Nivi Olsen: Naalakkersuisutut tunuarpunga

- Matumuuna Naalakkersuisutut ullumikkut tunuarnera nalunaarutigissavara, Nivi Olsen (D) Facebookimi allappoq.

Qimussertartut kattuffiannut KNQK-mut tapiissutinik suliami iliuuserisimasai illuatungiliuttuniit naalakkersuisooqataasuniillu Atassummit sakkortuumik isornartorsiorneqareersut, taama nalunaaruteqarpoq. Tassunga atatillugu tatiginnikkunnaarnermik taasititsisoqarpoq, partiilli naalakkersuisooqatigiit tamanna pinngitsoortippaat. Suliaq tamanna pissutigalugu Atassut ataasinngornermi ualikkut naalakkersuisooqatigiinnit, anivoq.

Ilinniartitaanermut, Kultureqarnermut, Timersornermut Ilageeqarnermullu Naalakkersuisutut tunuarluni Nivi Olsen allakkiamini allappoq, suleqatigisanilu ima qutsavigai:

- Qujavunga piffissami sivikikkaluamik suleqatigisimasannut.

- Ilinniartitaanermut, Timersornermut, Meeqqat Atuarfiannut, Oqaluffimmut minnerunngitsumillu kulturimut tunngasunik suliaqarsinnaanera sulisinnaanera ataqqinaataavoq, allappoq

Nivi Olsenip allakkamini tunuarnerminut pissutaasoq eqqaanngilaa, suliani tulluusimaarutigalugit tunuarluni.

– Piffissami oqaluttuarisaanermi pingaaruteqartumi, Kalaallit Nunaata misigisimanngisaannagaani inuunitsinnilu piffissami sakkortunerpaami suleqataanera aamma sulisukka siulittaasorlu peqatigalugit maskiinaqarfimmi suleqataanerput uummatinniitittuaannarpara. Tamanna tulluusimaarutigiinnarsinnaavara, Naalakkersuisullu peqataasut suliassamillu kivitsisut tamaasa tulluusimaarutigaakka, Nivi Olsen allappoq.

Nivi Olsenip tunuarnerani Naalakkersuisut ilaasortanik marlunnik ullup ataatsip ingerlanerani annaasaqarput. Atassut naalakkersuisooqatigiinnit ataasinngornermi unnukkut anivoq, taamaalillunilu aamma Naalakkersuisunut ilaasortaq Maritha Broberg (Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoq) tunuarpoq.

Jens-Frederik: Ataatsimuussaagut

Naalakkersuisut siulittaasuat Jens-Frederik Nielsen (D) Inatsisartuni oqaluttarfianni marlunngornermi oqarpoq, ilaasortat taakku marluk Naalakkersuisunit tunuartut.

Jens-Frederik Nielsen nangilluni oqarpoq IA Demokraatillu naalakkersuisoqatigiinnerat ingerlaannassasoq.

- Ataatsimuussaagut, Jens-Frederik Nielsen oqarpoq.

Nivi Olsenip tunuarnera illuatungiliuttut partiiannit Naleqqamit nersualaarneqarluarpoq. Nivi Olsenip tunuarnera eqqortumik aalajangiinerusoq Oqaaseqartartoq Jens Napaattooq oqarpoq. Taamaattorli erseqqissarpaa Nivi Olsen Naalakkersuisunut ilaasortaanermini angusaqarluartoq, ilaatigut Ilulissani inuussutissarsiornermik ilinniarfimmik pilersitsisoqarnissaanik qaqiliinermigut:

- Suliaq tamanna qaqilerpat, tamannalu eqqaamaneqaatigissavat, oqaluttarfimmiit Napãtôk’ oqarpoq.