KL

DK

Kiisami: ATV-nik ingerlatsinermut malittarisassat nutaat tusarniaassutigineqarput

ATV-nik ingerlatsinermut sumiiffinni aalajangersimasuni allagartaqartariaqarunnaassaaq pillugu tusarnissanerit maanna nassiussuunneqarsimalereerput.

Malittarisassat nutaat malillugit illoqarfiit annerit avataani ATV-nik UTV-nillu ingerlatsinissamut allagartaqarnissaq pisariaqarunnaassaaq.
Thomas Munk Veirum Tusagassiortoq
Saqqummersinneqarpoq

Nunaqarfinni ATV-nik ingerlatsinissamut biilernermut allagartamik pisariaqartitsinerup atorunnaarsinneqarnissaa politikkikkut ukiorpassuarni oqaluuserineqarpoq.

Inoqarfinni minnerni pingasunik sisamanillu assakaasullit amerlanertigut atorluarneqartarput. Malittarisassalli naapertorlugit atuisinnaaneq ajornarsinnaasarpoq, sumiiffimmi biilernermut allagartartaarniarneq ajornarsinnaasarmat.

BIILERNERMUT ALLAGARTAQARNISSAQ UKUNANI SULI ATUUTISSAAQ

Angallannermut inatsit allanngortinneqarnerani sisamanik pingasunillu assakaasulinnut biilernermut allagartaqarnissaq piumasaqaataajunnaarpoq. Sisamanik assakaasulinnik angallassissutit annerpaamik 450 kg-luusariaqarput inunnik assartuinermut atorneqassagunik, assartuutitullu atorneqassagunik 600 kg-luussallutik. Allannguut ATV-nik UTV-nillu taaneqartartunut atuutsinneqarpoq.

Malittarisassat nutaat naapertorlugit illoqarfinni ATV-mik ingerlatsinissamut allagartaqarnissaq suli piumasaqaataavoq:

Nanortalik, Qaqortoq, Narsaq, Paamiut, Nuuk, Maniitsoq, Sisimiut, Aasiaat, Qeqertarsuaq, Qasigiannguit, Ilulissat, Uummannaq, Upernavik Tasiilallu.

Najoqqutassiaq: Færdselsstyrelsenip tusarniaanermi allagaqaatai

Naalakkersuisut siorna ilisimatinneqarput, Naalagaaffiup oqartussaasuisa malittarisassat nutaat suliarigaat, kiisamilu malittarisassat nutaat piareerlutik tusarniaassutigineqalersut. Malittarisassat nutaat Inatsimmik allannguinissamut tunngavissiipput.

Danmarkimi Angallannermut Aqutsisoqarfik tusarniaanermik aaqqissuussisuuvoq, aqqusinermi angallannermut inatsit qallunaat oqartussaaffigaat allannguutissallu Folketingimi akuerineqartarlutik.

Malittarisassat nutaat naapertorlugit illoqarfinni arlalinni ATV-mik ingerlatsinissamut biilernermut allagartaqarnissaq suli piumasaqaataavoq (Paasissutissat allassimaffia takuuk), nunaqarfinnili mikinerusuni tamanna atorunnaarsinneqassaaq:

Tusarniaanermi allagaqaatini erseqqissarneqarpoq illoqarfinni aqqusinernilu taakkartorneqartuni biilernermut allagartaq piumasaqaataassasoq.

– Tamanna isumaqarpoq illoqarfiit aqqusernginut aqquserngit atasut biilernermut allagartamik piumasaqaateqarneq atuutissaaq, aamma illoqarfiup avataani illoqarfinnut aqquserngit atasunut atuutissaaq. Nuup illoqarfianiit Nuup mittarfianut biilernermut allagartaqarnissaq piumasaqaataassaaq, Aqqusinermi Angallannermut Aqutsisoqarfik allappoq.

ATV-nut aqqusineq Sisimiut Kangerlussuullu akornanniittoq, angallannermut oqartussat immikkut taavaat, tassaammat Sisimiunut aqqutigineqarsinnaasoq, taamaattumillu biilersinnaanermut allagartamik piumasaqaatinut ilaanani.

Tusarniummut tunngatillugu paasissutissat tamakkerlugit uani atuarneqarsinnaapput.

tusarniaaneq malittarisassat nutaat inuiaqatigiit biilernermut allagartaq atv-it nunaqarfiit

Atorfiit tamaasa takukkit

PODCASTI

Powered by Labrador CMS