2024-mi tikaagullittassanik agguaasseqqinneq
Aalisarnermut Piniarnermullu Naalakkersuisup Nunatta Kitaani qamutilissorluni tikaagullittassiissutinit 40-it ataatsimoorluni qoorortoorsorluni tikaagullittassanut nuunnissaat aalajangerpaa. Taamaasilluni Kitaani angallatit qamutilillit tikaagullittassaat maanna 94-it sinnerupput kiisalu umiatsiaararsortunut pisassat 68-ullutik, naalakkersuisup naalakkersuisoqarfia tusagassiuutitigut nalunaarummini taamak ilisimatitsivoq.
Nuussinissamut ulluliussaq sioqqullugu, (ullussaa kommunit namminneerlutik aalajangissavaat) ataatsimoorluni piniarneq tamarmi inerteqqutaavoq. Kommunit nutaamik agguaasseqqinneq tamanut nalunaarutigereerpassuk piniarneq aatsaat aallarteqqinneqarsinnaavoq, taamak erseqqissaateqarpoq aalisarnermut piniarnermullu naalakkersuisoqarfik.
Asseq: Naalakkersuisut
Siorna decemberimi tusagassiorfinnut nalunaarutigineqartutut Kitaani ukiumut tikaagullinnik tunngaviusumik pisassiissutit 164-it pillugit ilisimatitsissuteqartoqarpoq kiisalu 2023-miit Kitaani pisassiissutinik 66-inik nuussisoqarpoq.
Tunngaviusumik pisassiissutiniit ataatsimoorluni qoorortoorsorluni piniarnermut tikaagulliit 54-it pisassiissutigineqarput qamutilinnillu tuukkartalinnik piniarnermut 110-t pisassiissutigineqarlutik.
Tunumi pisassiissutit tamakkerlugit 20-upput, 2023-miillu nuussat tallimaapput.
Ulloq aggustip 30-anni 2024-mi killiffittut paasissutissat pissarsiarineqartut naapertorlugit Kitaani tikaagulliit 45-t ataatsimoorluni piniarnermi aamma qamutilinnik tuukkartalinnik piniarnermit tikaagulliit 20-t pisarineqarsimapput.
Tunumi tikaagulliit arfinillit pisarineqarsimapput, pisassiissutinit 14-it sinnerullutik.
Kisitsisit ataaniittut tassaapput qamutilissortuniit umiatsiaararsortunut agguaateqqitat massakkullu pisassat amerlassusii.
Tusarfik: Naalakkersuisut
Kisitsisit allannguuteqarsinnaapput, nuussinerup nalaani pisanik nalunaaruteqartoqarsimasinnaammat.
Kommunit namminneerlutik tikaagullittassat agguaasseqqinnermi nuunneqartut agguaatissavaat, agguaatereerunikkillu piaarnerpaamik Aalisarnermut Piniarnermullu Naalakkersuisoqarfimmut nalunaarutigissavaat, naalakkersuisoqarfik taamak nalunaaruteqarpoq.
