Ataatsimut isigalugu: Naalakkersuisut arfinillit, naalakkersuisooqataasut marluk nikinnerillu arlallit – Qinersinerup kingorna Naalakkersuisut ima ingerlasimapput

Naalakkersuisut ukiup aappaa avillugu matuma siorna aallartinnerminniit ikinnerujussuupput. Naalakkersuisut partiillu kikkut suleqataajunnaarsimanersut soorlu taamaaliornersut uani atuarsinnaavat.

Taamani 2025-mi naalakkersuisooqatigiit Demokraatit, IA, Siumut aamma Atassut aallarteqqaaramik aammalu naalakkersuisooqatigiinnissamut isumaqatigiissut saqqummiuteqqaaramikku taamatut isikkoqarput.
Saqqummersinneqarpoq

Marsip aqqarnganni qinersinerup kingorna naalakkersuisut nutaat qulit naalakkersuisooqatigiinnissamik isumaqatigiissuteqartut Demokraatit, Inuit Ataqatigiit, Siumut aamma Atassut isumaqatigiissumminnik saqqummiussineranni nuannaarlutik Katuami 2025-mi marsip 28-iani saqqummiussipput.

Taakkuullutik inatsisartuni inissat 23-it inissiffigalugillu taamaalillutik amerlanerussuteqarnerat qajannaattutut inissisimavoq. Maanna ukioq ataaseq qaammatillu arfineq-pingasut qaangiussimalerput. Naalakkersuisooqatigiilli tamatuma kingorna ikiliartulerlutillu maanna amerlanerussuteqarnerat annikinnerulersimavoq.

Manna tikillugu Naalakkersuisuni ilaasortat arfinillit assigiinngitsunik pissuteqarlutik Naalakkersuisutut tunuarnikuupput, tamatumalu ilutigisaanik partiit marluk naalakkersuisooqatigiinni suleqatigiinnermit aamma tunuarnikuullutik. Marloriarluni nikisiterinerup naalakkersuisussanillu nutaanik ivertitsinerup ajornartoorneq pinngitsoortissimavaa.

Matumani 2025-mi marsip  kingorna Naalakkersuisut oqaluttuassartaat ataatsimut isigalugu atuarsinnaavat.

Sulisussarsiorfik pillugu perulluliorneq

Naalakkersuisut pilersinneqarnerisa kingorna qaammatit arfineq pingasut qaangiunnerini naalakkersuisooqatigiit avissaartuullutik aallartipput, tamannalu naalakkersuisup Bentiaraq Ottosenip (A) 2025-mi novembarip 13-iani tunuarneranik kinguneqarpoq.

Bentiaraq Ottosenip tunuarneranut pissutaasoq tassaavoq sulisussarsiorfiup nutaamik aaqqissuunneqarnissaani suliap perulluliutaanera, tassanilu Inatsisartut Aningaasaqarnermut Akileraartarnermullu Ataatsimiititaliaannut aningaasaliissutissat akueriteqqaarnagit suliaq aallartinneqarsimaneragaavoq.

Kommune Qeqertalimmi kommunalbestyrelsimi ilaasortaq Maritha Broberg partii sinnerlugu naalakkersuisutut ivertinneqassasoq Atassut decembarip qaammataani innersuussivoq. Taamaattorli qaammatit arlallit aatsaat ingerlareermata, taanna atuuffissaminut aatsaat ikkunneqarpoq.

Naalakkersuisoq alla tunuartoq

2025-mi Decembarip qulingiluaani, Bentiaraq Ottosenip tunuarnerata kingorna qaammat ataaseq qaangiutinngitsorluunniit naalakkersuisoq alla aamma tunuarniuteqarluni nalunaarpoq.

Tamatumuuna Mads Pedersen, qinikkatut inissisimanngitsoq, taamaattorli IA-mit innersuunneqarluni meeqqanut, inuusuttunut ilaqutariinnullu naalakkersuisunngortinneqarnikuusoq tunuarniuteqarpoq.

Taassuma inuttut pissutissaqarneq tunuarnerminut pissutaatippaa.

