Aaja Chemnitz Inatsisartunut qinigassanngortinnianngilaq

Inuit Ataqatigiinnit (IA) folketingimut ilaasortaq Aaja Chemnitz marsip aqqarngani Inatsisartunut qinersisoqarpat toqqarneqarsinnaasut akornanniissanngilaq.

Kalaallit Nunaanni pissutsit pissutigalugit qinigassanngortissanerluni ulluni arlalinni eqqarsaatigeqqissaareerlugu Aaja Chemnitz Ritzauimut oqarpoq.

- Eqqarsaatigigaatsiarakku, Inatsisartunullu qinigassanngortinniarnanga aalajangerpunga.

- Folketingimi ilaasortaanera maannakkut pingaaruteqarmat. Folketingimi Kalaallit Nunaat pillugu ataatsimiititaliami siulittaasutut piffissami nalorninartorsiorfiusumi matumani Kalaallit Nunaat misilittagalinnik Folketingimiittoqarnissaa pingaaruteqartoq isumaqarama, oqarpoq.

Aaja Chemnitzip eqqarsaatigisani Sermitsiamut pingasunngornermi oqaluttuarai. Partiini, naalakkersuisuni Múte B. Egede siuttoralugu issiasoq eqqarsaatigisani pillugit aamma oqaloqatigisani ataatsimeeqatigiartorlugu Kalaallit Nunaannukarpoq,

Folketingimiiginnarnissarsi, Aaja Chemnitzip 2015-imiilli ilaasortaaffiani, aalajangerneqarpoq.

- Qinersineq erseqqippallaassanngitsoq takorloorsinnaavara, taamaattumillu ilaatigut Danmarkimut isumaqatiginninniarnermi Folketingimi nukittuumik sinniisoqarnissaq pingaaruteqarluinnassalluni.

Folketingimut qinersinissami tulliuttumi qinigassanngorteqqinniarnerluni suli aalajangersimanngilaa.

- Maannakkut pisut eqqarsaatiginissaat pingaaruteqarpoq isumaqarpunga, piffissamimi nalorninartorsiorfiusumiikkatta. Taamanikkussamut nalunarumaanngilaq, Chemnitz oqarpoq.

/ritzau/