KL

DK

25-inik ukiulik toqutseriarsimasutut eqqartuunneqartoq: Pinerlineqartoq komartinneqartoq

Angut Atammimmi sakkortuumik nakuuserfigineqareernermi kingorna inuunera navianartorsiorpoq. Nakuusernermut sakkortuumut eqqartuussivilersuussineq maanna naammassivoq. Angut 25-inik ukioqartoq toqutseriarsimasutut pisuutinneqarluni ukiuni sisamani pineqaatissinneqarsimasut inissiisarfianiittussanngorlugu 10.000 koruuninillu taarsiisussanngorlugu pineqaatissinneqarpoq.

Tôrtia Reimer-Johansen
Journalist
Offentliggjort

Angut Atammimmi illumi angummit 25-inik ukiulimmit nakuuserfigineqarluni tukkarneqarmat, isimmigarneqarmat tilluarneqarmallu angut alla takunnittuuvoq. 

- Isigisara amiilaarnangaarmat tupannangaarmallu tupaqqallunga silaarutitallappunga, takunnittutut ilisimannittoq eqqartuussivimmi sallusussaatitaanani decembarip ulluisa aappaanni nassuiaagami ilaatigut taama oqarpoq.

Pisoq Atammimmi illumi mikisumi ernguffiup nalaani pivoq, tassani illu isaaffiuvoq. Isersimasut ilagaat angut 25-inik ukiulik.

Angutip taassuma isersimasut ilaat angut tassanngaannaq nakuuserfigalugu aallartippoq.

- Eqqarsarpunga tassa immaqa toquppaa.

Takunnittutut ilisimannittoq tupaqqanermini iliuuseqarsimasinnaasimanngilaq. Angutip persuttakkani ilisimajunnaaqqasoq qimallugu anivoq. Kingorna ilisimannittoq ikiortissarsiorniarluni illumiit anivoq.

Ilisarsaajunnaarpoq

Takunittutut ilisimannittoq ikiortissarsiornerata nalaani illumik piginnittoq angerlarpoq, illumullu iserami angut aaginnaalluni natermi nalasoq takuaa tupallunilu.

- Iserama inuk nalasoq takuara, tupaallattorujussuuvunga. Aallaqqaammut ilisarinngikkaluarpara. Tassani naluara uumanersoq toqusimanersorluunniit.

Atammimmi innuttaasut 200-it missaannaanniimmata innuttaasut imminut ilisarisimalluartuupput. Qatserisartoq ikiuuttussatut kalerrinneqartup ikiuukkiartorluni apuukkami angut nalasoq aamma ilisarisinnaasimanngilaa -  kingusiinnaanili paasivaa nammineq soraluaralugu.

Kiinaani ajoqusernerit 14-it

Inuup timaanik misissuisartut nalunaarusiaat naapertorlugu nakuuserfigineqartoq kiinnamigut 14-inik ajoqusersimavoq, tallua illuttut napisimavoq, qaratsamigut pullanneqarpoq puaalu ajoqusersimallutik.

Atammimmi napparsimaveeqqami morfinimik taamaallaat ikiorsersinnaasimavaat.

- Atammimmi taama pisoqartillugu iliuuseqarpallaarsinnaanngilagut, napparsimaveeqqami sulisoq eqqartuussivimmi ilisimannittutut nassuiaagami oqarpoq.

Nakorsamit ikiorserneqarsimanngitsuugaluaruni toqusimassagaluartoq

Nakuuserfigineqartoq Nuummut Dronning Ingridip Napparsimavissuanut aallarunneqarpoq, tassani ilisimajunnaarsinneqarpoq ullullu arlallit aneersaartuuteqarluni. Ullumikkut uisaanngunermik ajornartorsiuteqarpoq eqqaamaniarnerminillu aamma ajornartorsiuteqarluni.

- Nakorsamiit ikiorserneqarsimanngikkaluaruni toqusimassagaluarpoq, inuup timaani misissuisartut nalunaarutaani allassimavoq.

Unnerluussisussaatitaasup taamaattumik piumasaraa unnerluutigineqartoq ukiuni sisamani pineqaatissinneqarsimasut inissiisarfiannut inissinneqassasoq, 10.000 koruuninillu pineqartumut taarsiissuteqassasoq.

- Ullumikkut maani toqutsisimanermut eqqartuussivilersuussinnginnatta iluatsitsineruvoq, unnerluussisussaatitaasoq naggataarutaasumik oqaaseqarnermini oqarpoq.

Eqqartuunneqartoq eqqartuussivilersuussinerup nalaani arlaleriarluni qiavoq. Taassuma oqaatigaa iliuuserisimasaminut peqqissimilluni.

- Toqutseriarnissara siunertarinngikkaluarpara, aamma inoqatikka taamak pinavianngilakka, naggataarutaasumik oqaaseqarami taama oqarpoq.

Eqqartuussut

Angut 25-inik ukiulik toqutseriarsimasutut pisuutinneqarluni eqqartuunneqarpoq, ukiunilu sisamani pineqaatissinneqarsimasunut inissiisarfimmiittussanngortinneqarluni, taassuma saniatigut 10.000 koruuninik taarsiisussanngortinneqarpoq.

Illersuisunilu piumasaqarput ulluni 14-ini eqqarsarfeqarumallutik, tassani paasinarsissaaq eqqartuussinermut aalajangerneq akuerinerlugu imaluunniit Nunatta Eqqartuussisuuneqarfianut suliassanngortissanerlugu.

retsmedicinsk overfald inuiaqatigiit dronning ingrids hospital drabsforsøg atammik samfund

ATORFIIT Se alle jobs

Powered by Labrador CMS