KL

DK

Aqqalu C. Jerimiassen:

§ 37 naapertorlugu apeqquteqartarneq qanoq atorluarsinnaavarput?

Inatsisartuni ilaasortat siunnersuutissaminnut akissutissarsioraangamik § 37 naapertorlugu apeqquteqartarnerat nalinginnaavoq. Tamannali akeqarpoq. Inatsisartut § 37 naapertorlugu apeqquteqartarneq qanoq atorluarneqarsinnaanersoq Aqqalu C. Jerimiassenip eqqarsaatersuutigaa.

Akit qaffakkiartornerat atugassarititaasullu ilungersunartut oqallisigineqangaarput, Aqqalu C. Jerimiassen Naalakkersuisunut apeqquteqaammini oqarpoq.
Dorthea Reimer-Johansen
Journalist
Offentliggjort

- Inatsisartut § 37 naapertorlugu apeqquteqaraangamik Naalakkersuisut akiniaasaartarnerat eqqarsarnartoqartikkakku. § 37 naapertorlugu apeqquteqarneq qanoq naleqartiginersoq takorusukkakku.

Atassutip siulittaasua Aqqalu C. Jerimiassen § 37 naapertorlugu apeqquteqaateqarsimanerminut nassuiaalluni taama akivoq. Taassuma Naalakkersuisunut apeqqutigaa aningaasat qanoq amerlatigisut akissuteqarniarnermut atorneqartarnersut.

Inatsisartuni ilaasortat Inatsisartunut siunnersuutissaminnut atugassaminnik § 37 naapertorlugu apeqquteqarsinnaatitaapput.

Kisianni lnatsisartut Naalakkersuisunut § 37 naapertorlugu apeqquteqartarnerat agguaqatigiisillugu ukiumut nunatta karsianut qanoq aningaasartuutaatigisarpa?  Naalakkersuisunut apeqquteqarneq ataaseq agguaqatigiisillugu qanoq naleqarpa? Aqqalu C. Jerimiassen § 37 naapertorlugu Naalakkersuisunut ilaatigut taama apeqquteqarpoq.

Akissuteqarnermut akunnerit 12,5-it

Naalakkersuisut siulittaasuat Múte B. Egede 2015-imi misissuisimanermut innersuussilluni akissummini allappoq agguaqatigiisillugu akunnerit 12,5-it § 37 naapertorlugu apeqqutinut akissuteqarnermut atorneqartartut. Ilanngullugulu nassuiaatigaa apeqqutinut siullernut 100-nut akunnerit 1.092,5-it atorneqarsimasut.

- § 37-imut ataatsimut 12,5 tiimit atorneqartarsimassappata aningaasartuutissat tamarmiusut eqqarsaatigalugit sulisut akissarsiatigut isumaqatigiissutaat apeqqutaasussaapput. Sulisut AK isumaqatigiissutaa naapertorlugu atorfilinnut agguaqatigiissitsisoqarsinnaavoq 201,81 kr.-mut, pisortanullu isumaqatigiissut naapertorlugu akiusoq agguaqatigiissillugu 728,73 kr.-ulluni, Múte B. Egede nassuiaavoq.

Tassa imaappoq § 37 naapertorlugu apeqquteqaatit akiniarnerannut aningaasat 2.522,62 koruunit 9.109,12 koruunillu akornanni atorneqartartut.  

Tamatuma saniatigut nutserneqarneranut aningaasartuutit, piffissaq Naalakkersuisup atorsimasaa kiisalu lnatsisartut Siulittaasoqarfiani sulisunut piffissarlu atorsimasat ilanngunneqartariaqassasut, Naalakkersuisut siulittaasuat akissummini ilaatigut allappoq.

Apeqquteqannginnermi eqqarsarluaqqaarnissaq

Inatsisartunit 2023-imi § 37 naapertorlugu apeqqutigineqartut 186-iupput, taamaasillunilu lnatsisartuni ilaasortat apeqquteqaataasa akineqartarnerinut aningaasartuutaasimasut 469.208,25 kr. aamma 1.694.296,32 kr. akornannut missingerneqarput.

Naleqqami siulittaasup, Pele Brobergip § 37 naapertorlugu apeqqutit akiniaasaarneqartarnera misigisimavaa, tamannalu isornartorsiorlugu. § 37 naapertorlugu apeqquteqartarneq Aqqalu C. Jerimiassenip eqqarsaatersuutigai:

- Apeqqutit kingusinaarlugit akineqartut aamma naleqarput. Inatsisartunut siunnersuusiorniarluni apeqquteqartoqartarpoq. Inuiaqatigiinnut qanoq naleqarpa apeqqutit siunnersuusiornermi atorsinnaanngippata, apeqqutit kingusinaarluni akineqarnerat peqqutaalluni?

Aqqalu C. Jerimiassen taamaammat isumaqarpoq § 37 naapertorlugu Naalakkersuisunut apeqquteqarniaraanni eqqarsartoqarluaqqaartariaqartoq.

- § 37 naapertorlugu apeqquteqartarneq eqqarsaatigalugu inuiaqatigiinnut iluaqutaanera takunikuunngilarput. Paasinarpoq siunnersuuteqarniarluni apeqquteqartoqartarmat. Immaqa apeqqutigineqarsinnaasoq suliaq qanoq ingerlanersoq imaluunniit pissutsit qanoq innersut. § 37 naapertorlugu apeqquteqartarneq qanoq atorluarsinnaaneripput nalilersugassaqqippoq Aqqalu C. Jerimiassen (A) Inatsisartuni ilaasortaasoq naggasiilluni oqarpoq.

Ima akeqarput

Inuit Ataqatigiinnit Inatsisartuni ilaasortat siorna 2023-imi § 37 naapertorlugu apeqqutinik 57-inik nassiussisimapput. Apeqqutit akinerannut 143.789 koruunit 519.220 koruunillu akornanni naleqassaqangatinneqarput.

Siumut Inatsisartuni ilaasortaatitaasa apeqqutaasa akineqarnerannut 148.835 koruunit 537.438 koruunillu akornanni akeqassangatinneqarput.

Demokraatit apeqqutinik 39-inik nassiussisimapput, akineqarnerallu 98.382 koruunit 355.256 koruunillu akornanni naleqassangatinneqarput.

Atassutip Inatsisartuni ilaasortaatitai pingasut apeqqutinik aqqanilinnik nassiussisimapput, taakkulu 27.749 koruunit 100.200 koruunillu akornanni akeqassangatinneqarput.

Naleraq  § 37 naapertorlugu apeqquteqaatinik 19-inik nassiussisimavoq, taakkulu 47.930 koruunit 173.071 koruunillu akornanni naleqarput.

Naggataatigut Attaviitsoq Knud Mathiassen ataasinnguamik apeqquteqaateqarsimavoq. Apeqqutaatalu akineqarnera 2.523 koruunit 9.109 koruunillu akornanni naleqarpoq.

paragraf 37 samfund aqqalu c. jerimiassen inuiaqatigiit

ATORFIIT Se alle jobs

Powered by Labrador CMS