2025-mi arfattassat 820-unissaat Naalakkersuisut aalajangerpaat
2025-mi qilalukkat qaqortat qernertallu pisassiissutigineqartut Aalisarnermut Piniarnermullu Naalakkersuisup novembarip 29-ani 2024-mi aalajangiuppai. Piniartut atuisullu ilisimasaat, Piniarnermut Siunnersuisoqatigiinnut ilaasortat kommunillu tusarniaaffigineqarnerat kiisalu Qilalukkat Ataatsimoorullugit Ataatsimiititaliami (JCNB) aamma NAMMCO-p ilisimatuussutsikkut innersuussutaat kingulliit tunngavigalugit aalajangerneqarput.
Assiliisoq: Leiff Josefsen
Pisassiissutit aalajangerneqartut naapertorlugit maani nunami piniartut arferit 820-t tikillugit pisarisinnaavaat.
Qilalukkat qaqortat qernertallu pineqarput.
2025-mi Kitaani qilalukkat qaqortat pisassiissutit tamarmiusut 294-iupput. Pisassiissutit taakku sunngiffimmi inuussutissarsiutigalugulu piniartut piniarnissamut allagartallit akuersissuteqartullu pisarisinnaavaat.
Tunumi ukiunut 2022-2027-mut qilalukkat qaqortat 30-t teknikkikkut pisassiissutigineqartut suli atuupput, 2023-2024-mi pisat nalimmassarneqarnikuullutik.
- Piniartut atuisullu ilisimasaat, Piniarneq pillugu Siunnersuisoqatigiit ilaasortaannit kommuninillu tusarniaaneq kiisalu Qilalukkat Ataatsimoorullugit Ataatsimiititaliami (JCNB) 2019-imi aamma NAMMCO-mi 2019-2022-mi inassuteqaatit kingusinnerpaat tunuliaqutigalugit 2024-mi qaqortartassat qernertartassallu Naalakkersuisunut ilaasortat aalajangertarpaat.
Qilalukkat qernertat 496-it
2025-mi Kitaani qilalukkat qernertat pisassiissutit 455-iunissaat aalajangerneqarpoq.
Tunumi qernertanik 41-nik pisassiisoqarsimavoq, Naalakkersuisut naapertorlugit taakkua neqissaqarniarnerat qulakkeerneqassalluni.
- 2025-mi pisassiissutit 2024-mut sanilliullugit pisassiissutinut allannguuteqarput, tassanilu aalajangerneqarpoq Ittoqqortoormiinut qernertanik pisassat 17-inut inissinneqarlutik, Kangerlussuarmut qernertat 16-it, kiisalu Tasiilap eqqaani qernertat 8-t, taamaalillutillu Tunu tamakkerlugu 2025-mut pisassat ataatsimut amerlassusaat 41-ssallutik. Tunumi neqissaqarniarneq eqqarsaatigalugu pisassiissutit aalajangerneqarput, Aalisarnermut Piniarnermullu Naalakkersuisoqarfik taama allappoq.
