KL

DK

Mette Frederiksenip Finlandimiut Norgemiullu Putinimut attaveqarnerat isornartorsioraa

Europami nunat ataasiakkaat namminneq ingerlaannarnatik ataatsimoortariaqartut, ministeriuneq oqarpoq.

Ministseriuneq Mette Frederiksen (S) Finlandimi Nunat Avannarliit Siunnersuisoqatigiivisa ataatsimiinneranni marlunngornermi najuuppoq, tassanilu Finlandip Norgellu naalakkersuisuisa siuttui isornartorsiorpai, taakkua Ukrainemi sorsunneq pillugu Ruslandip præsidentia Vladimir Putin ataatsimoorlutik attaveqarfigisimavaat.
Ritzau Ritzau
Saqqummersinneqarpoq

Ministeriuneq Mette Frederiksenip "qularilluinnarpaa“ Finlandip præsidentiata Norgellu ministeriunerata, Ruslandip præsidentia Vladimir Putin, Ruslandip Ukrainemut saassussineranut atatillugu oqaloqatigisimagaat.

Tamanna TV 2-mi allaaserineqarpoq.

- Norgemiut Finlandimiullu namminneq iliuuseqarnerat qularutigilluinnarpara. Uagut allat tamanna pillugu ataqatigiissarneqanngilagut.

- Kisimiilluni ingerlaniartoqarani Europa ataasiussuseqartariaqartoq isumaqarpunga, Nunat Avannarliit Siunnersuisoqatigiivisa Finlandimi ataatsimiinneranni TV2-mut oqarpoq.

TV 2 nangilluni allappoq ministeriunerup nalugaa "nunat taakku marluk matumani suna anguniarneraat“.

Taassuma naleqqiuppaa Europamiut siusinnerusukkut isumaqatigiillutik "erseqqissumik nalunaaruteqartut" pingaaruteqarluinnartoq "europamiut ataatsimoortut", nunat allat nammineerlutik Ruslandimut aallassappata.

- Qanoq eqqarsarlutik nunat taakku marluk matumani suna anguniarneraat, ilisimanngilara, DR naapertorlugu Mette Frederiksen oqarpoq.

Finlandip præsidentiata Alexander Stubbip Norgellu ministeriunerata Jonas Gahr Størep, Putin sianerfigalugu marlunngornermi siusinnerusukkut aalajangerput.

Ataatsimoorussamik nalunaarutigaat Ukrainemi sorsunneq aamma "Europami eqqissinermik patajaallisaanermillu siuarsaanissaq“ pillugit Putin oqaloqatiginiarlugu sianerfigisimagaat.

- Oqaloqatigiinneq ammavoq imaqarluarlunilu. Ruslandimut sanileriavugut. Sorsunnerup tamatuma inernera uagutsinnut Europamilu isumannaatsuunermut toqqaannartumik sunniuteqassaaq. Sorsunnerup unitsinnissaanut toqqaannartumik oqaloqateqarnissaq pisariaqarpoq, Finlandip præsidentiata allaffia naapertorlugu præsidenti Stubb marlunngornermi oqarpoq.

Stubb, Støre Putinilu isumaqatigiissutigigaat toqqaannartumik oqarasuaatikkut attaveqaqatigiinnissartik aalajangeraat, Russit nutaarsiassaqartitsiviat Tass naapertorlugu russit naalakkersuisuisa tusagassiiviat nalunaarpoq.

Suleqatini tamarmik sianertoqarnissaa sioqqullugu ilisimatinneqareersut, Jonas Gahr Støre, Mette Frederiksenimit isornartorsiorneqarnermi kingorna marlunngornermi oqarpoq.

Mette Frederikseni Københavnimi Amalienborgimi marlunngornermi ualikkut aperineqarami, tamanna oqaaseqarfigeqqinngilaa.

finlandi vladimir putin inuiaqatigiit norge ukrainemi sorsunneq mette frederiksen

Atorfiit tamaasa takukkit

PODCASTI

Powered by Labrador CMS