Akissuteqaatitut allakkianut piffissaliussat sivitsoqqqinneqarsinnaannginnerat Nunatta Eqqartuussisuuneqarfiata erseqqissarpaa

Kuannersuarni suliami akissuteqarluni allakkiamik tunniussinissamut piffissaliussap decembarip 15-iata tungaanut kinguartinnissaanik Naalakkersuisut kissaateqarnerat eqqartuussisuuneqarfiup akueraa.

“Ilisimatitsisutigineqartut naapertorlugit kinguartitsinissamik noqqaassuteqarneq suliassanngortinneqartut akuersinissaat siunertaralugu kalaallisuunngortitsilluni nutserinermik pissuteqarmat, suliap annertussusaa qanoq issusaalu eqqarsaatigalugit, noqqaassutigineqartoq naapertorlugu decembarip 15-ianut Nunatta Eqqartuussisuuneqarfia sivitsuivoq, allakkami taama allassimasoqarpoq.

Eqqartuussisuuneqarfik ilanngullugu erseqissaavoq, akissuteqarluni allakkiamut piffisaliussap sivitsoqqinnissaa ilimagineqassanngitsoq, aamma “eqqartuussisuuneqarfiup naatsorsuutigivaa, illuatungeriit oqaatsitigut atukkanik siunissami eqqumaffiginnissasut”.

Eqqartuussiviup nalunaarnera tikilluaqquaa

Aatsitassarsiornermik suliffeqarfimmut Greenland Mineralsimut, Energy Transistionimit (ETM) pigineqartumut, tamanna ajugaaneruvoq annertunngitsoq.

Eqqartuussiviup ersarissumik nalunaarnera ETM-ip tikilluaqquaa naatsorsuutigalugulu, suliaq kinguaqqinnani ingerlassasoq. Piffissami 2027-mi ukiup affaani kingullermiit 2028-mi ukiup affanut siullermut sapaatit akunnerini arlalinni eqqartuussisoqarnissaa ETM-ip suli naatsorsuutigaa, suliffeqarfik tusagassiorfinnut nalunaaruteqarluni allappoq.

ETM aamma allappoq, suliap imarisaa pillugu suliassanngortitsissummik piumasaqaatinik naammassinnittumik tunniussereersimallutik, taannalu sioqqullugu isumaqatigiissitsiniarnermik suliami naammagittaalliummik piumasaqaatinik naammassinnittumik naammagittaalliorluni allagaqaammik aamma tunniussereerlutik (maanna unitsikkallarneqartumik). ETM isumaqarpoq suliffeqarfik suliami, nukittuumik inissisimasoq eqqartuussinermilu suliamik saqqummiussinissamut piareersimasoq.

Suliap eqqartuussivimmit nalilersorneqarnissaa qilanaaraat

ETM-ip pisortaanera Daniel Mamadou oqaaseqarpoq:

"Suliamik ingerlatsinerup sukkassusaa naalliunnaralugu ersarissumik oqaatigereerparput. Eqqartuussivik maanna ersarissumik titarniliivoq. Naalakkersuisut ukiuni sisamani affarmilu imminnut illersornissaminnut piareersarfissaqareerput, marloriarlutillu piffissaleqqinneqareerlutik. Eqqartuussiviup maanna naqissuserpaa Naalakkersuisut sivisunerusumik piffissalerneqarnavianngitsut.”

“Piffissaliussaq aalajangersimasuuvoq, malinneqarnissaalu aalajangersimasumik aamma naatsorsuutigineqarpoq. Akissuteqarluni allakkiap kingusinnerpaamik decembarip 15-ani tunniunneqarnissaa naatsorsuutigaarput, eqqartuussinerlu eqqartuusivimmit piffissaliusiffissatut tikkuarneqartut naapertorlugit ingerlanneqarnissaa naatsorsuutigaarput. Piareersimavugut, suliattalu nalilersorneqarnissaa qilanaaraarput”.

ETM aamma allappoq, suliap nalilersorneqarnissaa qilanaaralugu.