Upernaviarsummi savaatilinngorniarluni ilinniarfik matuneqarpoq

Upernaviarsummi savaatilinngornianut ilinniarfik ingerlaannartumik matuneqarpoq, Narsamilu Inuussutissalerinermik Ilinniarfimmut nuunneqarluni, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik poorski sioqqullugu taama nalunaaruteqarpoq.

Upernaviarsummi matusinermut pissutaavoq inini atuartitsiviusuni ilinniartunullu inissiani oqoqarnera.

- Upernaviarsummi ilinniarfimmi ilinniartunut inissiami inillu ilinniartitsiviusut misissuiffigineranni sumiiffinni assigiinngitsuni oqoqartoq paasineqarpoq. Taamaattumik ilinniartut sulisullu peqqissusaat isumannaallisaanerlu eqqarsaatigalugit aalajangerneqarpoq, atuartitsineq Narsamut ingerlaannartumik nuunneqassasoq.

- Ilinniartitsineq pilersaarutit naapertorlugit ingerlaannassaaq inuussutissalerinermilu ilinniarfimmi Inuilimi ingerlanneqassalluni, Naalakkersuisoqarfik tusagassiuutinut nalunaarummi allappoq, paasissutissiillunilu kingusinnerusukkut qanoq pisoqassanersoq inillu pineqartut qanoq siunissaqarnersut pillugit paasissutissanik amerlanerusunik saqqummiussisoqarumaartoq.

Misileraavimmut sunniuteqarnavianngitsoq

Ilinniarfiup nuunneqarnera Upernaviarsummi Misileraavimmut, Kommune Kujalliup inuussutissarsiornermik ineriartortitsinermut ingerlatseqatigiiffianit Innovation South Greenlandimit pigineqartumut ingerlanneqalersumullu, ingerlaannartumik sunniuteqarnavianngilaq.

- Kingunerusussatut maannamut ilisimaneqartoq taamaallaat tassaavoq, misileraaviup/naatitsiviup savaatilinngorniallu ilinniarfiata akornanni innaallagissiorfiup, misileraaviup/naatitsiviup atortagaata, savaatilinngorniarlunilu ilinniarfiup pigisaa pillugu isumaqatigiissuteqartoqartariaqarnera, Naalakkersuisoqarfimmi immikkoortortaqarfimmi pisortaq Trine Egede Sermitsiamut oqarpoq.

Pingaarutilimmut inuulluaqqusineq

Savaatilinngorniarluni ilinniarfiup Upernaviarsummit Qaqortup kangianiittumit 7 kilometerit missaannik ungasitsigisumiittumit, kialaartumit illersorneqartumilu nuunneqarnera, ukiorpassuarni oqaluttuarisaanermut pingaarutilimmut inuulluaqqusineruvoq. Savaatilinngorniat ilinniarfiat 1974-imi pilersinneqarpoq, ullumikkumullu katillugit 130-t savaatilissatut ilinniartinneqarsimallutik.

Savaatilinngorniarluni ilinniarneq inuussutissarsiummik tunngaviusumik ilinniagaqarneruvoq, ilinniarfimmi atuarneq suliffimmillu misiliineq nikerartinneqartarlutik. Nikerartumik ilinniartitaanermi ilinniartitsissutigineqartussat tassaallutik fagi tunngaviusussaq, immikkut fagi, fagi immikkut toqqagaq, piumasaqaataallunilu suliffimmik misiliinissaq sioqqullugu, ilinniartumut isumaqatigiissusiorsimanissaq. Ilinniarfimmiinnerit suliffimmillu misiliinerit sioqqullugit ilinniartutut isumaqatigiissusiornissaq piumasaqaataapput. Atuartitaaneq Upernaviarsummi pisarpoq sullivimmillu misiliinerit Kujaatani Islandimilu savaatilinni pisarlutik. Tamatumanilu savaatillit imminnut qanimut attaveqartarlutik.

Upernaviarsummi 1780-imiit 1938-p tungaanut nunalerineq ingerlanneqarpoq, nunalerinermik misileraavik Qaqortumit Upernaviarsummut nuunneqarmat. Misileraavimmi ukiuni arlalinni naasunik Nunatsinni atorneqartussanik ineriartortitsiniarneq – aamma orpinnik naatitsinermut misileraaneq – misilerarneqartarput.

Naatsiivilerisoq soraartoq

Misileraalluni ingerlatsineq ukioq manna marsip tungaanut naatsiivilerisumit Kim Neiderit ingerlanneqarpoq, taannalu soqutiginartorpassuarnik misileraasarluni, paasisanilu Kujataani savaatilinnut naatsiiviutilinnullu ingerlateqqittarlugit.

Kim Neiderip suliffini inuttut atukkani pissutigalugit taamaatippaa maannalu Upernaviarsummit nuussimalluni.

Innovation South Greenland Sermitsiamit saaffigineqareerpoq paaserusullugu misileraavik siunissami qanoq pilersaaruteqarfigineqarnersoq – aamma nutaamik pisortassarsiortoqarnersoq paaserusullugu. Allaaserisanik tunniussivissaq sioqqullugu Innovation South Greenlandimit akissuteqartoqanngilaq.