politiit 2016-imiit 2020-mut angallatit Sisaat taarsersorneqartariaqartut aalajangerpaat. Angallatit 1990-ikkut qiteqqunneranniilli Kalaallit Nunaanni atorluarneqarsimaqisut. Angallatini nutaani katillugit tallimaasuni pigineqalertussani pingasut siulliit 2021-mi tiguneqarput, taakkulu naleqqussarluarnerusinnaallutillu sukkanerusumik ingerlasinnaapput.

Titarnerit sungaartut qallerlugit qalipanneqassapput

Angallatit Sisaat tulleriaarlugit akitsorterussinikkut tuniniarneqaqattaarput. Taakkununngalu assingusoq alla B2B Auctions-imi 1,5 millionit koruunit aallarnerfigalugit qanittukkut akitsorterunneqarpoq.

Ulloqeqqarnissaanut minutsiinnanngortoq 3,1 millionit koruunilerumallugu neqeroortoqarpoq ajugaallunilu, pisisullu angallat atortui politiinit pigineqanngitsut tamaasa ilanngullugit Nuummut aasussanngorlugu. Piginnittunngortulli "Politi"-mik allassimanera titarnerillu sungaartut qallerlugit qalipannissaa pisussaaffigaa.

Aammattaaq atortorissaarutit radiollu nutarterneqassapput, aatsaallu tamanna uppernarsarneqareerpat umiarsuaq nalunaarsorneqaqqissinnaassalluni. 

Angallatit tallimat nutaat

Kalaallit Nunaanni Politiit nutaanik tallimanik maanna angallateqarput, tassaasut Nukik Qaqortumiittoq, Nakuaq Nuummiittoq, Ilik Sisimiuniittoq, Kimik Aasianniittoq aamma Malik Tasiilamiittoq. Tasiilamiittoq Malik minnerulaartoq eqqaassanngikkaanni angallatit taakku ilaasunut aqqaneq-marlunnut inuttanullu marlunnut inissaqartitsipput. 25 knobimik sukkassuseqarput ilaatigut ujaasinermi inunnik sumiissusersiornermut assiliivimmik kiassiorsinnaasumik aamma taartumi angalanermi immikkut ittumik seqersittakkanik atortulersugaallutik. Aamma inunnik annaassiniarnermut kivitsissutinik atortoqarput ajoqusersimasunullu nalaffigineqarsinnaasumik peqarlutik. Aamma allaffeqarput.

Angallatit Sisak II aamma Sisak III siornatigut tuniniarneqarnikuupput.

Eqqortumik aalajangernerusoq paasinarsivoq

Politiit pisortaata Bjørn Tegner Bayip angallatinik nutaanik pisineq ima oqaasertalerpaa:

– Politiit angallataannik ukiut ingerlanerini qanoq atuisarsimanerput, pisuni suni angallatit pisariaqartinnerusarnerivut, aamma Kalaallit Nunaanni Politiit sunik suliassaqarnersut pillugit misissuinerit tunngavigalugit umiarsuarnik angisoorsuarnik arriinnerusumik ingerlasartunit Sisattut ittunit atuinerput allanik taarsissallugu ukiut tallimat matuma siornatigut aalajangerparput. Taamaasilluta angallatinik minnernik glasfiberimik aluminiumimillu sanaajusunik sukkanerusunik (sisamanik) taarserlutigit.

– Sukkasuumik iliuuseqarnissamik pisariaqartitsiffiusuni ikiulertortoqarsinnaaneq pisariaqartinnerpaagipput misissuinerup takutimmagu taama aalajangertoqarpoq.

 – Eqqortumik aalajangernerusoq paasinarsivoq.

 – Angallatit nutaat sinerissami ujaasinermi annaassiniarnermilu (SAR) atortarpavut, kiisalu assersuutigalugu pinerlunnermik ilungersunartumik nalunaaruteqartoqartillugu nunaqarfinnut piaartumik orniguttarnermut. Taamaattoqartillugu piffissaq sukkassuserlu aalajangiisuusinnaapput. Angallatit suliassanut ataavartumik suliarineqartartunut aamma atortarpavut, assersuutigalugu nunaqarfinnut suliani minnernut tunngatillugu misissuiartornermik pinerlunnermik pinaveersaartitsinermullu. Illoqarfiit akornanni aamma angallatigineqarsinnaasarput. Assersuutigalugu unnerluussisussaatitaasoq illoqarfimmut allamut eqqartuussivimmut suliartussappat, politiit tigummigallagassamik angallassineranni, imaluunniit illoqarfiit avataani atorfimmut atatillugu aallaasaartarfitsinnukartilluta.

 – Kalaallit Nunaanni Politiit angallataat sukkasuut, Issittumi Sakkutooqarfiup umiarsuaatai alapernaarsuutit, timmisartut qulimiguullit, Air Greenlandip qulimiguuliutai annaassiniarnermi atorneqartartut, qatserisartut kiisalu namminneq kajumissutsiminnik suliniaqatigiiffiit soorlu Qamutit SAR Group annaassiniarnermut atatillugu ikioqatigiilluartartut isumaqarpunga. Taamaalilluta inuiaqatigiittut ataatsimut avataani, sinerissap qanittuani, qaqqani Sermersuarmilu annaassiniarnermut sapinngisamik pitsaanerpaamik piareersimasinnaallutalu annaassiniarnissamik ikiuussinnaasunik peqarluarpugut, Bjørn Tegner Bay oqarpoq.

 Allaaserisaq Motoorimi saqqummersinneqarpoq. Motoori uani atuarneqarsinnaavoq