- Iperarsinnannginnakkit suliakka. Taava angerlarsimagaangama meeqqama oqaluukkaannga tusaagaluarlugit paasinngitsoortarakkit, Mads Pedersen KNR-imut oqarpoq.

Siumup naalakkersuisooqatigiit qimakkai

Naalakkersuisooqatigiit tunuliaqutaasa ilaat - 2026-mi marsip 13-iani – Inatsisartunut qinersinerup ukioq ataaseq qaangiunnerani  suleqataajunnaarpoq. Partiip suleqatigiinneq qimakkaa Siumut Jens-Frederik Nielsenimut nalunaarpoq.

Piffissap taamaalinerani Mads Pedersenip Bentiaraq Ottosenillu naalakkersuisoqarfii suli inuttalerneqaratik Naalakkersuisunit pioreersunit allanit isumagineqarput. Tamannalu Siumup siulittaasuanit Aleqa Hammondimit isornartorsiorneqarpoq.

Naammaginniliineq kingulleq tassaavoq, Naalakkersuisuni ilaasortat marluk, Anna Wangenheimip (D) Naaja H. Nathanielsenillu (IA), folketingimut qinigassanngortillutik sassarnerat.

Siumup suleqatigiinnit aninerata kingunerisaanik Naalakkersuisut naalakkersuisumik ataatsimik annaasaqarput. Nunanut allanut Naalakkersuisoq, Vivian Motzfeldt, partiini peqatigalugit taamanikkut naalakkersuisooqatigiit qimattariaqalerpai.

Siumup tamatuma malitsigisaanik Inatsisartuni inissaatimi affai sivitsunngitsoq qaangiummat annaavai. Vivian Motzfeldt 2026-mi marsip 17-iani partiimit anillunilu attaviitsunngorpoq. Taanna kingusinnerusukkut Demokraatinut ilaasortanngorpoq.

Ullorlu taanna naanngitsoq ukiorpassuarni Siumut sinnerlugu politikkikkut sullissisimasoq Kim Kielsen aamma nammineq attaviitsunngorluni nalunaarpoq – taamatullu manna tikillugu inissisimavoq, taamaattorli naalakkersuisooqatigiinnut tapertaalluni. Taamaalilluni aamma taassuma Inatsisartut siulittaasuattut inissisimanini tigummiinnarpaa.

Folketingimut qinersineq Naalakkersuisumik ataatsimik pilliuteqarfiusoq

Oqaatigineqareersutut folketingimut qinersisimaneq 2026-mi marsimi ingerlanneqartoq naalakkersuisooqatigiinnik aalassatsitsinikuuvoq.

2026-mi marsip 24-iani qinersisoqarpoq, tamatumalu malitsigisaanik naalakkersuisoq Naaja H. Nathanielsen (IA) folketingimi Kalaallit Nunaata inissaata aappaanut inissippoq.

Naalakkersuisut taamaalillutik Naalakkersuisunik sisamanik ukiup affaata ingerlanerani annaasaqarlutillu tamatuma kingunerisaanik Naalakkersuisut arfiniliinnanngorput.

Nikisitsinissaq utaqqineqaqisoq

Inatsisartut upernaakkut ataatsimiinnerat 2026-mi apriilip 14-iani aallartippoq, Naalakkersuisullu siulittaasuata Jens-Frederik Nielsenip Naalakkersuisut nutaat ataatsimiinnerup aallartinnerani ilisaritippai.

Naalakkersuisunngortut nutaat sisamat saniatigut naalakkersuisooreersut nikisiterneqarlutillu akisussaaffiit tamassuma malitsigisaanik allanngortinneqarput.

Naalakkersuisut nutaat sisamat tassaapput Jørgen Rosbach (D), Iddimanngiiu Jensen Bianco (IA), Maritha Broberg (A) aamma Mariane Paviassen Jensen (IA).

Múte B. Egede (IA) nunanut allanut naalakkersuisunngorlunilu taamatuttaaq Aqqaluaq B. Egede (IA) aningaasaqarnermut naalakkersuisunngorpoq.

Atassut naammagiliisoq

Ukiup affaata missaani naalakkersuisooqatigiit eqqissisimakannersumik ingerlapput. Taamaattorli aamma partii suleqataasoq ataaseq tunuarpoq aningaasanik atornerluisoqarsimaneranik suliaqarnermik pissuteqartumik.

