Partiit Inatsisartuni suliassanik akornusersuisutut imminnut pisuutittut

Partiit naalakkersuisooqatigiit illuatungiliuttullu partiiat Nalerap akornanni silaannaq nillerluinnarpoq, taakkualu tamarmik Inatsisartut sulinerannik akornusersuisutut imminnut pisuutipput.

Demokraatit, IA aamma Atassut ataatsimut tusagassiutitigut nalunaarutaanni Naleraq isornartorsiorneqarpoq. Partiit naalakkersuisooqatigiit naapertorlugit Naleqqami ilaasortat ataatsimiittarfimmi marlunngornermi iserniarsimanngillat, taamaalillutillu Inatsisartut suliassaat unitsillugu, inatsisartut aalajangiisinnaassappata minnerpaamik ilaasortat 16-it najuuttariaqarput:

– Politikikkut isumaqatigiinnginneq illuatungiliuttullu Naalakkersuisunik isorinnissinnaanerannik pisinnaatitaaffiat, oqartussaaqataanermik ingerlatsinerup tunngavigaa. Illuatungiliunissamulli pisinnaatitaaffik aamma Inatsisartut sulinerannik, ileqqorissaarnermik Siulittaasoqarfiullu ataatsimiinnermik aqutsineranik ataqqinninnissamik akisussaaffeqarnermik malitseqarpoq, Ane Hansen, Bentiaraq Ottosen, Pipaluk Olsen Inuit Ataqatigiit, Atassut Demokraatillu sinnerlugit allapput.

Naleqqalli aamma tamanna eqqaasippaa, eqqaasillugu partiit naalakkersuisooqatigiit katillugit 21-nik ilaasortaqartut taamaalillunilu Inatsisartuni aalajangiisinnaassuseqarnissaq qulakkeerniarlugu naammattumik ilaasortaatitaqarlutik.

Partiimi ilaasortat najuullutik taasisussaatitaasut, Naleqqami politikkikkut oqaaseqartartoq oqarpoq:

– Naalakkersuisooqatigiit 21-nik ilaasortaatitaqarput. Taamaakkaluartoq aalajangiisoqarsinnaaqqullugu naammattunik najuuttoqarnissaa illuatungiliuttut qulakkiissagaat naatsorsuutigineqarpoq. Illuatungiliuttut ataatsimiinnerit ingerlasinnaanissaat qulakkeertuaannarsinnaanngilaat. Amerlanerussuteqarneq aamma ataatsimiigiartornissamik akisussaaffimmillu tigusinissamik pisussaaffiliivoq, Jens NapãtôK’ oqarpoq.

Partiit naalakkersuisooqatigiit isumaqarput pissutsit ima ajortigisut siulittaasoqarfiup qanoq pisoqarsimanera misissortariaqaraa, aamma "Peqatigisaanik pisut misissorneqarnissaanik, Suleriaatsimilu periarfissarititaasunik atuinissamik Siulittaasoqarfik kaammattorparput, inersuarmummi ataatsimiigiaqqusinerit pingasunit amerlanerusut ilaasortat patsisissaqanngitsumik malikkumaneqanngillat"