Ataatsimut isigalugu: Takornariaqarnermut inatsit, meeqqat atuarfiat piffissallu aalajangersarneqarnera

Inatsisartut sapaatip akunnerani matumani marlunngornermiit sisamanngornermut ulluni pingasuni ataatsimiissapput.

Sunali oqallisigissavaat? Oqaluuserisassatut pilersaarutit aallaqqaasiutaasut Sermitsiap atuarlugillu siunnersuutit ilaat saqqummiuppai. 

Takornariaqarnermut inatsit

Nunanut allanut, inuussutissarsiornermut aatsitassanullu naalakkersuisup Múte B. Egedep (IA) siunnersuutaa Inatsisartut aappassaaneerillutik marlunngornermi novembarip qulinganni suliarissavaat. Takornariaqarnermut inatsimmi allannguutaasussat pineqarput.

Takornariat nunanit allaneersut aqqutinut ornittakkanulluunniit aalajangersimasunut isissagunik pisuttuarnissamut isernissamulluunnuut allagartaqarnissaannik, kiisalu angalanermut annaassiniarnermulluunniit sillimmasersimanissaannik allannguutit kommunalbestyrelsinut piumasaqarsinnaanermik pisinnaasitsilissapput.

Pisuttartartunut malittarisassat nutaat saniatigut takornariartitsinermik suliffeqarfiit najugaqarnissamut piumasaqaatinik, 2024-mi akuersissutigineqartunik, malinninnissamut immikkut akuersissuteqartarnermut piffissap sivitsorneqarnissaa inatsisissatut siunnersuummi pingaarnertut siunertarineqarpoq.

Naalakkersuisut najukkami piginnittuunissamut piumasaqaatip takornariaqarnermillu inuussutissarsiutip ineriartortinneqarnissaanut tunngatillugu oqimaaqatigiissumik aaqqiissuteqarnissaq pingaarnertut siunertaralugu allannguutissatut siunnersuummik saqqummiussipput.

Assersuutigalugu immikkut akuersissuteqarfiusinnaasoq nalinginnaasumik suliassani ukiut sisamat sinnerlugit sivisussuseqassanngilaq.

Inuussutissarsiornermut Aatsitassanullu Ataatsimiititaliamit siunnersuut suliarineqarpoq, tassani amerlanerussuteqartut Demokraatit, IA aammalu Atassut siunnersuut akuersissutigineqassasoq inassutigaat.

Meeqqat atuarfiat pillugu inatsit

ATUARUK AAMMA

MIO Naalakkersuisunut ammasumik allagaqarpoq: meeqqat ataasiinnaarlutik atuarfeqarput

Meeqqat atuarfiat pingasunngornermi novembarip aqqarngani aammaarluni Inatsisartuni oqaluuserineqassaaq. Naalakkersuisut meeqqat atuarfiat pillugu inatsimmut allannguutissatut siunnersuummik saqqummiussipput.

Meeqqat atuarfianni nukarlerni atuartitsissutigineqartut malunnaatilimmik ikinnerulernissaannik, kalaallisut aammalu matematik pingaarnerutinneqarnissaanik siunnersuut ilaatigut imaqarpoq.

Danskisut tuluttullu oqaatsit ilikkagassatut aallarnisaatitut atuartitsissutigineqalissapput, aatsaat 4. klassimi atuartitsissutinut aalajangersimasunut ilanngunneqarlutik.

Ukiup atuarfiusup sivikillisinneqarnissaa aammattaaq siunnersuummi siunertarineqarpoq, taamaalilluni 1.-3. klassini atuartuni ullut atuarfiusut ullumikkut 200 aamma 240 akornanniittut ullunut atuarfiusunut 180 aamma 200 akornanni amerlassuseqalersinnaapput.

Inatsisissatut siunnersuut meeqqanut sullissivimmit MIO-mit isornartorsiorneqarpoq.

Naalakkersuisut allannguutissatut siunnersuummik aappassaaneerinninnermi saqqummiussipput, tassani allannguutit nutaat qaqugu atuutilersinneqarnissaat pineqarpoq, siunnersuutimmi upernaakkut ataatsimiinnermi akuersissutigineqarnissaa aallaqqaammut pilersaarutaavoq.

Allannguutissatut siunnersuut Inatsisartut tamarmik akuersissutigaat. Maannalu siunnersuut pingasunngornermi inaarutaasumik akuersissutigineqassaaq.

Piffissap aalajangersarneqarnera

Nunatta piffissatigut immikkoortuinut tunngatillugu oqallinnerit tunullugit ingerlaqqinnissamut maanna - immaqa -  piffissanngorpoq.

ATUARUK AAMMA

Piffissamik aalajangersaasarneq ataatsimiititaliamut utertinneqarpoq - akunnerit tallimat Europamut nikinganerat amerlanerpaaq?

Siumup siunnersuutaa, tassalu UTC-3-mut utertitsinissap aasaaneranilu nalunaaquttap nikittarneranik atorunnaarsitsinissap pingajussaaneerneqarnissaa, maannakkut ataatsimiinnermi oqaluuserisassaniippoq.

Inatsisinut Ataatsimiititaliaq siusinnerusukkut allannguutissatut siunnersuuteqarpoq, taamaalilluni 2027-mi  januaarip aallaqqaataat aallarnerfigalugu aasaanerani nalunaaqutaq atorunnaarsinneqassasoq 2028-milu nalunaaqutaq allanngortinneqassasoq siunnersuutigineqarpoq. Ataatsimiititaliap siunnersuutaa akuersissutigineqassappat Kalaallit Nunaat 2028-miit aasaanerani Danmarki Europallu kitaa nalunaaquttap akunnerinik tallimanik nikingassuteqalissallunilu ukiuunerani akunnernik sisamanik nikingassuteqalissaaq - EU-mi aasaanerani nalunaaqutaq suli atorneqarmat.

Aappassaaneerinninnermi allannguutissatut siunnersuut amerlanerussuteqartut akuersissutigaat. Immikkoortorli pillugu misissuinissamut piffissaq sivisunerusoq Inatsisinut Ataatsimiititaliap pisariaqartillugu qinnuteqarmat immikkoortoq  inaarutaasumik ulloq oktobarip 21-ani akuersissutigineqartussaagaluartoq - naak aappassaaneerinninnermi ataatsimiititaliamut innersuussutigineqarsimanngikkaluartoq - kinguartinneqarpoq.

Ataatsimiititaliap suna immikkut misissorniarneraa ilisimaneqanngilaq, Europamulli nalunaaquttap akunnerini tallimani piffissap nikingassuteqarnera annertuallaarsinnaasoq politikkerit arlallit oqaatigaat.

Isumaliutissiissummik nutaamik ataatsimiititaliamit suli saqqummiussisoqanngilaq.