Nunatta karsiata 2025-mi naatsorsuutaasa suliarineqarnerani paasinarsivoq, Naalakkersuisut ilisimasimagaat, qimussertartut kattuffiata KNQK-p tungaanit 2025-mi tapiissutit ilai missingersuusiarineqarsimasumut akuerisaasimasumullu sanioqqutsilluni siunertarineqanngitsunut atorneqarsimasut.

Suliaq pissutaalluni naalakkersuisooqatigiinni partiit minnersaata suleqataaginnarnissani apeqqusersulerpaa. Tamatuma malitsigisaanik Atassutip siulersuisuuneri novembarip arfineq pingajuanni aalajangerpoq, Nivi Olsen naalakkersuisutut tunuarnianngippat, namminneq naalakkersuisooqatigiinnit aniniarlutik.

Atassut naalakkersuisooqatigiinnit tunuarlutik 2026-mi ataasinngornermi novembarip qulingiluaani nalunaaruteqarpoq, taamalillutillu naalakkersuisooqatigiit naalakkersuisoq Maritha Broberg (A), partiini peqatigalugu naalakkersuisooqatigiinnit tunuarmat naalakkersuisumik ataatsimik annaasaqaqqipput.

Nivi Olsen tunuartoq

Atassutikkut kissaatertik pivaat, kingusinaalaarlutilli. Nivi Olsen KNQK pillugu suliaq pissutigalugu naalakkersuisutut 2026-mi novembarip qulingani tunuarpoq.

Taamaalilluni allaaserisap suliarineqarnerani Naalakkersuisut quliusaraluarlutik arfineq pingasuinnaapput.

Naalakkersuisuni ilaasortassat nutaat sivitsunngitsoq qaangiuppat toqqarneqarumaartut Jens-Frederik Nielsen oqarpoq.

Partiit sisamat naalakkersuisooqatigiinnik siammasissunik pilersitsigamik ukiup aappaata affaata matuma siorna eqisimaarlutillu nammaqatigiipput – tamannalu nunanut allanut tunngasutigut annertoorujussuarmik nunatta ukkatarineqarnerata nalaani avammut nukittuumik nalunaarneruvoq. Maanna avataaniit tatisimaneqarneq sakkukilliartulersutut inissisimavoq, paarlattuanilli naalakkersuisooqatigiit avissaartuupput.

IA Demokraatillu suleqatigiinnertik nangittumik ingerlanneqassasoq nalunaarput. Taakku 18-nik ilaasortaatitaqarlutillu Kim Kielsen tapersersortigaat, taamaalillutillu suli amerlanerussuteqarput.

Annikitsumik nikisitsineq ilaasortanngorlaallu

Naalakkersuisut nutaat 2026-mi ataasingornermi novembarip 16-iani ivertinneqarput. 

Ilaasortat nutaat marluupput: Stine Egede, IA sinnerlugu naalakkersuisunngortinneqartoq, kiisalu Jens-Erik Kirkegaard, Demokraatit sinnerlugit naalakkersuisunngortinneqartoq. 

Stine Egede isumaginninnermut, suliffeqarnermut, ilaqutariinnut nunamullu namminermut naalakkersuisunngussaaq. Taanna Kommune Kujallermi IA sinnerlugu kommunalbestyrelsemi ilaasortaagami taamaalilluni sulinngiffeqarnissaminik qinnuteqarpoq.

Jens-Erik Kirkegaardip avatangiisinut, pinngortitamut, nukissiornermut ilisimatusarnermullu naalakkersuineq Jørgen Rosbachimit (D) nangillugu akisussaaffigilerpaa, taannalu taarsiullugu ilinniartitaanermut, kultureqarnermut, timersornermut ilageeqarnermullu naalakkersuisunngorpoq.

Jørgen Rosbach kisimi pinnani naalakkersuisunut ilaasortat sinnerisa akisussaaffitik tigummiinnassavaat.

Naalakkersuisut nutaat 20-nit akuerineqarput, akerliliisoqaranilu arfineq-pingasut taasinngillat.

Powered by Labrador CMS