Naalakkersuisut nikerartinneqartut — illuatungiliuttut suleqatigiipput

Naalakkersuisuni ilaasortat marluk ippassaq ualikkut tunuarput. Siullermik Atassut naalakkersuisooqatigiinnit anivoq, tamatumalu malitsigisaanik Isumaginninnermut, Suliffeqarnermut Ilaqutariinnut Nunamullu Namminermut Naalakkersuisoq Maritha Broberg (A) aamma Naalakkersuisunit anivoq.

AAMMA ATUARUK

Nivi Olsen: Naalakkersuisutut tunuarpunga

Nivi Olsen (D) Ilinniartitaanermut, Kultureqarnermut, Timersornermut Ilageeqarnermullu Naalakkersuisutut ullumikkut tunuarpoq.

Nivi Olsenip naalakkersuisoqarfia Avatangiisinut, Pinngortitamut, Nukissiutinut, Ilisimatusarnermullu Naalakkersuisup Jørgen Rosbachip (D) tingungaa, Naalakkersuisut nittartagaanni allassimavoq.

Maritha Brobergip akisussaaffii Aningaasaqarnermut Naalakkersuisumut Aqqaluaq B. Egedemut (IA) tunniunneqarput.

Taakkua akisussaaffiit ataavartumik tunniunneqarnersut suli qularnarpoq. Naalakkersuisunimmi tunuartoqartillugu naalakkersuisuuffik naalakkersuisumit allamit tigugallarneqartartoq takussaavoq. Naalakkersuisunut ilaasortat nutaat ivertinneqarpata Inatsisartunit akuerineqaqqaartariaqarput.

Ineriartorneq Sermitsiamit qanimut malinnaavigineqarpoq.

Teknikkikkut suleqatigiinneq ataatsimiititalianilu ilaasortat

Inatsisartut sulinerat ullumi aallartiinnartoq, Jens Napãtôk’ (N) nutaamik suleqatigiinnissamut isumaqatigiissusiortoqarsimasoq nalunaaruteqarpoq.

Inatsisartut siulittaasuata Kim Kielsenip (attaviittoq) Naleqqap, Siumup Atassutillu teknikkikkut suleqatigiinnissamut isumaqatigiissutaat atuarpaa.

Ataatsimiititaliani assigiinngitsuni aamma ullumikkut kingusinnerusukkut nikittoqassaaq. Kim Kielsen ilisimatitsivoq ataatsimiisitaliani tallimaasuni illuatungiliuttut marlunni inissaqartinneqassasut.

Ataatsimiititaliani ilaasortat inissaat 20-t allanngortinneqarnissaat pineqarpoq.

Oqaluuserisassat suliarineqarlutik naammassippata tamanna ullup ingerlanerani kingusinnersukkut piumaartoq, Kim Kielsenip naatsorsuutigaa.

Atassut ataatsimiititaliani marlunni maannamuugallartoq siulittaasuutitaqarpoq. Aqqalu C. Jerimiassen Aningaasaqarnermut Akileraartarnermullu Ataatsimiititaliami siulittaasuuvoq Bentiaraq Ottosenilu Aalisarnermut, Piniarnermut Nunalerinermullu Ataatsimiititaliami siulittaasuulluni.

Partiit naalakkersuisooqatigiit siulittaasuuffigisartagaat marluk annaasinnaavaat.

Naalakkersuisut qinersinerup kingorna pilersinneqarmata, partiit sisamat Inatsisartuni katillugit 23-nik ilaasortaatitaqarput. Siullermik Siumut naalakkersuisooqatigiinnermit anivoq, maannalu aamma Atassut suleqatigiinneq qimappaa. Demokraatit IA-lu ataatsimut isigalugit 18-inik ilaasortaatitaqarput. Tamatuma saniatigut attaviitsup Kim Kielsenip naalakkersuisooqatigiit tapersersorpai. Taamaalillutik suli amerlanerussuteqarput.