USA uagut – Kinalu – nakkutigaatigut

Kina, Xi Jinping siuttoralugu, USA-p sakkutuuinut nunarsuaq tamakkerlugu nallersinnaasunik sakkutooqarnikkut ineriartortitsilluni aallartippoq. Kina ullumikkut nunarsuarmi umiarsuarnik sakkutooqarnerpaalereerpoq, silaannakkullu sakkutuunik sakkortusiartuinnartunik, Kinamit ungasinnerujartuinnartumik sungiusartartunillu, ilaatigut 2024-mi Ruslandi peqatigalugu Issittumi sungiusarpoq.

Taamaammat Kinap Issittumi sunniuteqarnera ukiuni aggersuni annertusissasoq ilimagineqarsinnaavoq, minnerunngitsumik Ruslandimik suleqateqarnera aamma immakkut aqqutit naappallaarunnaarnissaat pissutigalugu.

Camilla T. N. Sørensen aamma Adam Buschard Forsvarsakademimiit „Kina nunarsuarmi sakkutooqarnikkut pissaanilissuitut – danskit illersornissamut sakkutooqarnikkut periusissiaat“ pillugu nalunaarusiami nutaami taamatut allapput, tassanilu aamma Kalaallit Nunaata pissaanilissuit taakkua marluk akornanni inissisimaffia eqqartorpaat.

Kina sakkutuutigut naalagaaffissuartut

 Kinamiut Kalaallit Nunaanni avatangiisinilu ullumikkut umiarsuaateqanngitsut nalunaarusiami allassimavoq. „Kinamilli Kalaallit Nunaata eqqaani siunissami naapitsinissaq ilimanarluinnarpoq.“ Tamannalu pillugu „qallunaat illersornissaqarfiata aamma qallunaat, kalaallit savalimmiormiullu oqartussaasuisa nunallu tamatumani suleqatigisaasa suleqatigiinnerulernissaat“ pisariaqarpoq.

Kalaallit Nunaata nunap immikkoortuini inissisimaffia qanoq pingaaruteqartigisoq Camilla T.N. Sørensenip Sermitsiamut oqaluttuaraa.

– Kinap sakkutooqarnikkut USA-mut unammillertinneqarsinnaasutut nunarsuarmi naalagaaffissuanngorniarluni anguniarpaa. Nunarsuarmilu sakkutooqarnikkut naalagaaffissuanngorniarluni nunarsuaq tamakkerlugu, issittuni ilanngullugit, suliniuteqarsinnaasariaqarpoq. Taamaammat russit Issittumi sakkutooqarfigisaanni takusinnaavagut, soorlu Kinamiut sinerissamik nakkutilliisut russit timmisartuinik sungiusaaqatigiissimasut, Camilla T.N. Sørensen oqarpoq.

Aningaasaqarnera annikitsoq 

Kina ukiuni kingullerni USA pissutigalugu Kalaallit Nunaannit tunuarsimaarpoq. Taamaakkaluartoq USA-p Kina Issittumi sumiluunniit takusarpaa. Tamannalu Kalaallit Nunaanni akuerineqartariaqarpoq.

– Kalaallit Nunaat USA-p qanittuaniippoq, taamaammallu Kinap Kalaallit Nunaanni eqqaanilu iliuuserisai eqqumaffigineqangaarput. Taamaammat nunat allat Kinamik niueruteqaraluartut, USA ilanngullugu, Kalaallit Nunaata Kinamik niueruteqarnissaa suleqateqarnissaalu ajornakusoorneruvoq. Kalaallit Nunaata aningaasaqarnerata annikinnera tamatumunnga aamma ilaavoq, taamaammallu Kinamit aningaasaliinerit annikitsunnguugaluarunilluunniit sunniuteqangaarsinnaapput.

– Kalaallit Nunaata Kinamut isiginnittaasia USA-p isiginnittaasianut naapertuuttoq USA-p aqutsisuinut pingaaruteqarpoq. Taamaammat Kalaallit Nunaanni politikerit Kinamik suleqateqarnissaq eqqartortuaannarpassuk, assersuutigalugu Kinamiut aningaasaliinissaannut ammallutik oqartarpata, ernumanermik pilersitsinissaq aarlerinarpoq, tamannalu USA-p iliuuseqarfigiumasinnaavaa, Camilla T. N. Sørensen oqarpoq. 

Nalunaarusiaq ” Kina som global militær stormagt - militærstrategiske perspektiver for dansk forsvar” (Kina silarsuarmi sakkutooqarnikkut pissaaneqarnerpaajuvoq – Danmarkip illersornissamut pilersaarutai, aaqq.) uani atuarneqarsinnaavoq: https://www.fak.dk