Københavnip mittarfiani suli sivisuumik utaqqisoqartarnissaanik ilimasaarisoqartoq

Københavnip mittarfiani sapaatip-akunnerata naanerani immaqalu aamma sapaatip-akunnerata tulliani piffissami ulapaarfiusumi isumannaallisaanikkut misissuisarfimmi sivisunerusumik utaqqisoqarsinnaassasoq naatsorsuutigineqarpoq.

Taama Københavnip mittarfiani attaveqatigiinnermut pisortaq Lise Agerley Kürstein ataasinngornermi ualikkut allakkatigut killiffissiuilluni Ritzauimut allappoq.

- Københavnip mittarfiani sulisut amerlanerusut aggersarneqarsimapput, ilaasullu isumannaallisaanikkut misissuinermit sukkanerpaamik aniguisinniarlugit, soorunami aamma isumannaallisaanikkut pisariaqartunik qaffasissumik ingerlatsilluta, sapinngisatsinnik iliuuseqarpugut, taanna allappoq nangillunilu:

- Angalasut timmisartortitseqatigiiffiit innersuussutaat maleruaqqullugit, Schengenillu iluani angalagaanni nalunaaquttap-akunneri marluk sioqqullugu, Schengenip avataani angalagaanni nalunaaquttap-akunneri pingasut sioqqullugu mittarfimmut apuuttaqqullugit kajumissaarpagut.

Angallannermut aqutsisoqarfiup nakkutilliinerata kingunerisaanik mittarfimmi immikkut ittumik iliuuseqartoqartariaqarnera utaqqisut amerlanerannut pissutaavoq.

Isumannaallisaanikkut nakkutilliinerup annertusineqarneranik suna pissutaanersoq Angallannermut Aqutsisoqarfiup Københavnimiluunniit mittarfiup itinerusumik oqaatigiumanngilaat. Oqartussaasulli piumasaqaataat avataaneersunit pissuteqanngitsut DR-imut erseqqissarsimavaat.

- Sillimaniarnermut tunngatillugu allannguisoqarneranik alapernaassuteqarneq paasisinnaavara, isumannaallisaanermili periutsit pillugit sukumiinerusumik oqaaseqarsinnaanngilagut. Isumannaallisaanerli qaffasittuartoq, timmisartornerlu isumannaatsuusoq oqaatigissallugu pingaaruteqarpoq, Lise Agerley Kürstein Ritzauimut tallimanngornermi oqarpoq.

Københavnip mittarfia qaqugu nalinginnaasumik ingerlaqqilissanersoq siunissamiluunniit "allatut iliuuseqartariaqarnersoq“ Angallannermut Aqutsisoqarfiup aalajangertarpaa, attaveqatigiinnermut pisortaq tamatumunnga atatillugu oqarpoq.

RITZAU