INATSISARTUT SAPAATIP AKUNNERANI MATUMANI
Ataatsimut isigalugu: Aningaasaqarnermut inatsit, innarluutilinnut inatsit aamma aalisarnermut inatsit
Ukiaanerani ataatsimiinneq naammassiartuaarpoq. Sapaatit akunnerani aggersumi siunnersuutit ilaat politikerit oqaluuserisassaat allaatigisami uani paasisaqarfigisinnaavatit.
Ukiaanerani ataatsimiinnerup immikkoortua siulleq sapaatit akunnerani uani naammassissaaq.
Assi: Oscar Scott Carl
Inatsisartut ulluni sisamani – ataasinngornermiit sisamanngornermut – sapaatit akunnerani uani ataatsimiissapput.
Pilersaarutit naapertorugit, Inatsisartut januaarip naanerani aallarteqqinnissaata tungaanut, ukiaanerani ataatsimiinnerup immikkoortua siulleq sisamanngornermi naammassissaaq.
Suulli eqqartorneqassappat? Ullormut oqallisissatut allattorsimaffiit Sermitsiamiit atuarpagut siunnersuutillu tigulaariffigalugit.
Aningaasaqarnermut inatsit
Ataasinngornermi novembarip 16-ani ullormut oqaluuserisassaq ataasinnaavoq. 2027-mut aningaasaqarnermut inatsit pingajussaaneerneqassaaq.
Partiit sisamat aappaagumut aningaasaqanermut inatsisissatut isumaqatigiissut ataasinngornermi novembarip 9-ani saqqummiuppaat. Demokraatit, Inuit Ataqatigiit, Atassut aamma Siumut ataatsimoorput.
Ulluunerani paaqqinnittarfiit ilaqutariinnut meerartalinnut akeerutsinneqarnissaat, angajoqqaallu akiliutaat 2028-miit nunatta karsianit matussuserneqarnissaat ilaatigut isumaqatigiissummi ilaavoq.
Soraarnerussutisiallit soraarnerussutisiaminnit ilaanngaaffigineqaratik sulisinnaalernissaat aamma periarfissaalissaaq.
Oqaluffiit ukiuni sisamani ukiumut fem millioninik pissapput, timersornerlu 2027-mi aamma 2028-mi fem millioninik pissarsissasoq.
Avaleraasartuut, ammassassuit saarullernaallu akitsuutaasa qaffannerannit isumaqatigiissut aningaasalerneqassaaq, ukiuni 2027-2030 ukiumut 30,0 millionit koruunit, isertinneqartarnissaat naatsorsuutigineqarpoq, piffissaq tamakkerlugu 120,0 millioniupput.
Innarluutilinnut inatsit
Inuit innarluutillit tapersersorneqarnissaannut Naalakkersuisut inatsissatut siunnersuutaat, marlunngornermi novembarip 17-iani Inatsisartuni pingajussaaneerneqassaaq.
Tapersersorneqarnissamut periarfissat nutaat, sulinneqarneq ajunnginnerusoq, pinaveersaartitsinermik aallussineruneq, qanigisamit paarineqarnissamut periarfissaq, inuusuttuunermiit inersimasunngornermut ikaarsaarneq pitsaanerusoq aamma tikeraarluni angalanermi pisinnaatitaaffiit pitsaanerusut siunnersuummi nutaami ilaapput.
Kommunit siunnersuummut akissuteqaamminni aningaasaliinissaq ernunartippaat. Naalakkersuisut naatsorsuutaannit aningaasartuutissat annertunerujussuunissaat aarlerissutigaat.
Aappassaaneerinninnermi peqqissutsimut inunnullu innarluutilinnut naalakkersuisup Anna Wangenheimip (D), nassuerutigaa, innarluutilinnut suliassaqarfimmi aningaasartuutit kisinneqarnerat nalorninartoqartoq, innarluutilinnut suliassaqarfimmi paasissutissanik amigaateqarneq annermik peqqutigalugu.
Suliassaqarfimmi paasissutissat tunngaviusut pitsanngorsarniarlugit suleqatigiissitaliortoqarnissaa siunnersuutigineqartoq ilisimatitsissutigaa. Suleqatigiissitap inatsisissatut siunnersutip kingunerisassai qanimut malinnaavigissavai.
Ilaqutaariinnut peqqissutsimullu ataatsimiititaliap siunnersuutip pingajussaannginnerani innersuussutigineqaqqinnissaa kissaatigaa. Naalakkersuisut oqaatsitigut naqqissukkamik allannguutissatut siunnersuummik tunniussipput, ataatsimiiitaliallu akuersissutigineqarnissaa innersuussutigaa.
Aalisarnermut inatsit
Naalakkersuisut aalisarnermut inatsimmut allannguutissatut siunnersuutaat Inatsisartuni pingasunngornermi novembarip 18-ani pingajussaaneerneqassaaq.
Piujuartitsilluni aalisarnermik ineriartortitsinermut siunnersuisunik pilersitsisoqarnissaa ilaavoq, aalisariutillu seks meteri inorlugu angissusillit akuersissutaatilinnik ingerlanneqarlutik aalisarnissannut piumasaqaat peerneqassaaq.
Aalisarnermut, Piniarnermut Nunalerinermullu ataatsimiititaliamit kaammattorneqarlutik Naalakkersuisut aappassaaneerinissamut allannguutissatut siunnersuummik saqqummiussipput.
Tassani ilaatigut aalajangersagaq ikkunneqarpoq, akuersissummik ataatsimik piginnittumut aalisariutit seks meteri inorlugu angissusillit qassiussanerannik killiliisinnaanernik Naalakkersuisunut pisinnaalersitsisoq, taamaalilluni aningaasaatillit umiatsianik pisisinnaannginniassamata allanillu aalisartussanik atorfinititsisinnaannginniassammata.
Allannguutissatut siunnersuut appassaaneerneqarnermini akuersissutigineqarpoq siunnersuullu taamaatillugu pingajussaaneerneqartussanngortinneqarluni.
Sullualuk
Ukiaanerani ataatsimiinnerup ulluani kingullermi, siullermiigassat arlallit suliarineqassapput, apeqquteqaatillu aallaavigalugit oqallittoqassalluni.
Inatsisissatut siunnersuutinut ilaavoq Sullualummut atatillugu Avannaani Avannaata-Kitaanilu imartatsinni umiarsuit angallannerisa annertusiartorsinnaanerata piniarfinnut, immami miluumasunut najukkamilu inuussutissarsiornikkut soqutigisanut kingunerluutigisinnaasai pinaveersaartinniarlugit iliuusissanut pilersaarummik suliaqarnissamik siunnersuut.
Siunnersuut Isak Johannessenimit (N) saqqummiunneqarpoq.
Siunnersuummut tunngaviuvoq umiarsuit angallannerisa annertunerulerneranik nipiliornerup mingutitsinerullu imaani miluumasut angalaanerinut akorngutaasinnaanerat, piniartullu piniariartarfitoqqanut killilersorneqalernissaannut aarleqquteqarneq.
Nakkutilliineq, upalungaarsimaneq pisortaqarfinnillu attuumassuteqartunik suleqateqarneq iliuusissatut pilersaarummi ilaassapput.