Aaffanniarneq ujaasinermik kinguneqartoq

Tallimanngornermi ualikkut kingusissukkut unnukkullu Sisimiut avataanni ujaasinermik annaassiniarnermillu aallartitsisoqarpoq. Pisoq ernumanartumik aallartippoq, eqqissisimasumilli naggaserneqarluni. Issittumi Sakkutooqarfimmit ullormilu tassani pigaartuusumit ikiorneqarluta pisoq oqaluttuareqqipparput:

– Sisimiuni najugaqartut ilaata ernumassuteqarnera pissutigalugu, apriilip sisamaanni ualikkut kingusissukkut Aasiaat radiuat politiillu attaveqarfigineqarput. Inuit marluk aaffanniarlutik aallarsimasut uteqqissimanngitsullu pineqarput.

Politiit taakku marluk ujarneqarnerannut imaatigut ikiuukkusukkaluarput, taakku kingullermik sumiissusersineqaramik Sisimiut kitaanni 15 sømilit missaanni avasissusilimmiipput. Tamannali politiinut ilungersunartuulluni, tamaani sikoqarpallaarnera pissutigalugu. Taamaalimmat Issittumi Sakkutooqarfik ikiuuttariaqalerpoq:

– Issittumi Sakkutooqarfik aalajangerpoq qulimiguulimmik ujaasinermik annaassiniarnermillu aallartitsiniarluni, inuit taakku marluk ujariartorniarlugit. Qulimiguulik ujarneqartut sumiiffiattut kingullertut ilisimaneqartumukarpoq. Aammattaaq sakkutuut allat kalerrinneqarput, silarlulernissaa taarsilerneralu pissutigalugit, taamaaliorniarluta aalajangerpugut, pigaartoq oqarpoq.

Qujanartumik, soorlu oqaatigineqareersutut, ujaasineq nuannersumik naggaserneqarpoq:

– Issittumi Sakkutooqarfik nalunaaqutaq 22.07 nalunaarfigineqarpoq, umiatsiaaqqamiittut inuit marluk Sisimiut umiarsualiviannut tikikkiartortut takuneqarsimasut, tamannalu kingornatigut sumiiffimmi najugaqartunit politiinillu uppernarsarneqarluni. Issittumi Sakkutooqarfiup ujaasinini taamaalilluni unitsippaa.

Pisimasumi oqaatigineqanngilaq, aaffanniat taakku marluk imaani ajornartorsiorsimanersut. Imaluunniit aarrinik ujaasillutik nalinginnaasumit ungasinnerusumut kimmukarsimanersut.