Rusland: Qullersat ataatsimiinnerisa pingaaruteqassusia nalilersoruminaatsoq

Trumpip, Putinip aamma Xillu ataatsimiinnissaat sioqqullugu Korea Avannarliup, aqutsisuanik naapitsinissaq periarfissaasinnaasoq Trumpip oqaatigaa.

Saamerlermit talerperlermut takuneqarsinnaapput, Ruslandip præsidentia Vladimir Putin, Kinap præsidentia Xi Jinping aamma USA-p præsidentia Donald Trump. Siuttut taakku sisamanngornermi Kinami illoqarfimmi Shenzhenimi naapinnissaat pilersaarutaavoq.
Saqqummersinneqarpoq

Ruslandip, Kinap USA-llu præsidentiisa ataatsimeeqatigiinnerisa pingaaruteqassusia "nalilersorneqarsinnaanngilaq". Kinami Shenzhenimi ataatsimiinnerup ingerlanneqarnissaa sisamanngornermi pilersaarutaavoq.

Ruslandip præsidentiata Vladimir Putinip nunanut allanut tunngasunut siunnersortaa Jurij Usjakov taama oqarpoq.

- Ataatsimiinnerup pingaaruteqassusia isumaa ilisarnaataau nalilersorneqarsinnaanngillat, taanna AFP naapertorlugu tusagassiortunik katersortitsinermi oqarpoq.

Nunat taakku pingasut Iran, Ukraine,  atomimillu sakkussiorneq annikillisarnissaa pillugit oqaloqatigiinnissaat USA-p præsidentiata Donald Trumpip pingaartippaa.

Det Hvide Husip silataani, Asiamut angalanissani sioqqullugu Trump tusagassiortunut taama oqarpoq.

Asiami angalanerminut atatillugu Korea Avannarlermi siuttuusoq Kim Jong-un naapissinnaallugu Reuters naapertorlugu Trumpip oqaatigaa.

Tamassuminnga aalajangiinissamut "Xi Jinping apeqqutaasoq" Trump oqarpoq.

- Præsidenti Xi naapissavarput, præsidenti Putin naapissavarput, aamma immaqa Kim Jong-un naapissavarput. Tamanna pitsaassaaq. Annertuumik angusaqarnissamut periarfissaqarpugut, Trump oqarpoq.

Præsidentit pingasut Apecip, tassa Asiami suleqatigiinnermut kattuffiup, ataatsimeersuarnerata nalaani naapikkunik "nunarsuarmi eqqissineq" oqaluuserissagaat Kinap nunanut allanut ministereqarfiani oqaaseqartartup nalunaarutigaa.

Trumpip, Putinip aamma Xip suut oqaluuserissaneraat pillugit paasissutissat amerlanngitsut Kinap saqqummiuppai.

Oqaaseqartartulli naapertorlugu siuttut "nunarsuarmi eqqissinerup illersorneqarnissaa nunallu angisuut akornanni attaveqatigiinnermi periusissatigut patajaassutsip siuarsarneqarnissaa pillugu itisuumik isumassarsianik paarlaasseqatigiissapput".

- Tamanna pingaaruteqarluinnartumik kinguneqassaaq, Kinap nunanut allanut ministereqarfiani oqaaseqartartoq Mao Ning ataasinngornermi tusagassiortunik katersortitsinermi oqarpoq.

RITZAU

Powered by Labrador CMS