KL

DK

Ukiuni 50-inngortorsiorneq

Namminneq nipilersuusiaminnik immiusserusuinnarnikuupput

ULO angutiniit sisamanit, kalaallit namminneq oqaatsitik atorlugit immiussisinnaalernissaannik periarfisseerusuttuniit, ukiut 50-it matuma siorna tunngavilerneqarpoq. Saqqummersitsisarfiup pilersinneqarneraniit maanna ukiut 50-it qaangiunnerat Nunatta Katersugaasiviani Allagaateqarfianilu immikkut saqqummersitsinikkut malunnartinneqarpoq.

Saqqummersitsisarfiup ULO-p pilersinneqarneraniit ukiut 50-inngortorsiornerata saqqummersitsinermik malunnartinneqarnerani nuannaartorinnittut assileqatiginissaanik piffissaqarpoq. Malik Høegh (qiterleq) Karsten Sommerilu (talerperleq) uani takuneqarsinnaapput.
Sort-hvidt portræt af en kvinde med mørkt hår iført en mørk bluse foran en lys baggrund.
Ane-Marie Petersen Ane-Marie Petersen Tusagassiortoq
Saqqummersinneqarpoq

Kamaammernermiit aallartippoq.

Immiussisarfimmi Demosimi siulersuisut sulisullu 1976-imi isumaqatigiinngissuteqarput. Isumaqatigiinngissuteqarneq pissutaalluni angutit sisamat namminneq iliuuseqarniarlutik aalajangerput. Tassaapput Malik Høegh, Hjalmar Dahl, Nicolaj Steenstrup aamma Karsten Sommer.

ULO-miit nersornaasiuttagaq "Puisip amia". Nuusiat 10.000-it angullugit tunineqaraangata taanna nersornaasiissutigineqartarpoq. Zikazakkut saqqummersitaat "Miki goes to Nuussuaq" nersornaammik tassanga kisiartaalluni pissarsinnikuuvoq.

Karsten Sommer Demosimi taamani sulisuuvoq, Sumekkullu saqqummersitassaata pingajuata immiunneqarnerani ingerlatsisuulluni.

– Nipilersukkatsinnut akuliunniarnerat akuersaarusunngilarput, Karsten Sommer eqqaamasalersaarpoq.

Taamaasilluni ULO pilersinneqarpoq.

Saqqummersitsisarfeqalerneq Kalaallit Nunaanni inuiaqatigiinnut sunniuteqarnissaa siunertaanngilaq. Kalaallit nipilersortartut namminneq oqaatsitik atorlugit immiussisinnaalernissaannik periarfissikkusuinnarpaat.

– Killilersuineq ajorpugut. Inuit namminneq immiukkusutaminnik oqariartuutigerusutaminnillu immiussisinnaalernissaannik periarfissikkusunnikuuagut, Malik Høegh oqarpoq.

Nipilersortartut partiilersornerat aamma pineqarnikuunngitsoq oqaatigaa.

Nipilersukkatsinnut akuliunniarnerat akuersaarusunngilarput.

Karsten Sommer, saqqummersitsisarfimmik ULO-mik pilersitseqataasoq

– Kikkunnut qinersisartuuneq apeqqutaatinneq ajorparput. Saamerliunerusunut samminiarsimanerarluta oqaluttoqartartoq ukiuni siullerni tusartarnikuuarput. Taamaannginnami.

Kalaallit Nunaata ineriartornera pillugu nipilersukkat

ULO Nunatsinni nipilersortartunut ukiuni qulikkaani tullerni pingaarutilimmik inissisimalerpoq. Rockimik, popimik, rappimik nipilersoriaatsinillu allanik saqqummersitsisoqartarpoq, taallallu Kalaallit Nunaata allanngoriartornera pillugu imaqarlutik.

Taamaalilluni kiffaanngissuseqarluni immiussisinnaalernissamik aalajangerneq, amerlasuut takorloorsimanngisaannik sunniuteqarpoq.

Kalaallit nipilersortartut namminneq oqaatsitik atorlugit inuunertik, inuiaqatigiit, kinaassusertik takorluukkatillu pillugit saqqummersitsisarfik aqqutigalugu oqariartuuteqarsinnaalerput.

Saqqummersitsisarfiup ULO-p pilersinneqarneraniit maanna ukiut 50-it qaangiunnerat malunnartinniarlugu immikkut ittumik saqqummersitsisoqarpoq. Aaqqissuussaq Nunatta Katersugaasiviani Allagaateqarfianilu pivoq.

Nunatta Katersugaasiviani allagaateqarfianilu immikkut ittumik saqqummersitsineq Saqqummersitsisarfik ULO oktobarip 15-iani ammaanersiorneqarmat peqataasorpassuupput. ULO-p pilersinneqarneraniit ukiut 50-inngornerat saqqummersitsinermi malunnartinneqarpoq, taannalu 2027-mi februaarip 23-ata tungaanut takuniarneqarsinnaavoq.

ULO-p oqaluttuarisaanerata ataatsimut katersorneqarnera Hjalmar Dahlimut immikkut ittumik misigisaavoq.

– Nivingasut takulerlugit ukiut 50-it ingerlaneranni qanoq suliaqarsimatiginerput aatsaat takulerpara, ULO-mi ataqqinaammik ilaasortaq Hjalmar Dahl oqarpoq.

Kiffaanngissuseqarluni nammineq nipilersuusianik immiusserusulluni kamaammertoqarnikuunera kingorna suliarineqarnikut saqqummersitsinermi takuneqarsinnaapput. Kalaallit Nunaata kulturikkut ukiuni qulikkaani oqaluttuassartaanut pingaarutilimmik sunniuteqartoq.

kalaallit nunaat ulo nunatta katersugaasivia allagaateqarfialu nipilersorneq kulturi malik høegh

Atorfiit tamaasa takukkit

PODCASTI

Powered by Labrador CMS