Ukioq allannguiffiungaartoq
2024-mi annertuumik nutarterisoqaraluartoq teknologiimullu tunngasunik akiitsunik aaqqissuussisoqaraluartoq ukiumoortumik naatsorsuutit pitsaasut saqqummiussinnaanerat Sermitsiap nuannaarutigaa.
- Aningaasaliissuteqartorujussuuvugut sulisullu nioqqutissatta pitsaasumik inissisimanerat qulakkeerniarlugu sulilluarsimaqaat. Tamanna takuneqarsinnaavoq atuarneqarsinnaallunilu, minnerunngitsumillu aatsaat taama atuartartut amerlatigilerput. Tamannalu tulluusimaarutigisariaqarparput, Tusagassiorfimmi Sermitsiami pisortaq Masaana Egede oqarpoq.
Foto: Emil Stach
Ukioq manna sinneqartoorut 1.621.650 koruuniupput, tassa ukiup siulianut sanilliullugu 75.613 koruuninik pitsaanerulluni. Siulersuisut Sisimiuni pingasunngornermi marsip tallimaani ataatsimiinnerminni ukiumoortumik naatsorsuutit akuersissutigaat, siulersuisullu tamarmiullutik angusat naammaginartutut isigaat.
- Tusagassiuutinut tamanut piffissaq ilungersunarpoq, aamma maani nunatsinni. Tamatuma saniatigut Sermitsiaq teknologimut akiitsoqarpoq matussuserniarlugit aningaasaliiffigineqartariaqartunik. Tamanna Tusagassiorfimmut unammilligassaareersut saniatigut unammilligassanik allanik aamma pilersitsivoq. Taamaakkaluartoq 2024-mi aningaasaqarnikkut naammaginartumik angusaqarpugut. Taamaattumik qullersat sulisullu sulilluarnerat annertuumik qujassuteqarfigaavut, Tusagassiorfimmi Sermitsiami siulersuisuni siulittaasoq Lars Vesterløkke oqarpoq.
Sermitsiap 2024-mi nittartagaq nutaaq, iluseq nutaaq, atuisut pisartagaqarnissaannut aaqqissuussaq nutaaq aamma suliffeqarfimmi IT-mik isumannaallisaanerup annertusarneqarnera aningaasaliiffigai. Sermitsiap atuisunut digitalimik naleqarnerulersitsiniarluni periusissiaanut atatillugu aningaasaliinerit pipput.
- Aningaasaliissuteqartorujussuuvugut sulisullu nioqqutissatta pitsaasumik inissisimanerat qulakkeerniarlugu sulilluarsimaqaat. Tamanna takuneqarsinnaavoq atuarneqarsinnaallunilu, minnerunngitsumillu aatsaat taama atuartartut amerlatigilerput. Tamannalu tulluusimaarutigisariaqarparput, Tusagassiorfimmi Sermitsiami pisortaq Masaana Egede oqarpoq.
Aningaasaateqarfiup aningaasaliissutaanit iluanaarutit aamma tapiissutit annertusinerat ukiumoortumik naatsorsuutit inernerannut ajunngitsumik sunniuteqarput.
Piginneqatigiiffik Nuuk Lokalreklame A/S aamma 2024-mi angusarissaarpoq. Akileraarutit ilanngaatigereerlugit 791.000 koruuninik sinneqartooruteqarpoq (2023-mi 64.000 koruuninik amigartooruteqarluni).
