Aalisarnermut inatsit nutaaq Namminersorlutik Oqartussanut ukiumut millionilikkaanik akeqassaaq
Aalisarnermut inatsisissaq akerleriissutaasoq upernaaq akuersissutigineqartoq ukiuni aggersuni Nunatta karsiata missingersuutaanut millionilikkaanik nanertuutaassasoq, 2025-mut aningaasanut inatsisissatut siunnersuummi atuarneqarsinnaavoq.
Leiff Josefsen
Ukiuni sisamani tulliuttuni aalisarnermut inatsisip nutaap atuutilersinnissaanut Naalakkersuisut 9,5 millionit koruuninik immikkoortitsisimapput. Aningaasat millionillit taakkua ataasiartumik aningaasartuutissanik siunissamilu aningaasartuutinik aalajangersimasunik ilaqartut, nalunaarutigineqarpoq.
Naalakkersuisut ataasiartumik aningaasartuutigisassaat ukuupput:
- Aalisarneq pillugu paasissutissanik ingerlatitseqqiineq
- Saattuarniarnermi IOK-mik atulersitsineq
- Kangiani kitaanilu avataasiorluni qaleralinniarnermi IOK-mik atulersitsineq
- Aqutsiveqarfik 47-mi sinerissap qanittuani aalisarnermi nammineq piumassuseq aallaavigalugu IOK-mik atulersitsineq
Nunatta karsianut aningaasartuutit aalajangersimasut pillugit aningaasanut inatsisissatut siunnersuummi ima allassimasoqarpoq:
- Aalisarneq pillugu paasissutissanik siaruarterineq
- Sinerissap qanittuani aalisarnermi nammineq piumassuseq aallaavigalugu IOK-mik atulersitsineq
Saattuarniarnermi avataasiorlunilu qaleralinniarnermi IOK-mik atulersitsineq, "aalisarnerit taakku aqunneqarnerinut pisortat aalajangersimasumik aningaasartuutaannik appaanissaanik ilimagisaqarfiusoq", siunnersuummi eqqaaneqarpoq.
