Akileraartarnermut Aqutsisoqarfik nutaamik pisortartaarpoq

Akileraartarnermut Aqutsisoqarfimmi pisortaaneq nutaaq tassaavoq Rita Lyberth Jensen, taannalu Den Centrale Regnskabsafdelingimi siunnersortitut immikkoortortaqarfianeersuuvoq. Akileraartarnermut Aqutsisoqarfimmi immikkoortortami 2013-imiit 2023-mut pisortaanikuusoq, Naalakkersuisut ilisimatitsipput.

Aningaasaqarnermut naalakkersuisup Aqqaluaq B. Egedep (IA) atorfinitsitsineq nuannaarutigaa:

– Rita Lyberth Jensenip Akileraartarnermut Aqutsisoqarfimmi qullersanngornissaa nuannaarutigaara. Akileraartarnermut immikkoortumut annertuumik ilisimasaqarpoq, ukiorpassuarnilu pisortani aqutsinermik, aningaasaqarnermik aqutsinermik digitalilinngorsaanermilli suliaqartarnerminit misilittagaqarpoq. Tamanna aqutsisoqarfiup ineriartorteqqinnissaanut pitsaasumik tunngavissiivoq. Suleqatigiinnissamut qilanaarpunga, taanna tusagassiuutinut nalunaarummi oqarpoq.

Naalakkersuisoq nangilluni oqarpoq innuttaasut suliffeqarfiillu Akileraartarnermut Aqutsisoqarfimmi eqqortumik pissuserissaartumillu suliarineqarnissartik qularutigissanngikkaat:

– Tamanna ulluinnarni isumannaatsumik aqutsinermik aqutsisoqarfiullu sulinerata ineriartortuarneranik pisariaqartitsiffiuvoq. Tamatuma sulisunik qanimut suleqateqarnikkut pisarnissaa pingaartippara. Taakku suliaminnik ingerlatsinerat misilittagaqarnerallu suliatta pitsaasumik naammassinissaannut pingaaruteqarpoq, Aqqaluaq B. Egede oqarpoq.

Akileraartarnermut aqutsisoqarfik Suila-tapit pillugit innuttaasunut akiligassiinera piffissami kingullermi oqallisaangaatsiarpoq. Naalakkersuisut 2025-mi innuttaasunut akiligassat 39,8 millionit koruuniusut taamaatitsineranik tamanna maannamut taama inerneqarpoq.

Akileraartarnermut Aqutsisoqarfimmi pisortatut ukiorpassuarni atorfeqartoq, Kim Neumann Nielsen qaammatit arlaqanngitsut matuma siorna LinkedInikkut nalunaarpoq Aningaasaqarnermut Naalakkersuisoqarfimmi aaqqissuusseqqinnissamut pisortatut atorfittaarluni.